TUUMUDIMA TUMA 23 - Mampruli

¹ Pɔla ŋɔn daa zaŋŋi u nini n‑kpa kpamma la'aŋŋu dima maa, u daa gbaai u yɛttɔ'a n‑yɛli, “M mabiisi, n nyɔvuri puuni halli ni zuna, m beesigu nyɛ la bunkasi Naawunni tooni.”

² Di saha ka Gyeeŋŋu Toondaana Ananayasi daa yɛli ban zɛya la, ni, ba ŋmeem u noori u yɛlisim maa zugu.

³ Ka Pɔla daa labsi n‑yɛli “Naawunni nin ti ŋmɛ i gba! I ŋmani la hoo goonkuriseaa ban zaŋŋi titaari n‑ta, ka ka gɔsibu veela, amaa ka puuni bu zaani suŋŋa. I zinni n‑katti ma sariya Naawunni zaaligu zugu, ka i mammaŋŋa sa'amni zaaligu maa ka yɛtti, ni, ba ŋmeem ma!”

⁴ Ka ban daa zɛya la daa yɛli u, ni, “Ammi, i tuuri la Naawunni Gyeeŋŋu Toondaana maa lala?”

⁵ Ka u labsi n‑yɛli ba, “M mabiisi, ya gaafara! N da bu mi, ni, Gyeeŋŋu Toondaana n nyɛ u. Ba daa bu sɔbi lala, Naawunni yɛligu maa ni? Ni, ‘I di yɛli yɛttɔ'abeoo n‑tiri ŋɔn su i butiri fukumsi.’ ”

⁶ Tɔ; ka Pɔla daa baŋŋiya, ni, kpamma maa purigri daa dɔli la Saddusii soori, ka seeba mun dɔli Farisii dinni. Ka dizugu u daa tasi pampam la'aŋŋu maa puuni n‑yɛli, “M mabiisi, ya wumma! N nyɛ la Farisii doo, ka m badima gba daa dɔli Farisii soori maa. Yɛttɔ'aseaa tin la'amni na ni ti tɔ'asi nyɛ la yɛttɔ'a zaŋŋi n‑kyaŋŋi man mari tama seelli kum yisigri ni.”

⁷ Ka ŋɔn daa yɛli lala maa, Farisii dima ni Saddusidima maa nɔya daa wɔliya, ka la'aŋŋu maa purigi buyi.

⁸ Nangbankpeemni wa gbinni nyɛ la nŋɔa: Saddusidima daa yɛtti, ni, ninvugseeba ban kpi la ku laa n‑yisigi, bee, n‑neaai kum ni; ni siisi ni malaakadima yɛla pa la yɛlimaŋni: Farisii dima mun daa sakkri n‑tiri kum yisigri, ni siisi ni malaakadima yɛla zaa.

⁹ Ka dinzugu vuuri pam daa doaaya, ka seeba ban daa nyɛ zaaligu karimbadima ka bɛ la Farisii dima ya'ari la daa yi paalu na n‑yɛtti, ni, “Ti bu nya doo wa taaliseaa; di bu ya'ai malaaka bee siiya n tɔ'asi n‑ti u maa.”

¹⁰ Sugyeaa maa daa paasiri ni, ka dabeem daa gbaai langyima kpeema maa, ni, ba nin bu Pɔla n‑toosi u; ka dizugu u daa yɛli u langyimadima maa, ni, ba kpeem na n‑gbaai Pɔla n‑yiisi n‑yi daadam maa sunsukkuni, ka mari u n‑labi n‑kyaŋŋi Baarikyi yiri ni.

¹¹ Tɔ; ka dirindaari maa, yuŋŋu, ka ti Dugma daa zaŋŋi u maŋŋa n‑wulisi Pɔla, ka yɛli, “Mari i dablim maa! Nyin pun tɔ'asi n yɛla suŋŋa Gyɛrusalɛm timpuuni seem la, lala ka i nin laa n‑tɔ'asi Room timpuuni gba.”

¹² Ka beoo ŋɔn daa ti neaai, Yɛhudiyaseeba daa la'am taaba m‑pɔ noori, ni, ba ku di diibu, bee n‑nyu seelli, na'ala ba ti ku Pɔla n‑naai.

¹³ Ban daa la'am m‑pɔ lala noori maa daa gaari niriba pisinaasi.

¹⁴ Tɔ; ka dizugu ba daa kyaŋŋi Gyeeŋŋu Toondaana ni kpamma maa saani nti yɛli, “Tirima la'am taaba m‑pɔ noori, ni, ti ku laa n‑lam diibu, na'ala ti ku la Pɔla.

¹⁵ Tɔ, ka dinŋɔna see ka yarima ni kpamma maa zaa ti susi langyima kpeema maa, ni, ya ya maali n‑viisi doo maa yɛttɔ'a maa suŋŋa, ka dizugu ba mari u n‑kyɛ ya saani na. Tirima muna nin maali siri ni ti ku u pɔi ka u ti paai kpa na.”

