TUUMUDIMA TUMA 26 - Mampruli

¹ Di saha ka NaaAgrippa daa yɛli Pɔla, ni, “Tɔ, i mari kukɔri ni i ti wulisi ti i yɛla ŋɔn nyɛ seem.” Pɔla mun daa zaŋŋi u nuu m‑bugsi n‑ti ba, ka gbaai u yɛttɔ'a.

² Ni, “M Ba NaaAgrippa, n yɛtti, ni, m mari zugsuŋŋu zaŋŋi n‑kyaŋŋi n zuna yɛttɔ'a wa yɛla. Dama di nyɛ la nyini tooni ka m mari la kukɔri ni n gyɛrigri n‑kyiisiri ban galimni ma yɛla zaa.

³ M mi halli, ni, i baŋŋi ti Yɛhudiyadima kaya ni ti nangbankpeemni yɛla zaa. Dizugu n susiri i, ni, i kur di sugru n‑wum n yɛttɔ'a wa.

⁴ Tɔ; ka Yɛhudiyadima zaa mi m beebu yɛla ŋɔn daa nyɛ seem, ni, n na'akyimni saha halli ni zuna n daa bɛ la m maŋtoori timbiisi saani pɔi, ka naayi kyɛ Gyɛrusalɛm na nti bɛ bɛni.

⁵ Ba daa mi n yɛla ka di yuui: ba yi sakki n‑yɛli yɛlimaŋni, ba nin yɛli, ni, n daa dɔli la ti zaaligu nimmoosi soori maa, di nyɛ la Farisii dima dinni.

⁶ Ka pampaŋŋɔ ba zaŋŋi ma n‑zaali kpa wa la ti yaadima tama maa yɛla zugu, Naawunni ŋɔn daa ti noori, ni, u nin ti ba maa; ka dinŋɔ zugu ka ba galimni ma, walla!

⁷ Lala yɛla maa ka ti za'anɔya pii ni ayi niriba zaa guri ni tama ni nimmoaa, ni ba ti nya lala yɛla maa. Ka dizugu ba kur gyeemni la Naawunni, wuntaŋŋa ni yuŋŋu zaa. Naaba wumma - di nyɛ la lala Naawunni noori yɛligu maa zugu ka ba galimni ma, halli ni ban nyɛ Yɛhudiyadima gba!

⁸ Bɔzugu ka ya ku nyaŋŋi n‑niŋi yɛdda, ni, Naawunni siri neaari la niriba kum ni?

⁹ Tɔ; ka dizugu man gba daa teesi, ni, di sumni ni n kpaŋŋi m maŋŋa n‑zabi ban dɔli Yisa, Nazarɛti doo la, yɛdda soori maa.

¹⁰ Ka n daa niŋi lala n‑namsiri ba Gyɛrusalɛm timpuuni: n daa gbaasi Naawunni niriba pam n‑kpari duu ni, dama gyeeŋŋu toondaandima daa ti ma soori, ni, n tum lala. Halli ban daa ku ba sahanseaa la, n daa bu yiisi n nuu ba yɛla maa ni.

¹¹ Yinyaari daa kpɛ ma lala, halli ka la'aŋŋu duri zaa puuni ka n daa darigri ba tuba ka mugsiri ba, dama n daa boori ni ba ti za'asi Yisa yɛla; halli n daa kyaŋŋi tinseesi gba m‑paasi, ni n ti namsiri ba.

¹² Ka lala zugu n daa deaai gyeeŋŋu toondaandima yiiko ka yi soori ni n kyaŋŋi Damasikusi tiŋŋa.

¹³ Ka di daa paai wuntaŋŋa agbaa saha, ka neesim pam daa nyakki n‑yi saazugu ni na nti gyiligi man ni ninvugseeba ban daa dɔli ma la zaa. Lala neesim maa daa gaari wuntaŋŋa neesim ŋɔn nyɛ seem.

¹⁴ Ti zaa daa lu la tiŋŋa, ka n wum ka kukɔri tɔ'asiri n‑tiri ma, Hibruuli yɛttɔ'a maa ni, ni, ‘Sɔla, Sɔla, bɔzugu ka i namsiri ma? I ŋmani la na'asɔ ŋɔn koori ka za'asira, ka ba feebri u.’

¹⁵ Ka n daa boosi n‑yɛli, ‘Ŋɔni nla, n dugma?’, ka u labsi n‑yɛli ma, ni, ‘Mani Yisa: mani ka i namsiri maa.

¹⁶ Amaa doaam n‑zaani saazugu! Man wulisiri la m mammaŋŋa n‑tiri i, ni n zaŋŋi i n‑leebi n tuntumna. I nin ti yɛli niriba nyin nya yɛttɔ'aseesi zuna wa, ka laa n‑yɛli ba lala bunseesi nyin nin nya yaasa.

¹⁷ N nin fa i m‑basi Yɛhudiyadima nuu ni, ni ban pa Yɛhudiyadima nuu ni gba, dama ban saani ka n ya tum i.

