TUUMUDIMA TUMA 19 - Mampruli

¹ Tɔ; ka Apɔloosi ŋɔn daa bɛ Kɔrinti tiŋŋa la, Pɔla daa dɔli sɔseaa kan daa du tingbaŋŋu puuni la, nti paai Ɛfɛsusi na. Bɛni ka u daa paai Yisa nyaandɔliseeba,

² ka daa boosi ba, ni, “Ammi, ya daa deaai Sii Kasi maa, yan daa niŋi yɛdda sahaseaa la?” Ka ba daa labsi n‑yɛli u, ni, “Ay! - ti na zi n‑wum Sii Kasi yɛla.”

³ Ka u daa boosi ba n‑yɛli, “Ka Naawunni kɔsuubu bɔ ka ya daa deaai?” Ka ba daa labsi n‑yɛli u, ni, “Gyɔni kɔsuubu.”

⁴ Pɔla daa yɛliya, ni, “Gyɔni kɔsuubu gbinni n daa nyɛ la: ni, ninvugsɔ yi takki u beebu n‑kyɛ tumbeeri tuma zaa ka ŋmaligi n‑teesi teesisuma; amaa Gyɔni mammaŋŋa daa yɛli niriba maa, ni, ba niŋma yɛdda nti ninvugsɔ ŋɔn nin dɔli u nyaaŋŋa la, ka ŋɔna n nyɛ Yisa.”

⁵ Ka ban daa ti wum dinŋɔa, ba daa su Naawunni koom maa, ti Dugma Yisa yuuri ni.

⁶ Ka Pɔla daa zaŋŋi u nuusi m‑pa ba zugri, ka Naawunni Sii maa daa paali ba na, ka ba daa tɔ'asi yɛttɔ'azuna balibubalibu, ni anabitiri yɛla.

⁷ Ba zaa daa nyɛ la kaman dɔppa piiya ni ayi.

⁸ Pɔla daa kpalim m‑bɛ bɛni halli gɔya ata saha, ka daa kpeeri la'aŋŋu duu maa ni n‑tɔ'asiri ni sufukpeemni zaŋŋi n‑kyaŋŋi Naawunni naam beebu, ni u ti kyɛ ka ba sakki u yɛla maa.

⁹ Amaa baseeba mun daa mari la zugkpeeŋŋu, ka daa za'asiri yɛdda niŋbu ka sa'amni Yisa soori maa yɛla paalu ni. Dizugu ka Pɔla daa kyɛ ba, ka daa zaŋŋi baseeba ban daa dɔli Yisa nyaaŋŋa maa n‑wɔligi n‑yi ba saani. Ka beoo kam ba daa kpeeri Tiranusi kariŋŋu duu la ni, n‑tɔ'asiri ka diri azama zaŋŋi n‑kyaŋŋi Yisa yɛla.

¹⁰ Ba daa niŋni nŋɔa, halli yuuma ayi, ka Ɛseaa tingbaŋŋu dima zaa, Yɛhudiyadima ni Griika dima gba, daa ti wum ti Dugma yɛligu maa.

¹¹ Lala saha maa ka Naawunni daa kyɛ ka Pɔla daa tumni alahazibu tunkara pam.

¹² Ba daa zaŋŋi kpakyeesa ni antikyidima an daa siisi u, n‑zi n‑kyaŋŋi n‑ti baaridima ka ba nya alaafɛa, ka arizimbeeri daa zɔ ka kyɛ ba.

¹³ Yɛhudiyadimseeba ban daa gyinni n‑katti arizimbeeri n‑yiisiri niriba ni maa daa mɔya ni ba zaŋŋi Yisa yuuri n‑katti ba. Ba daa yi yɛnni, ni, “Yisa sɔ Pɔla ŋɔn moonni u yɛla la - ŋɔna yuuri zugu ka n yɛli, ni, i yim na!”

¹⁴ Ba sunsukkuni seeba n daa nyɛ Yɛhudiyabiisi ayɔpɔi, seeba ban daa nyɛ Sikyiiva - gyeeŋŋu toondaansɔ - biisi.