¹⁶ Amaa Pɔla tinzɔpɔ'a bisɔ daa wum ban gbaari seem maa, ka daa kyaŋŋi Baarikyi yiri maa ni, nti kpɛ n‑yɛli Pɔla.

¹⁷ Ka di saha Pɔla daa booli langyima toondaansɔ na nti yɛli u, ni, u zaŋŋma bii wa n‑kpɛ kpeema maa saani, ni, u mari la lahabaseaa ni u ti u.

¹⁸ Ka u daa mari u n‑kpɛ kpeema maa saani n‑yɛli, “Pɔla sɔ ban kpari dansarika duu ni la m booli ma n‑yɛli, ni, m mari na'akyimbila wa n‑kyɛ i saani na, ni, u mari la bunseelli ni u yɛli i.”

¹⁹ Ka langyima kpeema maa daa gbaai bii maa nuu n‑kyɛ ka ba labi kpaŋŋa sa, ka boosi u, ni, “Bumbɔ ka i mari ni i yɛli ma?”

²⁰ Ka u daa yɛli, “Yɛhudiyadima maa gbaari la gbaari, ni, ba yɛlim i, ni, i sa nin zaŋŋi Pɔla beoo asuba m‑mari u n‑kyaŋŋi ba kpamma la'aŋŋu maa ni, ni, ba ya maali n‑viisi la u yɛttɔ'a maa suŋŋa.

²¹ Di wum n‑ti ba! Dama baseeba nin ti gu u soori zugu - ba gaari ninvugpisinaasi. Ba sa pɔ la noori, ni, ba ku ti di diibu, bee n‑nyu seelli, na'ala ba ku la Pɔla n‑naai. Ba pun sɛ'asi, ka kur guusiri la din ya yi i saani na.”

²² Ka kpeema maa daa kpamsi u, ni, u di kyɛ ka sɔ baŋŋi, ni, u pun yɛli u lala lahabaari maa, ka basi u ka u bakki.

²³ Di nyaaŋŋa ka langyima kpeema maa daa booli u toondaandima ayi na nti ti zaali ba noori, ni, “Ya sɛ'asim langyima kɔbsiyi, ni wuribaariba pisiyɔpɔi, ni kpana dima kɔbsiyi m‑paasi, ni ba maali siri n‑kyaŋŋi Sizariiya zuna yuŋŋu wa, sahanseaa din yi ti zibi suŋŋa.

²⁴ Ka bɔ bumbaarigu n‑ti Pɔla gba, ka u ba, ka ti taasi u Gɔmna Filiksi saani ni alaafɛa.”

²⁵ Ka u daa sɔbi gbaŋŋu n‑ti Gɔmna maa, ni:

²⁶ “Man Klɔdiyusi Lisiyasi n sɔbri gbaŋŋu wa m‑puusiri m Ba Gɔmna Filiksi, sɔ yuuri ŋɔn du tingbaŋŋu maa ni.

²⁷ Doo wa ka Yɛhudiyadima daa gbaai ka daa boori ni ba ku u; amaa n daa baŋŋiya, ni, Room suulinsi nira n nyɛ u, ka daa zaŋŋi n langyinseeba n‑fa u ba saani.

²⁸ N daa boori ni m baŋŋi ban gbaai u seelli zugu, ka n daa zaŋŋi u n‑kyaŋŋi ba kpamma la'aŋŋu ni;

²⁹ ka n ti baŋŋi, ni, galimni maa nyɛ la seelli din yiiri ba zaaligu yɛla ni na, amaa ba daa bu wulisi u kum taalli ŋɔn nyɛ seem, halli dansarika taalli gba.

³⁰ Di nyaaŋŋa ka n daa wum lahabaari, ni, ba ya sɔ'ai n‑niŋi la doo maa yɛttɔ'abeoo, ka dizugu n kyɛ ka ba taasi u i saani na. Ban galimni u maa muna - n yɛli ba, ni, ba mari ba yɛttɔ'a maa m‑paai i saani na.”

³¹ Tɔ; ka langyimadima maa daa tum hoo ŋɔn yɛli ba seem maa, ka mari Pɔla n‑kyaŋŋi yuŋŋu maa, halli nti paai Antipatirisi.

³² Ka beoo ŋɔn daa kaai maa, ban daa kyɛnni nɔba la daa ŋmaligi n‑labi ba Baarikyi ni, ka kyɛ ka wuribaariba maa mari Pɔla, halli nti paai ba kyɛnni maa tɔriga.

³³ Ba daa paai la Sizariiya n‑zaŋŋi gbaŋŋu maa n‑ti Gɔmna maa, ka daa zaŋŋi Pɔla gba n‑niŋi u nuu ni.

³⁴ Tɔ, ka Gɔmna maa daa karim gbaŋŋu maa, ka boosi Pɔla ŋɔn yi tingbanseaa na, ka baŋŋi, ni, Silisiiya;

³⁵ ka u yɛli u, ni, “Ban n galimni i maa yi ti paai na, n nin wum i yɛttɔ'a maa.” Ka u daa kyɛ ka ba zaŋŋi u n‑kpeesi NaaHɛroodi naam yiri kurigu ni duseaa n‑guri u.