TUUMUDIMA TUMA 16 - Mampruli

¹ Ka Pɔla daa gɔ n‑gɔ, halli nti paai Dɛribee ni Lisitira tinsi. Bɛni ka Yisa nyaandɔlisɔ daa bɛ ni, ka u yuuri boonni Timɔti. U ma gba daa niŋi Yisa yɛdda, ka mun daa nyɛ Yɛhudiyapɔ'a, amaa u ba daa nyɛ la Griika doowa.

² Di saha maa ka yɛddaniŋniba ban bɛ Lisitira ni Aikoonyum la daa yɛtti, ni, Timɔti nyɛ la ninvugsuŋŋu.

³ Pɔla daa boori ni Timɔti dɔli u ka ba kyaŋŋi. Ka lala zugu u daa guni u. Yɛhudiyadima ban daa bɛ bɛni zugu ka u daa niŋi lala, dama ba zaa baŋŋi, ni, Timɔti ba daa nyɛ la Griika nira.

⁴ Tɔ; ka ba daa dɔli tinsi maa, ka daa yɛli Yisa niriba, ni, ba kpaŋŋma ba mansi n‑sakki zaaliseesi tuumudima ni kpamma ban bɛ Gyɛrusalɛm maa ŋɔn daa zaali n‑ti ba la, ka dɔli a suŋŋasuŋŋa.

⁵ Dizugu ban daa la'amni n‑dɔli Yisa maa daa mari yaa ni yɛdda, ka ba daa zoaari m‑paasiri sahakam.

⁶ Tɔ: ka ba daa gɔ n‑dɔli Firigyii ni Galɛseaa tingbana dama Naawunni Sii Suŋŋu daa bu ti ba soori ni ba tɔ'asiri lahabaari maa Ɛseaa tingbaŋŋu maa ni.

⁷ Lala zugu ba daa dɔli nti paai Misii tingbaŋŋu maa tɔriga. Ba daa yɛnni, ni, ba nin kpɛ Bitinii tingbaŋŋu maa ni, amaa Yisa Siiya daa bu sakki lala n‑ti ba.

⁸ Lala zugu ba daa lɔkki n‑gaari Misiiya nti paai Tirɔ'asi tiŋŋa.

⁹ Di daari yuŋŋu maa Pɔla daa zaasi zaasimni, n‑nya Masidoonya nira ŋɔn zɛya m‑bɛlimni u, ni, “Kyɛm Masidoonya na nti suŋŋi ti!”

¹⁰ Ka Pɔla ŋɔn daa nya zaasimni kanŋɔa zugu, ti daa sɛ'asi ya'abi ni ti yi bɛni n‑kyaŋŋi Masidoonya tingbaŋŋu, dama ti daa teesi, ni, Naawunni n daa booli ti ni ti mooli lahabasuŋŋu maa n‑tisi bɛni niriba maa.

¹¹ Ka dizugu ti daa kpɛ la nyariŋŋu n‑yi Tirɔ'asi n‑du n‑lɔŋŋi m‑paai Samɔtreesi, ka beoo ŋɔn daa ti kaai ti daa gaari m‑paai Niyapɔlisi tiŋŋa.

¹² N‑daa yi bɛni n‑kyaŋŋi m‑paai Filipaai - kana n nyɛ Masidoonya ya'ari wa tinsi toondaana, ka nyɛ la Room dima suulinsi tiŋŋa. Bɛni ka ti daa yuui beela.

¹³ Ka Vuusim Dabsiri daari maa, ti daa yi tiŋŋa maa puuni n‑kyaŋŋi kuliga ya'ari; bɛni ka ti daa teesi, ni, Yɛhudiyadima maa daa la'amni n‑gyeemna. Ti daa zinni bɛni n‑tɔ'asiri n‑tiri pɔ'aseeba ban daa la'am bɛni maa.

¹⁴ Ka pɔ'asɔ daa bɛ bɛni ka u yuuri boonni Liidiya. U daa yi la Tayatayira tiŋŋa ni na, ka daa koosiri kyinkyinsuma an ligri daa zoaai. Pa Yɛhudiyapɔ'a n daa nyɛ u, amaa u daa dɔli Yɛhudiyadima soori n‑gyeemni Naawunni. Naawunni daa kyɛ ka u nini neaai, ka u daa wum Pɔla yɛttɔ'a maa ka sakki.

¹⁵ Ka ŋɔn ni u yiri dima zaa daa deaai Naawunni koom suubu, ka u daa susi ti, ni, ti kyɛm na nti bɛ u yiri. Ni, “Ya yi siri baŋŋi, ni, n nyɛ la yɛdda daana n‑ti ti Dugma, yan kyɛm na.” Ka ŋɔn daa bɛlim ti lala zugu daa kyɛ ka ti sakki lala n‑kyaŋŋi.

¹⁶ Dindahinseaa ka ti daa ti wa puusigu ziiya, ka daa ti tuusi pɔ'asarisɔ ŋɔn daa nyɛ daabri, ka daa mari arizinni ŋɔn daa nyɛ ba'akɔligu dinni ka daa kyɛ ka pɔ'a maa bugri m‑baŋŋni yɛla. Lala tuma zugu ka baseeba ban daa su pɔ'a maa daa nyari ligri pam u bugbu maa ni.

¹⁷ Ka pɔ'a wa daa dɔli Pɔla nyaaŋŋa n‑kaasiri n‑yɛtta, “Niriba wa nyɛ la Naawunni ŋɔn nyɛ yiiko zaa daana la tuntumniba. Ba yɛtti ya la yan nin niŋi seem n‑nya tuliginsim!”

