TUUMUDIMA TUMA 15 - Mampruli

¹ Tɔ. Ninvugseeba daa yi Gyuudii tingbaŋŋu ni n‑kyɛ Antiyɔkku tiŋŋa na. Lala niriba daa wulisiri ninvugseeba ban dɔli Yisa la, ni, see ka ba guni hoo Musa ŋɔn daa zaali seem la; ni, di yi pa lala ba ku toaai n‑nya tuliginsim.

² Ka Pɔla ni Baanabasi daa ŋmɛ ba nangbankpeemni pam yɛttɔ'a wa zugu. Ka dizugu ba daa bɔ niriba m‑paasi Pɔla ni Baanabasi zugu n‑tum ni ba kyaŋŋi Gyɛrusalɛm n‑nya Yisa tuumudima ni kpamma maa, lala yɛttɔ'a maa zugu.

³ Tɔ; ka Yisa nyaandɔliba la'aŋŋu dima ŋɔn daa tum ba maa, ba daa dɔli Fɔnisii ni Samɛrii tingbana n‑tɔ'asiri n‑tiri ba nyaandɔlitaaba n‑wulisiri ba ninvugseeba ban pa Yɛhudiyadima la ŋɔn niŋi tuuba seem maa. Ka di daa niŋi ba nya'asim pam.

⁴ Ka ban daa ti kpɛ Gyɛrusalɛm timpuuni maa, ba daa paai yɛddaniŋniba ni tuumudima ni kpamma saani na. Ka ban daa gyaari ba n‑naai maa, ba daa piili ba yɛttɔ'a n‑yɛli ba Naawunni ŋɔn daa kyɛ ka ba tum seem.

⁵ Amaa Yisa yɛddaniŋniseeba ban daa dɔli Farisii dima soori maa daa doaai n‑zaani n‑tɔ'asi zaŋŋi n‑kyaŋŋi ban pa Yɛhudiyadima maa yɛla. Ba daa yɛli, ni, di sumsi ni ba guni ba, ka kpamsi ba, ni, ba dɔli Musa zaaligu yɛla zaa.

⁶ Tɔ; ka din daa toaai beela, tuumudima ni kpamma maa daa la'am, ni ba ti tɔ'asi lala yɛttɔ'a maa n‑nya a soori ziiya kasi.

⁷ Ka ba daa ti ŋmɛ nangbankpeemni dinŋɔ zugu n‑yuui, ka Piita naayi doaai n‑yɛli ba, ni, “M mabiisi, ya mi halli, ni, mani ka Naawunni daa daŋŋi n‑yiisi, ni n kyɛ ka ban pa Yɛhudiyadima la wum lahabasuŋŋu wa man noori ni ka niŋi yɛdda.

⁸ Ka Naawunni ŋɔn mi din bɛ ninsaala sufu ni la daa wulisi, ni, ba niŋi yɛdda ni yɛlimaŋni; dama u daa ti ba u Sii Kasi hoo ŋɔn daa pun ti ti gba seem la.

⁹ Naawunni bu wulisi, ni, ti bɛ ti kɔkɔ ka kyɛ ba, dama ba gba yɛdda niŋbu zugu ka u kpiisi la ba sufu ni taalli n‑ti ba.

¹⁰ Ka pampaŋŋɔ, bɔ n niŋi ka ya ŋmeeri nangbankpeemni ni Naawunni? - ka zaŋŋi zitibsa n‑ziili ban ya n‑dɔli u la zugu, ziseesi tirima ŋɔn bu nyaŋŋi n‑zi - halli ti yaadima gba daa bu nyaŋŋi.

¹¹ Ay! Amaa tirima niŋni yɛdda, ni, ti Dugma Yisa wurilim tuma zugu ka u kyɛ ka ti nin tuligi, ka lala n nyɛ di n‑tiri ban gba.”

