TUUMUDIMA TUMA 12 - Mampruli

¹ Di saha maa ka NaaHɛroodi daa piili n‑gbaari ninvugseeba ban daa la'amni taaba n‑dɔli Yisa soori maa n‑niŋni ba putoo.

² U daa kyɛ ka ba zaŋŋi takoobi n‑ku Gyɔni beeri Gyeemsi la.

³ Ka ŋɔn daa ti nya ka lala niŋi Yɛhudiyadima la nya'asim maa, u daa gbaai Piita gba - dinŋɔ daa niŋi la Yakki-n‑Gaari Kyuu la saha -

⁴ n‑gbaai u n‑kpeesi sarika duu ni. Soogyadima piiya ni ayoobu n daa guri u: ba daa puri ba la banaanaasi, ni ba deaari taaba n‑guri u. Dama Naaba daa yɛnni, ni, Yakki-n‑Gaari Kyuu ŋɔn ti ya n‑gaari la, u nin yiisi u na n‑ti zama maa.

⁵ Dizugu Piita daa kpalim m‑bɛ sarika duu maa ni, amaa Yisa nyaandɔliba daa kur la'amni n‑susiri la Naawunni n‑tiri Piita ni nimbirimoaa.

⁶ Tɔ; ka saha maa ŋɔn daa ti paai, kaman beoo ka Hɛroodi ya yiisi Piita sarika maa ni na n‑ti niriba maa. Ka lala saha maa, yuŋŋu, Piita daa gbisiri ni; ka ba daa zaŋŋi kyɔrimi n‑ga u n‑tabli soogyadima ayiyi u ya'a ayi zaa, ka daa guri u lala. Ka soogyaseeba daa zɛ n‑guri sarika za'anɔroo maa m‑paasi.

⁷ Di saha ka ti Dugma malaaka gbirigi n‑yi bɛni na, ka neesim daa neaai sarika duu maa ni. U daa gbaai Piita bɔkku n‑neaai u, ka yɛli u, “Doaam yooma!” Ka kyɔrimidima maa daa yi Piita nuusi ni n‑lu tiŋŋa.

⁸ Malaaka maa daa yɛli u, ni, “Loom i sɛlooriga yooma ka piri i namna!”, ka u daa niŋi lala. Ka u daa laa n‑yɛli “Zaŋŋma i kparigu n‑yɛ ka dɔli ma!”

⁹ Tɔ, ka Piita daa dɔli u n‑yi duu maa ni, ka bu baŋŋi, ni, malaaka maa yɛla ŋɔn niŋi seem maa zaa nyɛ la yɛlimaŋni; u daa teesi, ni, u zaasiri ni.

¹⁰ Ka ba daa kyaŋŋi n‑yakki soogyadima zaaziisi buyi, nti paai kutti za'anɔseaa kan yiiri timpuuni maa. Ban daa ti paai sahanseaa la, kyɛburu maa daa yoaai ka toori, ka ba daa yi. Ba daa dɔli la sɔroo n‑kyɛnna, ka malaaka maa ti kyɛ Piita m‑basi ka kyaŋŋi.

¹¹ Di saha ka Piita daa ti baŋŋi din daa niŋi, ka yɛli, “M baŋŋiya! Di nyɛ la yɛlimaŋni. Naawunni n siri tum u malaaka ni u kyɛ na n‑tiligi ma NaaHɛroodi nuu ni, ni Yɛhudiyadima ŋɔn yɛli, ni, ban nin niŋi ma seem la ni zaa.”

¹² Ka u teesi m‑baŋŋi, ka kyaŋŋi Mariama yiri, ŋɔn bii daa nyɛ Gyɔni, sɔ ban daa boonni ‘Maaki’ la; bɛni ka niriba pam daa la'am n‑susiri Naawunni.

¹³ Ka ŋɔn daa ti paai bɛni, u daa kpaasi za'anɔri kyɛburu maa, ka boonna; ka pɔ'asarisɔ ŋɔn yuuri daa boonni Rooda daa kyɛ na ni u ti baŋŋi din bɛ ni.

¹⁴ U daa baŋŋi kukɔri maa, ni, Piita n nyɛ u, ka u sufu daa maai pam; halli ka u bu yoaai n‑ti u, amaa u daa zɔ n‑kpɛ nti yɛli ba, ni, Piita zɛ la samanni.

¹⁵ Ka ba daa yɛli u, “Gyɛrigu wa!”, amaa u daa kur tɔ'asiri ni nimmoaa, ni, di nyɛ la yɛlimaŋni. Ka ba daa labsi n‑yɛli u “U malaaka n nyɛ u.”

¹⁶ Di saha maa ka Piita daa kpalim n‑kpaasiri ka boonna, ka ba daa naayi yoaai kyɛburu maa n‑nya u, ka di daa niŋi ba alahazibu.

¹⁷ Ka u daa zaŋŋi u nuu m‑bulisi ba, ni, ba kyɛli ba vuuri, ka tɔ'asi n‑wulisi ba ti Dugma ŋɔn niŋi seem n‑yiisi u sarika ni na. Ka laa n‑yɛli, ni, ba yɛlim dinŋɔ n‑ti Gyeemsi ni ba mabiisi zaa; ka naayi bakki n‑kyaŋŋi seela.

¹⁸ Tɔ; ka beoo ŋɔn daa ti neaai, di daa gyɛri soogyaseeba ban daa guri Piita maa pam, ka ba daa boosiri taaba, ni, Piita bɛ la yani?

¹⁹ Ka NaaHɛroodi daa yɛli, ni, ba yiisim u na, ka ba daa bɔ u zii n‑kɔŋŋi. Ka u daa boosi soogyadima maa boosa, ka tisi noori, ni, ba kuum ba. Di nyaaŋŋa NaaHɛroodi daa yi Gyuudiiya n‑kyaŋŋi Sizariiya nti niŋi dabsa ayi bɛni.

²⁰ Tɔ; ka NaaHɛroodi sufu daa yisigi n‑niŋi Taaya ni Saidoon niriba ka ba daa la'am taaba n‑kyɛ na ni ba ti nya u. Ba daa kur tɔ'asiri n‑tiri Bilasitusi - ŋɔn daa gɔsiri Naaba duu yɛla n‑tiri u la - halli ka u ti sakki ni u nin zɔ ba sindaani Naaba maa saani. Ba tinsi maa ŋɔn daa deaari ba bundira Naa maa tingbana ni la zugu n‑daa la.

²¹ Ba daa zaali yɛttɔ'a maa dabsiri: ka dabsiri maa ŋɔn daa ti paai, NaaHɛroodi daa bɔbi u naam kpariveela ka zinni bimbinni maa zugu, ka tɔ'asi ba yɛttɔ'anya'asa.

²² Ka zama maa daa tasi n‑yɛli, “Haaya! Di pa la ninsaala n tɔ'asiri wa, amaa Naawunni n tɔ'asiri maa!”

²³ Di saha ka Naawunni malaaka daa ŋmɛ Hɛroodi ya'abi n‑dooli, ŋɔn daa bu tiri Naawunni gyirima zugu. U daa poaai n‑yiiri zunzuya, halli nti kpi.

²⁴ Naawunni lahabaari maa daa yɛligiya ni ka mari yaa.

²⁵ Di saha ka Baanabasi ni Sɔla daa tum ba tuma Gyɛrusalɛm timpuuni n‑naai, ka daa labi Antiyɔkku tiŋŋa na. Ka Gyɔni sɔa, ban daa pa yupaa, ni, ‘Maaki’ la, daa dɔli ba n‑kyɛ na.