¹⁸ U daa kpalim n‑dɔla, ka daa kur tɔ'asiri lala dabsa pam. U daa ka'ali Pɔla pam, halli ka u daa ŋmaligi n‑yɛli arizinni maa, ni, “Yisa Masiiya yuuri zugu ka n yɛtti i - yim na ka kyɛ u!” Ka arizinni maa daa siri yi na ya'abi.

¹⁹ Tɔ, ka ban daa su pɔ'asariga maa ŋɔn daa ti baŋŋi, ni, ba ku laa n‑toaai n‑nya u bugbu ligri la, ba daa gbaai Pɔla ni Sailasi n‑daai ba n‑kyaŋŋi timpuuni nti niŋi tiŋŋa zuguraandima nuu ni.

²⁰ Ba daa taasi ba sariya karibu ziiya la, ka yɛli, “Niriba wa nyɛ la Yɛhudiyadima, ka mari nangbankpeemni n‑daamni ti tiŋŋa wa yɛla.

²¹ Ba wulisira sɔseesi an bu sumni ni ti wumna, bee, ti dɔla; dama Room niriba n nyɛ ti.”

²² Di saha ka daadam pam daa la'am n‑galimni Pɔla ni Sailasi, ka tiŋŋa maa sariyakattiba daa zaŋŋi ba n‑toaai ba kpari n‑yeaai ka kyɛ ka ba feebi ba daari.

²³ Ka dizugu ba daa bu ba pam, ka zaŋŋi ba n‑niŋi sarika ni; ka yɛli sarikadaana maa, ni, u kparim ba suŋŋa.

²⁴ Ka sarikadaana ŋɔn daa wum lala, u daa deaai ba n‑zaŋŋi n‑niŋi sarika dutoonni la ni, ka ba ba nɔba ni datibsiri.

²⁵ Tɔ; ka yuntasuusi ka Pɔla ni Sailasi daa puusiri Naawunni ka yuumni yuuma n‑tiri u, ka ba dansarikataaba daa wumsira.

²⁶ Di saha ka tiŋŋa maa daa dam, ka dansarika yiri maa daa miimna, halli ni ka nyeeba maa gba. Ka ka duri maa za'anɔya maa daa yoosi, ka ban daa ga ba nɔba kyɔrimidima la zaa daa gaasi n‑lu.

²⁷ Ka dansarikadaana maa ŋɔn daa neaai goom ni n‑nya ka duri maa za'anɔya la zaa daa yoosi, u daa teesi, ni, dansarika dima maa zaa zɔya, ka dizugu u daa foaai u takoobi, ni u ku u maŋŋa.

²⁸ Amaa Pɔla daa tasi pampam n‑yɛli, “Di niŋi i maŋŋa seelli! Ti zaa na bɛ kpa!”

²⁹ Tɔ, ka dansarikadaana maa daa booli, ni, ba mari bugum na, ka daa kpɛ yooma na. U daa zɔri dabeem n‑gyigra, ka gbaani tiŋŋa n‑ti Pɔla ni Sailasi.

³⁰ Ka u daa mari ba n‑yi na; ka boosi ba, ni, “M Badima, n ya n‑niŋi la wula n‑nya tuliginsim?”

³¹ Ka ba daa yɛli u, ni, “Niŋma ti Dugma Yisa yɛdda, ka i nin nya tuliginsim - nyin ni i yiri dima zaa.”

³² Di saha ka ba daa tɔ'asi Naawunni yɛla maa n‑tisi ŋɔn ni u yiri dima maa.

³³ Ka dirindaari maa yuŋŋu ka dansarikadaana maa daa zaŋŋi ba m‑peaai ba nɔra la n‑ti ba, ka ŋɔn ni u yiri dima zaa daa deaai Naawunni koom suubu.

³⁴ Ka daa mari Pɔla ni Sailasi n‑kpɛ u yiri maa na nti ti ba bundirigu ka ba di: ka ŋɔn ni u yiri dima zaa daa mari sufupeelim pam ba Naawunni yɛdda niŋbu zugu.

³⁵ Ka beoo ŋɔn daa ti neaai, tiŋŋa maa zuguraandima daa tum pirinsi na ka yɛli, ni, “Ya yiisim niriba wa m‑basi!”

³⁶ Dizugu dansarikadaana maa daa yɛli lala n‑ti Pɔla, ni, “Zugudaandima maa yɛliya, ni, ti yiisim nyin ni Sailasi m‑basi; dizugu ya kyɛma, ka Naawunni nin paasi ya sufumaasim.”

³⁷ Amaa Pɔla daa labsi n‑yɛli ba, ni, “Halli ba sa bu tɔ'asi ti yɛligu gba amaa ba sa bu ti zama maa tooni, tirima mun nyɛ la Room suulinsi niriba, ka sa zaŋŋi ti n‑kpeesi dansarika ni. Ka zuna ba yi boori la ba sɔ'ai m‑basi ti baalimm, fa! Ti ku sakki, walla! Faasee ka ba mammansi kyɛ na n‑yiisi ti m‑basi.”

³⁸ Tɔ; ka pirinsi maa daa labi nti yɛli lala n‑ti zuguraandima maa. Ka ban daa wum, ni, Pɔla ni Sailasi nyɛ la Room suulinsi niriba la, dabeem daa gbaai ba.

³⁹ Lala zugu ba daa kyɛ na ni ba ti zɔ ba mammantoori sindaani Pɔla dima saani na, ka daa mari ba n‑yi dansarika maa ni na, n‑susi ba, ni, ba yim ba tiŋŋa maa ni.

⁴⁰ Ka ba daa yi dansarika maa na n‑kyaŋŋi Liidiya yiri n‑nya yɛddaniŋniba maa, ka tɔ'asi kpamsigu yɛttɔ'a n‑ti ba pɔi, ka naayi bakki n‑kyaŋŋi.