¹⁵ Amaa arizimbeoo maa daa labsi n‑yɛli, “M mi Yisa, ka mi Pɔla gba, amaa bandima n nyɛ yarima?”

¹⁶ Ka dɔsɔ arizinni ŋɔn daa bɛ u ni maa daa gbaai ba ni n‑nyaŋŋi ba zaa ka pa ba dansi, ka ba naayi zɔ n‑yi yiri maa ni n‑kyaŋŋi yɔri hoo ban daa dɔ'ai ba seem.

¹⁷ Ka Yɛhudiyadima ni Griika dima ban daa bɛ Ɛfɛsusi la zaa ŋɔn daa ti wum lahabaari kanŋɔa, dabeem daa gbaai ba, ka ba daa tisi ti Dugma Yisa yuuri gyirima pam.

¹⁸ Ka di saha ka niriba pam ban daa niŋi yɛdda daa kyɛ na n‑yɛli ba taalli ni ba tumbeeri yɛla paalu ni.

¹⁹ Halli baseeba ban daa tumni tibeeri tuma, ni ba'akɔligu dima gba, daa la'asi ba tiima gbana n‑nyoaai a bugum zama maa tooni. Ban daa kaali m‑baŋŋi lala gbana maa laasaabu ligri maa, ba nya ka a zaa la'am n‑zoaai pam, hoo ba tiŋŋa anzulifa la'aseesi tusa pisinu.

²⁰ Lala daa kyɛ ka Naawunni yɛligu maa daa kyɛnni tooni m‑paari niriba pam, ka mari yiiko.

²¹ Dinŋɔ zaa nyaaŋŋa ka Pɔla daa gbaai kyɛnni, ni u ti dɔli Masidoonya ni Akaaya tingbana, ka gaari halli nti paai Gyɛrusalɛm. Ni, “N yi kyaŋŋi n kyɛnni wa n‑naai, see ka n kyaŋŋi Room tiŋŋa gba.”

²² U daa kpalim Ɛseaa tingbaŋŋu n‑yuui beela m‑paasi, ka daa tum u suŋŋniba ayi - Timɔti ni Ɛrasitusi - ni ba daŋŋi u tooni n‑kyaŋŋi Masidoonya.

²³ Tɔ; ka zaŋŋi n‑kyaŋŋi lala saha maa ka daaŋŋu pam daa doaai niriba maa ni, Yisa soori maa zugu.

²⁴ Anzulifa mankyeerisɔ n daa bɛ ni, ka u yuuri boonni Dimitiriyusi la. U daa maanni buga gyeeŋŋu neema n‑tiri ba bugseaa kan yuuri boonni Atɛmisa la, ka daa ŋmanni la pɔ'a. Ka lala tuma zugu ka anzulifa tuma baŋŋniba daa ti nya ligri pam.

²⁵ Tɔ, ka ŋɔna Dimitiriyusi daa booli baseeba zaa ban daa tumni lala tuma taabu maa, ni, ba la'amma na, ka yɛli ba, “N zɔdima! ya mi halli, ni, ti nyari arizikki pam ti tuma wa zugu.

²⁶ Ka ya nyari ka wumni doo wa, Pɔla, yɛla: u tɔ'asiri n‑nyaŋŋi niriba pam Ɛfɛsusi tiŋŋa wa puuni, ni Ɛseaa tingbaŋŋu zaa. U yɛtti, ni, ninsaala ŋɔn maali wunseesi pa la Naawunni ni yɛlimaŋni, ka ba sakkri lala n‑ti u.

²⁷ Dizugu di pa seem ni ti tuma wa nin ti kɔŋŋi ka yusuŋŋu; ka din paasi lala zugu, ti gyeeŋŋu duu maa, ni ti bugri tibsigu daana Atɛmisa sɔ ŋɔn bɛ ka puuni la gba nin ti kɔŋŋi gyirima. Pampaŋŋɔ ka Ɛseaa dima zaa - halli duniya wa dima zaa gba - gyeemni u ni. Amaa di zaa yɔri, ba nin ti tam u yɛla, Pɔla yɛttɔ'a zugu!”

