TUUMUDIMA TUMA 22 - Mampruli

¹ “M Badima, ya wumma! M mabiisi, ya wumma! N ya tɔ'asi n‑wulisi n yɛla yɛlimaŋni ŋɔn nyɛ seem.”

² Tɔ, ka ban daa ti wum ka u tɔ'asiri ba maŋtoori yɛttɔ'a n‑tiri ba maa, ba daa kyɛ ba vuuri ka fɔ surimm. Ka Pɔla daa gbaai yɛttɔ'a n‑yɛli ba, ni,

³ “N nyɛ la Yɛhudiyadoowa, ka ba daa dɔ'ai ma Taasusi, Silisii tingbaŋŋu ni; amaa Gyɛrusalɛm wa ka ba daa mari ma ka n zoaai na. Kpa wa ka n karimba Gameeliyɛli daa wulisi ma; n daa bamsi ti yaadima yɛla zaa ni nimbirimoaa, ka n daa zaŋŋi m maŋŋa n‑ti Naawunni hoo yarim ban la'am la kpa zuna wa ŋɔn zaŋŋi ya mansi n‑tiri u seem la.

⁴ Man daa namsiri la ninvugseeba ban dɔli Yisa soori wa, halli nti ku baseeba. N daa gbaasi ba, dɔppa ni pɔ'aba, n‑zaŋŋi ba n‑niŋi dansarika duu ni.

⁵ Ya yi ti boosi ya Gyeeŋŋu Toondaana maa, ni kpamma la'aŋŋu dima zaa, ba nin sakki, ni, n daa niŋi lala. Halli ka ba mammansi daa sɔbi gbana n‑ti ma, ni, m mari n‑kyaŋŋi n‑tisi ti mabiseeba ban daa bɛ Damasikusi tiŋŋa la, ni, n gbaam Yisa niriba maa n‑zi n‑kyɛ Gyɛrusalɛm na, ka ba darigi ba tubri.”

⁶ Ni, “Man ŋɔn daa ti wa bɛni maa ka daa ti pɔtti tiŋŋa maa ni, wuntaŋŋa agbaa saha, neesim pam daa nyakki n‑yi saazugu na n‑gyiligi ma.

⁷ N daa lu la tiŋŋa, ka wum ka kukɔri tɔ'asiri n‑tiri ma, ni, ‘Sɔla, Sɔla, bɔ zugu ka i namsiri ma?’

⁸ Ka n daa boosi n‑yɛli, ‘Ŋɔni nla, n dugma?’, ka u labsi n‑yɛli ma, ni, ‘Mani Yisa, Nazarɛti nira la: mani ka i namsiri maa.’

⁹ Ninvugseeba ban daa dɔli ma maa daa nya neesim maa, amaa ba daa bu wum kukɔri maa ŋɔn tɔ'asi ma seem.

¹⁰ Ka n daa gyɛrigi n‑yɛli, ‘Ka dinŋɔna, n Dugma, n niŋma wula?’; ka u yɛli, ‘Doaam saazugu n‑kyaŋŋi nti paai Damasikusi. Ba nin ti yɛli i man pun gbaai, ni, i niŋi seem.’

¹¹ N daa zoomiya, neesim ŋɔn daa neaai pampam la zugu, ka n nyaandɔliba maa daa dari ma n‑kyaŋŋi nti paai Damasikusi.

¹² Di saha ka Ananayasi daa kyɛ n saani na - bɛni dɔsɔ ŋɔn daa dɔli Naawunni zaaligu ni nimmoaa nla, ka tiŋŋa maa Yɛhudiyadima zaa daa tiri u gyirima.

¹³ U daa kpɛ na n‑zaani n‑tabli ma, ka yɛli, ‘M mabii Sɔla, neaam i nini n‑nyara!’ Di saha maa n daa neaai n nini n‑wukki n‑gɔsi u.

¹⁴ Di saha ka u daa yɛli ma, ni, ‘Naawunni, sɔ ti yaadima maa ŋɔn daa gyeemni la - ŋɔn Naawunni n yiisi i, ni i ti baŋŋi ŋɔn boori seem, ka laa n‑zaŋŋi u Yɛlimaŋni Daana n‑wulisi i, ka kyɛ ka i wum yɛttɔ'a u mammaŋŋa noori ni.

¹⁵ U daa niŋi lala, ni i ti niŋi sɛhara daana n‑tɔ'asiri n‑tiri sɔkam zaa nyin nya ka wum bunseesi zaa yɛla.

