TUUMUDIMA TUMA 25 - Mampruli

¹ Tɔ; ka Fɛsitusi ŋɔn daa ti di Gɔmna fukumsi maa sahanseaa la, u daa niŋi dabsa ata Sizariiya timpuuni pɔi, ka naayi yi bɛni n‑kyaŋŋi Gyɛrusalɛm.

² Ka Yɛhudiyadima gyeeŋŋu toondaandima ni ba kpamma maa daa paai u na nti galimni Pɔla

³ ka susiri Gɔmna maa, ni, u kpaŋŋma u maŋŋa n‑suŋŋi ba yɛttɔ'a maa ni, ka kyɛ ka ba taasi Pɔla Gyɛrusalɛm na. Ba daa susi u lala dama ba daa boori ni ba sɔ'ai n‑guri soori ka yi ya'abi na n‑ku u.

⁴ Amaa Gɔmna Fɛsitusi daa gyɛrigi n‑yɛli ba, ni, Sizarii tiŋŋa ka ba daa pun guri Pɔla, halli ni u mammaŋŋa ya n‑labi n‑kyaŋŋi bɛni ka u kyɛnni saha bu ya yuui.

⁵ Ni, “Ka dinŋɔna ya kyɛ ka ya zuguraanseeba doaai n‑dɔli ma n‑kyaŋŋi bɛni, ka taaliseaa yi bɛ doo maa saani, ya nin toaai n‑galim u n‑wulisi lala.”

⁶ Tɔ; ka Gɔmna maa daa kpalim m‑bɛ Gyɛrusalɛm n‑niŋi daba anii-awai ka naayi bakki n‑kyaŋŋi Sizariiya. Ka beoo ŋɔn daa ti neaai, u daa zi kootu ni ka kyɛ ka ba mari Pɔla na.

⁷ Ka ŋɔn daa ti kpɛ na maa, Gyɛrusalɛm dima daa kyɛ na n‑zaani n‑gyiligi u n‑galimni u yɛttɔ'abeeri ni taalitibsa yɛla; amaa ba daa bu nyaŋŋi n‑wulisi anŋɔ zaa yɛlimaŋni ŋɔn nyɛ seem.

⁸ Ka Pɔla mun daa gyɛrigi n‑yɛli, ni, “M bu tum taaliseaa n‑galim Yɛhudiyadima zaaligu, bee ba Gyeeŋŋu Yiri, yɛttɔ'aseelli ni; halli n‑galim Room NaaTitaari yɛla gba.”

⁹ Amaa Gɔmna Fɛsitusi daa boori ni u suŋŋi Yɛhudiyadima maa m‑maai ba sufu; ka dizugu u daa yɛli Pɔla, ni, “Ammi, i nin sakki, ni, i kyaŋŋi Gyɛrusalɛm, ka n nin tɔ'asi i yɛttɔ'a wa bɛni?”

¹⁰ Ka Pɔla daa labsi n‑yɛli u, “N zɛ la NaaTitaari kootu ni, ka bɛni ka di sumni ni ba kari n sariya. I mi halli, ni, n na zi n‑tum taaliseaa n‑galim Yɛhudiyadima maa.

¹¹ Halli n yi da tum tumbɛseaa kan sumsi ni kum, n ku za'asi, ni, ba ku ma dizugu. Amaa ba yi galimni ma yɔriyɔri n ku sakki, ni, sɔ zaŋŋi ma n‑niŋi ba nuu ni. Dizugu n susi, ni, i zaŋŋi n yɛttɔ'a wa n‑zaali n‑ti NaaTitaari saani.”

¹² Di saha ka Fɛsitusi ni u kpamma maa daa ŋmɛ saawara; ka naayi sakki, ni, “I susiya, ni, ti zaŋŋi yɛttɔ'a wa n‑zaali n‑ti NaaTitaari. Tɔ; NaaTitaari saani ka i siri nin kyaŋŋi.”

¹³ Di daa niŋi dahinseesi ka NaaAgrippa ni u pɔ'a Bɛriniisi daa ti paai Sizarii na, ni ba ti puusi Gɔmna Fɛsitusi.

¹⁴ Ba daa yuui bɛni beela, ka Fɛsitusi daa zaŋŋi Pɔla yɛla n‑wulisi n‑ti Naaba maa, ni, “Gɔmna Filiksi daa kyɛ ka dɔsɔ kpalim la dansarika duu ni;

¹⁵ ka man daa kyaŋŋi Gyɛrusalɛm la, gyeeŋŋu toondaandima ni kpamma maa daa kyɛ n saani na ni ba ti tɔ'asi lala doo maa yɛla, ni, n kpaŋŋma m maŋŋa n‑tɔ'asi u yɛttɔ'a n‑lusi u n‑ti ba.