²⁸ Ban daa wum dinŋɔa, ba sufu daa yisigiya, ka ba daa piili n‑tasiri pampam, ni, “Ɛfɛsusi dima bugri! Atɛmisa, yiiko daana!”

²⁹ Ka di daa bu yuui ka tiŋŋa maa zaa daa damni n‑vuura. Niriba maa daa gbaai Gayusi ni Arisitaakusi, baseeba ban daa dɔli Pɔla n‑yi Masidoonya ni na la, ka daa vaai n‑guui hoo ninvugyinni nti paai deema ziiya n‑kpɛ bɛni.

³⁰ Pɔla daa boori la u yi daadam maa tooni na, amaa u karimbiisi daa bu ti u soori.

³¹ Halli bɛni tinkpamma maa seeba gba ban daa di Pɔla zoori daa tum u saani na n‑susiri u, ni, u di kpɛ deema zii maa ni.

³² La'aŋŋu maa daa mari la nangbanwala. Seeba n daa tasiri la yɛlli yinni, ka seeba mun tasiri yɛliseaa. Ka niriba maa pam daa bu mi la'aŋŋu wa gbinni ŋɔn bɛ seem.

³³ Yɛhudiyadima maa mun daa kyɛ ka Alɛkzanda kyaŋŋi tooni, ka zama maa puuni ninvugseeba daa tasiri n‑yɛtti u ŋɔn nin niŋi seem. U daa zaŋŋi u nuusi n‑wulisi ba, ni, ba kyɛli ba vuuri ka u tɔ'asi n‑wulisi ba ŋɔn ni u taaba ŋɔn ka taalli seem.

³⁴ Amaa ban daa ti baŋŋi, ni, u nyɛ la Yɛhudiya nira, ba zaa daa la'am n‑tasiri, ni, “Ɛfɛsusi dima bugri! Atɛmisa, yiiko daana!”; ka kpalim n‑tasiri lala halli nti yuui hoo hawa ayi saha.

³⁵ Di nyaaŋŋa ka tiŋŋa maa Sakatiri daa naayi kyɛ ka ba sini ba vuuri, ka yɛli, ni, “Ya Ɛfɛsusi dima, wumma! Ɛfɛsusi tiŋŋa wa puuni ka ti guri la Atɛmisa yiikodaana, ni u gyeeŋŋu duu maa, ni u ba'akugri kan daa yi arizana n‑sigi na la. Duniya wa zaa puuni, ninvugsɔ m bɛ ni ŋɔn bu baŋŋi lala? Ay! - sɔ ka ni.

³⁶ Tɔ, ka dinŋɔ zugu, yɛla anŋɔ zɛya ka sɔ ku toaai n‑kyiisi a wa; di bu sum ni ya fɔ surimm? - ka ku gyigi n‑niŋi seelli.

³⁷ Ya zi niriba wa n‑kyɛ kpa na, amaa ba bu zuuri gyeeŋŋu duri neema, ba mun bu tuuri ka galimni ti bugri maa.

³⁸ Tɔ, ka dizugu Dimitiriyusi ni u tuntuntaaba yi nya la taaliseaa sɔ zaa saani, kootudima m bɛ ni, ni gɔmnadima gba bɛ ni: ba nin toaai n‑galim lala nira ba saani.

³⁹ Di yi ti nyɛ la yɛttɔ'aseaa m‑paasi ka ya boori ya yiisi paalu, di sumsi ni ya mari ka na tiŋŋa maa la'aŋŋu dabsisuŋŋu maa daari.

⁴⁰ Din nyɛ seem maa, di bu ya'ai ni ba zaŋŋi ti yɛttɔ'a n‑kyaŋŋi n‑galim ti, zuna daaŋŋu yɛla maa zugu. Di yi ti bɛ lala, ti ku toaai n‑wulisi din taasi zuna yɛttɔ'a maa na, dama daliiri suŋŋu din taasi ka na ka ni.”

⁴¹ Ŋɔn daa yɛli nŋɔ n‑naai, u daa kyɛ ka zama maa doaai n‑wurigi n‑kuli.