¹⁶ Dinŋɔna bɔ zugu ka i laa n‑guusira? Doaam saazugu nti su Naawunni koom: boolim u yuuri ka u peaai i tumbeeri da'ari zaa m‑basi.’ ”

¹⁷ Ka u daa laa n‑yɛli ba, ni, “Tɔ; ka di nyaaŋŋa n daa labi la Gyɛrusalɛm na, nti kpɛ Gyeeŋŋu Yiri maa ni, ni n ti puusi Naawunni. Ka man daa puusiri sahanseaa maa, di daa niŋi ma hoo man zaasiri ni;

¹⁸ ka n daa nya, ka Naawunni daa tɔ'asiri n‑tiri ma, ni, ‘Doaam yooma n‑yi Gyɛrusalɛm tiŋŋa wa ni, dama kpa wa niriba ku sakki n‑niŋi i yɛttɔ'a zaŋŋi n‑kyaŋŋi n yɛla maa yɛdda.’

¹⁹ Ka n daa labsi n‑yɛli u, ‘N Dugma, ba mi halli, ni, n daa kpeeri la'aŋŋu duri ni n‑gbaasiri ninvugseeba ban niŋi i yɛdda maa, ka kpatti ba duu ni ka buuri ba.

²⁰ M‑paasi, ba mi, ni, ban daa ku i sɛharadaana Sitiivin sahanseaa la, ni, n daa bɛ bɛni n‑kpamsiri ba ka guri ba neema.’

²¹ Amaa u daa yɛli ma, ni, ‘Kur kyɛma! Dama n nin tum i, halli ban pa Yɛhudiyadima maa saani.’ ”

²² Tɔ; ka zama maa daa kur wumsiri la Pɔla noori, halli ka u ti yɛli lala maa; amaa di saha ka ba daa gbaai tasibu n‑yɛtti, ni, “Ya mari u n‑kyaŋŋi! N‑ku u gba! Lala nira bu sumsi ni duniya wa beebu!”

²³ Ba daa damni la ba mansi, n‑gba'atiri ba neema, ka yeenni tanni.

²⁴ Ka dizugu langyima kpeema maa daa yɛli u niriba, ni, ba mari Pɔla n‑kpɛ ba Baarikyi yiri nti boosi u boosa ka feebi u, ni ba ti baŋŋi daliiriseaa din kyɛ ka Yɛhudiyadima maa zeesiri ba mansi n‑niŋi u lala.

²⁵ Amaa ban daa loori u feebgu zii maa ni sahanseaa la, u daa tɔ'asi n‑ti ba toondaansɔ ŋɔn daa zɛ bɛni maa, ni, “Ammi, ya nin zaŋŋi Room suulinsi nira n‑feebi? Halli ka bu kari u yɛttɔ'a maa sariya m‑baŋŋi u taalli - di mari soori?”

²⁶ Ka toondaana maa ŋɔn daa ti wum lala maa, u daa kyaŋŋi langyima kpeema maa saani nti boosi u, ni, “Bɔ ka i ya n‑niŋi? Doo maa nyɛ la Room suulinsi nira!”

²⁷ Ka kpeema maa daa kyaŋŋi Pɔla saani nti boosi u n‑yɛli, “Room suulinsi nira n siri nyɛ i?”; ka u labsi n‑yɛli u ni, “Ii!”

²⁸ Ka kpeema maa yɛli u, “Man daa yɔ la ligri pam ka naayi deaai lala suulinsi beebu maa.”; ka Pɔla labsi n‑yɛli u, ni “Man muna - ba daa dɔ'ai ma la lala suulinsi ni.”

²⁹ Dinzugu langyinseeba ban ya boosi u boosa la daa labi ba nyaaŋŋa, ka dabeem daa gbaai ba kpeema maa, dama u daa pun lɔ doo maa, ka naayi baŋŋi, ni, Room suulinsi nira n nyɛ u.

³⁰ Tɔ; ka langyima kpeema maa daa kpalim m‑boori ni u baŋŋi yɛttɔ'a maa yɛlimaŋni ŋɔn nyɛ seem, ni wula zugu ka Yɛhudiyadima daa ya galimni u. Ka dizugu beoo ŋɔn daa ti neaai u daa yiisi Pɔla na, ka zaali noori, ni, gyeeŋŋu toondaandima la'asima ni kpamma zaa, ka kyɛ ka Pɔla kpɛ na n‑zaani ba tooni.