¹² Di saha maa ka daadam maa zaa daa sini vuuri ka wumni Pɔla ni Baanabasi yɛttɔ'a, ka ba daa wulisi ba Naawunni ŋɔn daa kyɛ ka ba tum tunkara ni alahazibu yɛla seem maa, ban pa Yɛhudiyadima la saani.

¹³ Ban daa ti tɔ'asi n‑naai maa, ka Gyeemsi daa tɔ'asi n‑yɛli, ni, “M Mabiisi, ya wumma!

¹⁴ Simiyɔn na pun wulisi ti Naawunni ŋɔn daa daŋŋi n‑yiisi ban pa Yɛhudiyadima ninvugseeba seem, ni ba ti leebi ŋɔn Naawunni niriba.

¹⁵ Ka ŋɔn yɛli seem ni anabidima yɛligu maa dɔli taaba, dama ba daa sɔbi n‑dooli, ni#:-

¹⁶ ‘Nyama! NaaDauda naam suulinsi pun fiilim; Kaman sugri kan wurim n‑lu. Amaa di nyaaŋŋa man Naawunni nin ti labi na Ni n ti laa m‑paasi ka yaasa, Ka maali ka suŋŋa.

¹⁷ Ba nin bɔ ba Dugma ziiya dizugu - Ban kam kpalim nyaaŋŋa maa; Ni tinsi zaasa niriba ban kpeeri n yuuri maasim ni maa. Man Naawunni yɛli lala, ka mun nin niŋi:

¹⁸ Sahaseaa an gaari sa ka ba daa pun baŋŋi lala.’ ”

¹⁹ Ka Gyeemsi daa laa n‑yɛli, ni, “Man teesa nyɛ la nŋɔa: ninvugseeba ban pa Yɛhudiyadima la yi ti niŋi tuuba n‑dɔli Yisa, di bu sumni ni ti daamni ba yɛlimugsa.

²⁰ See ka ti sɔbi gbaŋŋu n‑ti ba, ni, ba di ŋɔbi numda'aseesi ban kɔrigi m‑maanni ba'a ni buga la, bee, a seesi an bu kɔrigi, bee, an na mari ziim; ka ba di tum tumbeeri zaŋŋi n‑kyaŋŋi dɔgoora ni pɔ'agoora yɛla.

²¹ Dama ba daa kur tɔ'asiri Musa yɛla ti yaadima saha halli ni zuna; ba karimni a ni tinsi kam zaa puuni, ka moonni a Vuusim Dabsiri kam, la'aŋŋu duri puuni.”

²² Tɔ; ka ba zaa daa la'am taaba - tuumudima maa, ni kpamma, zaŋŋi n‑kyaŋŋi ban niŋi Yisa yɛdda maa zaa - ka daa gbaai ba gbaari, ni, ba ya n‑yiisi la ba ninvugseeba n‑tum ba Antiyɔkku, ban ni Pɔla ni Baanabasi. Ka dizugu ba daa yiisi la Gyuudasi (ban daa boonni sɔ ‘Baasabasi’ la), ni Sailasi; ban mun daa bɛ la Yisa nyaandɔliba toondaandima sunsukkuni.

²³ Ban ka ba daa tɔlim gbaŋŋu maa, ni#:- “Nnya, tirima, ya mabiseeba ban nyɛ Yisa tuumudima ni kpamma la, m puusiri ya: yaseeba ban nyɛ ti mabiisi, halli ka ya pa la ti Yɛhudiyataaba la, ka bɛ la Antiyɔkku tiŋŋa, zaŋŋi n‑kyaŋŋi Siriiya ni Silisii tingbana la zaa.

²⁴ Ti wumiya, ni, seeba daa yi ti saani m‑paai ya na - tirima mun daa bu tum ba - ka daa daamni ya n‑sa'amni ya sufu ni yɛttɔ'aseesi ban yɛtti maa.

