TUUMUDIMA TUMA 18 - Mampruli

¹ Dinŋɔ nyaaŋŋa ka Pɔla daa yi Ateensi n‑kyaŋŋi nti paai Kɔrinti tiŋŋa.

² U daa nya Yɛhudiyadɔsɔ bɛni ŋɔn yuuri daa boonni Akwila la, ka u nyɛ la Pɔntusi tingbaŋŋu nira, ŋɔn ni u pɔ'a Prisila. Ba daa pun yi la Italii tingbaŋŋu ni na, NaaKlɔdiyusi ŋɔn daa kari Yɛhudiyadima zaa ni ba yi ni Room tiŋŋa la zugu. Pɔla daa kyaŋŋi nti kaai ba,

³ ka naayi kpɛ ba yiri nti gbɛa; ka ŋɔn ni ban la'am n‑tumna, dama ba zaa daa seeri la gbana ni tantidima.

⁴ Vuusim Dabsiri zaa u daa kpeeri la Yɛhudiyadima la'aŋŋu duu nti diri azama n‑tiri Yɛhudiyadima ni Griika dima zaa, m‑boori ni ba sakki n‑deaai yɛligu maa.

⁵ Tɔ; ka Sailasi ni Timɔti ŋɔn daa yi Masidoonya tingbaŋŋu na, Pɔla nini daa moaai la Naawunni yɛligu yɛla ni kɔkɔa, n‑wulisiri Yɛhudiyadima maa, ni, Yisa n siri nyɛ Naawunni ŋɔn tum sɔ na ni u ti di Masiiya la.

⁶ Amaa Yɛhudiyadima maa ŋɔn daa kyiisi u, ka tuuri u maa, u daa pisigi u sutura n‑wulisi ba, ni, u za'asiri ba yɛla, ka yɛli “Tɔ, ka dizugu ya yi ti kpi, ya yɛla kpalim m‑bɛ ya mammaŋŋa zugu ni. Man yiisi n nuu zaŋŋi n‑kyaŋŋi din sumsi ni n tum seem n‑ti yarima maa ni. Pampaŋŋɔ zaŋŋi n‑kyɛnna n ya n‑kyaŋŋi la ban pa Yɛhudiyadima saani.”

⁷ Ka u daa gaari n‑kyaŋŋi nti kpɛ yiri seaa kan daa pɔri la'aŋŋu duu maa ziiya; yiri maa daana yuuri n daa boonni Titiyusi Gyasitisi, u mun daa nyɛ la ŋɔn dɔli Naawunni soori hoo Yɛhudiyadima maa ŋɔn dɔli seem la.

⁸ Di saha maa Krispusi - la'aŋŋu duu maa kpeema n‑daa la - daa ti niŋi ti Dugma yɛdda, ŋɔn ni u yiri dima zaa. Ka Kɔrinti dima maa pam ban daa wum yɛligu maa daa niŋi Naawunni yɛdda ka ba daa su ba Naawunni koom.

⁹ Di saha maa ka Naawunni daa kyɛ ka Pɔla zaasi zaasimni u yuŋŋu goom puuni, ka daa yɛli u, “Di kyɛ ka dabeem mari i. Kpalimma n‑tɔ'asira, di kyɛ yɛttɔ'a maa!

¹⁰ Dama m bɛ i saani ka sɔ ku toaai n‑zabi n‑sa'am i yɛla. Nyama! - m mari n niriba pam tiŋŋa wa puuni.”

¹¹ Dizugu ka Pɔla daa kpalim m‑bɛ ni, n‑niŋi yuumni ni purigri, n‑wulisiri ba Naawunni yɛttɔ'a maa.

¹² Tɔ: ka di daa niŋi lala ka Galeoo daa di Akaaya tingbaŋŋu Gɔmna. Di saha maa Yɛhudiyadima maa daa la'am n‑zabi Pɔla ka daa zi u n‑kyaŋŋi kootu ni.

¹³ Ka yɛtti, ni, “Doo wa bɛlimni niriba n‑nyaŋŋna, ni, ba dɔli sɔseaa kan pa ti zaaligu soori n‑gyeemni Naawunni.”

¹⁴ Ka Pɔla ŋɔn daa ya n‑tɔ'asi sahanseaa la, Galeoo mun daa yɛli Yɛhudiyadima maa, ni, “Ya yi da galimni u la zaŋŋi n‑kyaŋŋi taalli, bee, tumbeeri niŋbu zugu, di naa m‑mari soori ni n wum n‑ti ya.

