TUUMUDIMA TUMA 24 - Mampruli

¹ Dabsa anu nyaaŋŋa ka Gyeeŋŋu Toondaana Ananayasi daa paai na, ni kpamseeba m‑paasi u zugu, n‑taasi Tɛritulusi ba yɛttɔ'atɔ'asira na; ka ba daa wulisi Gɔmna n‑yɛli ban galimni Pɔla seem.

² Ka ba daa booli Pɔla na, ka Tɛritulusi daa gbaai yɛttɔ'a ni u ti galimni u, ni, “Ti Ba gyirimadaana, Filiksi, wumma! Di nyɛ la i yiiko ni ka ti mari sufudoaa; ka di laa n‑nyɛ la i yuubu ni ka ti tingbaŋŋu wa maali, ka takki n‑nyɛ bunsuŋŋu.

³ Seelikam zaa, ni ya'ari kam zaa, ti deaari i lala suŋŋsim maa; ka dizugu ti puusiri i la wurilim puusigu.

⁴ Tɔ, ka ti bu boori ni ti sa'am i saha yaasa, amaa ti susiri i ni, i sufubaalim zugu, ni, i wum ti yɛlli beela.

⁵ Dama ti nya ninvugkyɔ'aŋŋu wa, ka u nyɛ la sɔ ŋɔn daamni Yɛhudiyadima maa duniya wa ya'ari kam zaa, ka ba zabra; ka u nyɛ la toondaana n‑ti Nazarɛti wɔligri soori dima wa.

⁶ Halli u daa ya sa'am Naawunni Gyeeŋŋu Yiri maa n‑kyɛ ka ka da'ai zaa, ka dizugu ti daa gbaai u. [[Ti daa yɛtti, ni, ti nin dɔli ti soori n‑kari u sariya;

⁷ amaa langyima kpeema maa, Lisiyasi, daa kpɛ na n‑zabi ni kpeeŋŋu ka fa u n‑yiisi ti nuu ni.

⁸ Di saha ka ŋɔn Lisiyasi daa yɛli, ni, baseeba ban ya galim u, see ka ba kyɛ i saani na.]] Tɔ, ka i yi ti viisi m‑boosi u lala boosa, i mammaŋŋa nin toaai n‑wum u saani bunseesi zaa tin galimni u a zugu maa.”

⁹ Ka Yɛhudiyadima maa zaa daa la'am n‑galimni u m‑paasi, n‑yɛtti, ni, anŋɔ zaa nyɛ la yɛlimaŋni.

¹⁰ Tɔ; ka Gɔmna maa ŋɔn daa wulisi u, ni, u tɔ'asima maa, Pɔla daa yɛliya, “M mi halli, ni, i pun katti sariya tingbaŋŋu wa puuni n‑yuui; ka dizugu n sufu maaya pam dinŋɔ zugu, ni, di nyɛ la nyini tooni ka n ya tɔ'asi n yɛttɔ'a wa.

¹¹ I nin toaai m‑boosi m‑baŋŋi i mammaŋŋa, ni, di bu gaari dapiiya ni ayi man daa kyɛ Gyɛrusalɛm na ni n ti gyeem Naawunni.

¹² Ba daa bu nya ka man ni sɔ ŋmɛ nangbankpeemni Gyeeŋŋu Yiri maa ni, ba mun daa bu laa n‑nya ka n damni daadam maa, la'aŋŋu yiya ni bee timpuuni.

¹³ Ba mun ku toaai n‑wulisi i, ni, yɛlimaŋni bɛ ban yɛtti n‑galimni ma bunseesi wa ni, halli beela.

¹⁴ Kulla dinŋɔ ka n sakki n‑ti i, ni, di nyɛ la yɛlimaŋni: n gyeemni la ti yaadima Naawunni n‑dɔli ban boonni sɔseaa, ni, ‘wɔligri soori’ la. Amaa lala soori dɔligu puuni ka n laa n‑niŋni yɛdda n‑niŋi din bɛ Naawunni zaaligu puuni zaa, ni anabidima ŋɔn daa sɔbi seem zaa m‑paasi;

¹⁵ ka laa m‑mari tama Naawunni zugu, ni, ninvugsuma ni ninvugbeeri zaa nin ti doaai kum ni, ka lala tama ka ninvugseeba ban galimni ma la gba mara.