¹⁸ I nin kyɛ ka ba nini neaai; i nin kyɛ ka ba ŋmaligi ka kyɛ zibsim maa, n‑kyɛ neesim maa ni na; i nin kyɛ ka ba ŋmaligi n‑yi Sintaani fukumsi ni m‑paai Naawunni saani na, ka ba nin ti niŋi ma yɛdda halli nti nya ba taalli zaa kyɛ-m‑pɛŋŋi, ka la'am Naawunni niriba sunsukkuni.’

¹⁹ Tɔ, NaaAgrippa, kur wumma! Di zugu n daa bu za'asi Naawunni ŋɔn daa wulisi ma zii yɛla maa.

²⁰ Ay! - n daa daŋŋi n‑kyaŋŋi m‑paai Damasikusi m‑mooli n‑ti ba, ni, ba kyɛli ba teesibeeri ni ba tumbeeri yɛla m‑basi ka ŋmaligi n‑kyɛ Naawunni saani na ka tumni lala tunsuma maa. Ka di nyaaŋŋa n daa kyɛ Gyɛrusalɛm na m‑moonni lala, ni Gyuudii tingbaŋŋu maa ni m‑paasi, ka naayi kyaŋŋi ban pa Yɛhudiyadima maa tinsi gba n‑wulisiri ba yɛttɔ'a wa yɛla.

²¹ Ka anŋɔ zaa zugu ka Yɛhudiyadima daa gbaai ma Gyeeŋŋu Yiri maa puuni n‑yɛli, ni, ba ku ma.

²² Amaa Naawunni ŋɔn daa ti suŋŋi ma zugu, n na bɛ ni halli ni zuna; ka n zɛya n‑wulisiri niriba wa zaasa, birikyindima ni tarimma zaa; m bu yɛtti sɛseela na'ala anabidima ŋɔn daa pun yɛli, ni, di nin niŋi seem, ni Musa gba daa yɛli lala.

²³ Di nyɛ la: ni, Naawunni ŋɔn diisi sɔ Masiiya la nin ti di wahala; ni din paasi lala, ni, u nin leebi ŋɔn daŋŋi tooni n‑yisigi kum ni, ka dizugu u nin ti kyɛ ka neesim neaai n‑tiri u maŋtoori niriba, ni ninvugseeba ban paasi ba zugu maa zaa.”

²⁴ Tɔ; ka Pɔla ŋɔn daa tɔ'asi u yɛla lala n‑naai, Fɛsitusi daa tasi pampam n‑yɛli, ni, “N zɔ Pɔla, i zugu sa'amiya! I kariŋŋu pam ni i bamsim zugu n kyɛ ka yinyaari kpɛ i.”

²⁵ Ka Pɔla daa labsi n‑yɛli u, ni, “Ay, n zugu bu sa'am. I bu nya, m Ba Fɛsitusi, ni, n tɔ'asiri hoo ninvugmaŋni ŋɔn tɔ'asiri seem, n‑wulisiri yɛlimaŋni yɛla?

²⁶ N tɔ'asiri yɛla maa zaa ka bu sɔ'ari seelli, man tɔ'asiri Naa maa tooni zugu; ka di pa la u na zi n‑wum anŋɔ zaa lahabaari. U mi man tɔ'asiri yɛliseesi maa gbinni suŋŋa, dama ba daa bu sɔ'ai n‑tum anŋɔ zaa.

²⁷ M Ba NaaAgrippa, i niŋi anabidima yɛla maa yɛdda? - Ii! M mi halli, ni, i niŋiya!”

²⁸ Ka Naa maa daa gyɛrigi n‑yɛli u, ni, “Dinŋɔna, i teesiya, ni, di ku yuui ka i kyɛ ka n leebi Kirisitadoowa, bee?”

²⁹ Ka Pɔla daa labsi n‑yɛli, ni, “Di yi yuui, bee, di yi bu yuui, n siri boori ni nyini, ni seeba zaa ban wumni n yɛttɔ'a zuna wa m‑paasi i zugu, nin ti leebi hoo man ŋɔn bɛ seem la - amaa pa la ban lɔ ma kyɔrimi wa taabu!”

³⁰ Tɔ; ka di saha Naaba daa yisigi n‑zaani saazugu, ŋɔn ni Gɔmna ni Bɛriniisi ni ba taaba ban zintiri bimbinni zugu la zaa.

³¹ Ka ban daa doaai n‑kyɛnni maa, ba daa sɔsiri n‑yɛtti taaba, ni, “Doo wa bu tum sɛseelli din sumni kum, halli din sum ni dansarika duu kparibu gba.”

³² Ka NaaAgrippa yɛli Fɛsitusi, ni, “U yi da bu zaali u yɛttɔ'a NaaTitaari saani, u naa n‑toaai n‑yi n‑kyaŋŋi yɔri.”