¹⁵ Amaa di nyɛ la boosa zaŋŋi n‑kpa noori yɛttɔ'a ni, ni yuya, ni ya zaaligu wa yɛla - ay, ya mammansi maalim a! N ku sakki n‑leebi sarikatta anŋɔ yɛla zugu.”

¹⁶ Ka daa kyɛ ka ba kari ba n‑yiisi kootu duu maa ni.

¹⁷ Ka ba zaa daa tuligi n‑zaŋŋi Sɔsitɛniisi - sɔ ŋɔn daa nyɛ la'aŋŋu duu la kpeema maa - m‑bu u kootu maa tooni. Amaa ka Galeoo ba'a daa ka lala maa ni.

¹⁸ Di nyaaŋŋa ka Pɔla daa kpalim m‑bɛ Kɔrinti n‑niŋi dabsa ayi, ka naayi kyeoosi u mabiisi maa ka daa kyaŋŋi Kyɛnkyiriiya - tinseaa kan zɛ teeku gbiriŋŋu ni nla - nti kpɛ nyariŋŋu ni, n‑du ni u ti kyaŋŋi Siriiya tingbaŋŋu; ka Prisila ni Akwila daa dɔli u n‑kyaŋŋi. Kyɛnkyirii maa ni ka u daa puni u zugu, ŋɔn daa pun pɔ noori la zugu.

¹⁹ Tɔ, ka ba daa kyaŋŋi n‑gaari nti paai Ɛfɛsusi tiŋŋa, ka u daa kyɛ ba bɛni. U mammaŋŋa daa kyaŋŋi nti kpɛ Yɛhudiyadima la'aŋŋu duu maa, ni u ti di azama n‑ti ba.

²⁰ Ba daa susi u, ni, u kpalimma ba saani dabsa beela m‑paasi; amaa u daa bu sakki lala.

²¹ U daa susi soori n‑kyeoosi ba ka yɛli, “Naawunni yi ti ti ma soori, n nin labi na.”, ka naayi bakki ka kyaŋŋi.

²² Ŋɔn daa yi Ɛfɛsusi ni maa, u daa kpɛ nyariŋŋu n‑kyaŋŋi nti paai Sizariiya ka sigi n‑kpɛ tiŋŋa maa puuni ni u ti puusi Naawunni yɛddaniŋniba maa. Ka daa yi bɛni n‑kyaŋŋi Antiyɔkku tiŋŋa.

²³ N‑niŋi dabsa ayi bɛni, ka laa n‑yi tiŋŋa wa ni n‑gaari n‑dɔli tinseesi an bɛ Galɛseaa tingbaŋŋu ni, ni Firigyii tingbaŋŋu, n‑kpamsiri Yisa nyaandɔliba maa zaa.

²⁴ Tɔ: ka dɔsɔ n daa bɛ ni, ka u yuuri boonni Apɔloosi. Yɛhudiyadoo n daa nyɛ u, ka u daa yi Alɛkzandiriya tiŋŋa ni na, ka daa mari yɛm pam, halli nti mi Naawunni Bukku yɛla zaa. Ŋɔna daa ti paai Ɛfɛsusi di saha maa.

²⁵ Ba daa pun wulisi u Naawunni soori, ka u daa tɔ'asiri ni nimmoaa n‑wulisiri Yisa yɛla ŋɔn nyɛ seem maa deede, amaa u daa mi la Gyɔni kɔsuubu kɔkɔa.

²⁶ Ka u daa piili n‑tɔ'asiri ni nimmoaa la'aŋŋu duu maa puuni. Ka Akwila ni Prisila ŋɔn daa ti wum u yɛttɔ'a maa, ba daa booli u ni, ni, u kyam ba saani na, ka daa wulisi u, m‑paasi u Naawunni soori maa yɛla suŋŋasuŋŋa.

²⁷ Di nyaaŋŋa ka Apɔloosi daa boori ni u bakki n‑kyaŋŋi Akaaya tingbaŋŋu maa ni. Ka ti mabiisi daa kpamsi u, ka daa sɔbi gbaŋŋu n‑ti ba mabiseeba ban bɛ bɛni maa, ni, ba kpaŋŋma ba mansi n‑deaai u. Ka ŋɔn daa ti paai bɛni, u daa la'am ni ninvugseeba Naawunni ŋɔn pun kyɛ ka ba niŋi u yɛdda maa, ka daa suŋŋi ba pam.

²⁸ Dama Yɛhudiyadima ŋɔn daa ŋmɛ nangbankpeemni sahanseaa la, u daa zaŋŋi Naawunni Bukku yɛla n‑tɔ'asi n‑nyaŋŋi ba niriba tooni, n‑wulisiri, ni, Naawunni Masiiya maa nyɛ la Yisa.