²⁵ Dizugu ka ti la'am taaba n‑sakki n‑gbaai, ni, ti yiisi ninvugseeba n‑tum ya saani na, m‑paasi Pɔla ni Baanabasi zugu. Halli ni Pɔla ni Baanabasi gba nyɛ la ti zɔsuma,

²⁶ ka daa zaŋŋi ba nyɔvuya m‑pa talima ti Dugma Yisa yuuri maa zugu.

²⁷ Dizugu ti tumni la Gyuudasi ni Sailasi ni ba zaŋŋi yɛttɔ'a m‑paasi tin sɔbi seelli wa, n‑wulisiri di gbinni.

²⁸ Tɔ: Naawunni Siiya Vuusim Kasi ŋɔn gbaai n‑zaali seem nŋɔa - ka ti gba sakki lala: ni, ti di daamni ya m‑paasi yɛttɔ'akpana ayi-ata wa#:-

²⁹ ni, ya di ŋɔbi numda'aseesi ban kɔrigi m‑maanni ba'a ni buga la, bee, seesi an bu kɔrigi, bee, an na mari ziim; ya di tum tumbeeri zaŋŋi n‑kyaŋŋi dɔgoora ni pɔ'agoora yɛla ni. Ya yi gbaai ya mansi ka kyɛ anŋɔ maa, ya nin niŋi suŋŋa. Naawunni paasim ya goom.”

³⁰ Tɔ; ka dɔppa maa daa kyaŋŋi m‑paai Antiyɔkku na, ka daa la'asi yɛdda dima maa zaa nti ti ba gbaŋŋu maa.

³¹ Ban daa karim ka maa, di daa niŋi ba sufumaasim ka laa n‑kpamsi ba sufu pam.

³² Gyuudasi ni Sailasi gba daa nyɛ la anabidima, ka ba daa tɔ'asi yɛttɔ'anya'asa pam n‑kpamsiri ba mabiisi maa.

³³ Ban daa niŋi saha beela bɛni, Yisa nyaandɔliba maa daa zaali ba soori, ka taaliseaa ka ni. Ba daa labi n‑kuli ban daa tum ba maa saani.

^34-35 Pɔla ni Baanabasi mun daa kpalim m‑bɛ Antiyɔkku timpuuni, ka ban ni ba taaba pam daa wulisiri Naawunni yɛligu ka moonni lahabasuŋŋu maa.

³⁶ Tɔ. Saha ŋɔn daa ti gaari beela, Pɔla daa yɛli Baanabasi, ni, “Kyɛ ka ti labi n‑kaai tinseesi tin daa pun kyaŋŋi n‑wulisi Naawunni yɛttɔ'a maa, n‑nya ti mabiisi maa ŋɔn bɛ seem.”

³⁷ Ka di saha ka Baanabasi daa boori ni u zaŋŋi Gyɔni, sɔ ŋɔn boonni Maaki la, ka ba kyaŋŋi.

³⁸ Amaa Pɔla daa bu sakki ni ba zaŋŋi u, ŋɔn daa bakki ka kyɛ ba Pamfilii tingbaŋŋu ni maa zugu, ka daa bu laa n‑dɔli ba n‑la'amni n‑tumna.

³⁹ Ka ba daa ŋmɛ nangbankpeemni dizugu, halli ka daa wɔligi ka kyɛ taaba. Ka dinzugu Baanabasi daa zaŋŋi Maaki ka ba kpɛ nyariŋŋu n‑du n‑kyaŋŋi Saapirusi.

⁴⁰ Pɔla mun daa zaŋŋi la Sailasi m‑bakki; nyaandɔliba maa daa zaŋŋi ba n‑niŋi Naawunni nuu ni ka kyeoosi ba.

⁴¹ Ka ba daa dɔli la Siriiya ni Silisiiya n‑kpamsiri ban niŋi yɛdda n‑la'amni n‑gyeemni Yisa maa.