¹⁶ Lala zugu ka n kur moori saha kam ni nimbirimoaa, ni n sufu ni teesa ku diisiri ma galinseelli zaa vi, zaŋŋi n‑kpa Naawunni, ni ninsaalidima ni.

¹⁷ Tɔ; ka di nyaaŋŋa ka yuunseesi daa gaari, ka pampaŋŋɔ n daa kyɛ na ni n ti tisi piini n‑tiri faradima m butiri taaba sunsukkuni, ni n Naawunni piini m‑paasi.

¹⁸ Man daa niŋni lala maa zugu, n daa sɛ'asi m maŋŋa kasikasi n‑kpɛ Naawunni Gyeeŋŋu Yiri ni, ka ba daa nya ma bɛni. Di saha ka zama daa bu dɔli ma, man mun daa bu daamni sɔa.

¹⁹ Amaa Yɛhudiyaseeba ban daa yi Ɛseaa tingbaŋŋu ni na n daa bɛ ni - halli ba yi daa nya taaliseaa n saani, di sumni ni ban da bɛ la kpa wa n‑galimni ma.

²⁰ Tɔ; ka ninvugseeba ban zɛya wa, see ka ba yɛli ban daa nya n taaliseaa, man daa zɛ ba la'aŋŋu maa ni sahanseaa la.

²¹ Ay! Taalli ka ni, di yi pa la yɛttɔ'a yinni man daa zɛ ba tooni n‑kaasi n‑yɛli seaa la, ni, ‘Yɛttɔ'aseaa tin tɔ'asiri kpa wa zuna, nyɛ la yɛttɔ'a zaŋŋi n‑kyaŋŋi kum yisigri yɛla.’ ”

²² Tɔ; ka Gɔmna Filiksi daa nyɛ la sɔ ŋɔn mi Yisa soori yɛla an bɛ seem maa deede; ka dizugu di saha maa u daa zaŋŋi yɛttɔ'a maa n‑zaali dabsiri. Ni, “Langyima kpeema Lisiyasi yi ti paai na sahanseaa, n nin kari ya sariya maa.”

²³ U daa yɛli langyima toondaana maa, ni, ba zaŋŋma Pɔla n‑kpari, amaa ba kyɛ ka u nya paalu beela, ka ba di za'asi u zɔdima kpeebu na ni ba ti suŋŋi u.

²⁴ Di daa niŋi dabsa beela ka Gɔmna Filiksi daa kyɛ na, ŋɔn ni u pɔ'a Diruusila, sɔ ŋɔn daa nyɛ Yɛhudiyapɔ'a la; ka u daa tum m‑booli Pɔla na, ni ba ti wum u yɛttɔ'a zaŋŋi n‑kyaŋŋi Yisa Masiiya yɛdda niŋbu.

²⁵ Amaa ŋɔn daa paai u kpaamni yɛla zaŋŋi n‑kyaŋŋi ninvugmaŋni tunsuma ŋɔn nyɛ seem la, ni mansɛ'asigu yɛla, ni Naawunni ŋɔn ya kari niriba sariya la, di saha ka dabeem daa gbaai Filiksi ka u daa yɛli, “Kyɛla ka kyaŋŋi pampaŋŋɔ! N yi ti nya dahama n nin booli i na yaasa.”

²⁶ U daa laa n‑teesi m‑paasi, ni, Pɔla ya n‑ti u la ligri, ka dizugu u daa kur boonni u na sahakam, ni ba diri azama.

²⁷ Amaa yuuma ayi ŋɔn daa gaari, Pɔrikyuusi Fɛsitusi daa deaai Filiksi; ka Filiksi mun daa boori ni u maai Yɛhudiyadima maa sufu, ka dizugu u daa kyɛ ka ba kpalim n‑kpatti Pɔla.