¹⁶ Man mun daa gyɛrigi n‑yɛli ba, ni, di pa la ti Room dima kaari ni ti lusi sɔa, see ka ti daŋŋi n‑kyɛ ka ŋɔn ni ban galimni u la ti kpɛ na n‑tɔ'asi taaba yɛttɔ'a maa yɛla, ka u mari kukɔri n‑kyiisiri ba galiŋŋu maa.

¹⁷ Tɔ, ka ba daa dɔli ma n‑kyɛ kpa na; man mun n daa bu zaali yɛttɔ'a maa dabsiri, amaa beoo ŋɔn daa ti neaai, n daa zini kootu ni, n‑kyɛ ka ba mari doo maa na.

¹⁸ Ka baseeba ban daa galimni u yɛla maa ŋɔn daa ti zaani ni ba ti tɔ'asi, ba daa bu wulisi tumbɛseesi man daa teesi, ni, ba naa m‑mari n‑zaali u.

¹⁹ Amaa di daa nyɛ la nangbankpeemni zaŋŋi n‑kyaŋŋi ba maŋtoori wungyeeŋŋu yɛla, ni dɔsɔ ŋɔn boonni Yisa la, ni, u kpiya; Pɔla mun yɛli, ni, u na bɛ la u nyɔvuri ni.

²⁰ Dizugu n daa bu baŋŋi man ya n‑gbaai yɛttɔ'a maa seem, ka daa boosi u, ni, u nin sakki, ni, ti kyɛm Gyɛrusalɛm n‑tɔ'asi yɛttɔ'a maa, bee?

²¹ Amaa u mun daa susiya, ni, ti zaali yɛttɔ'a maa, halli ni u ti kyaŋŋi ti Ba NaaTitaari saani n‑kari sariya maa. Ka dizugu n daa kyɛ ka ba na guri u dansarika duu ni, see ka n nya soori ni ti zaŋŋi u n‑taasi ti Dugma Naaba saani.”

²² Ka NaaAgrippa daa labsi n‑yɛli u, ni, “M boori ni n wum doo maa yɛttɔ'a m mammaŋŋa.” Ka Fɛsitusi daa yɛli u, ni, “Beoo i sa nin wum u yɛla.”

²³ Tɔ; ka beoo ŋɔn daa ti neaai, NaaAgrippa ni Bɛriniisi daa yi na ni ba naam gyirima pam, ka kyɛ na nti kpɛ kootu dutitaari maa ni, ban ni soogyadima kpamma maa ni tiŋŋa maa ninvugtibsa zaa. Ka Gɔmna Fɛsitusi daa kyɛ ka ba zaŋŋi Pɔla m‑mari u n‑kpɛ na.

²⁴ Di saha ka Gɔmna maa daa yɛli, “M Ba NaaAgrippa, wumma! Zama, ya wumma! Ya gɔsim doo wa! Ŋɔnŋɔ yɛla zugu ka Yɛhudiya sɔkam zaa daa kyɛ n saani na Gyɛrusalɛm timpuuni, ka laa n‑kyɛ kpa na yaasa, ka tasiri pampam, ni, di bu laa n‑sumsi ni doo wa kpalim u nyɔvuri ni.

²⁵ Man mun daa viisi u yɛla, ka daa bu nya tumbɛseaa u saani kan sumsi kum. Amaa u daa susi yɛttɔ'a zaaligu n‑ti ti Ba NaaTitaari, ka dizugu n daa gbaai u yɛla lala, ni, n nin tum u Naaba saani.

²⁶ Amaa n na ka bunseelli ka n nin toaai n‑sɔbi u yɛttɔ'a maa yɛla yɛlimaŋni maa deede n‑tɔlim n‑ti Naaba. Ka dizugu, NaaAgrippa, n kyɛ ka u kyɛ i tooni na, ni yarima zaa tooni, ni ti ti viisi u yɛla; nti nya yɛttɔ'aseaa man nin ti sɔbi n‑tɔlim.

²⁷ Dama di bu dɔli la soori ni n tum yɛttɔ'adaansɔ Naaba saani ka na ka yɛttɔ'aseaa, ni n wulisi Naaba din kyɛ ka ba galimni u.”