ROOM DIMA 2 - Mampruli

¹ Tɔ; ka dinŋɔna, n zɔa, i yi zaali zaaligu m‑bugsiri niriba yɛla, i ka sɔseaa nyin nin zaŋŋi n‑wulisi i yɛlimaŋni. Dama yɛttɔ'aseaa zaa ka i ya tɔ'asi n‑galim i taraana, lala yɛttɔ'a maa zugu ka i galimni i mammaŋŋa, nyin ŋɔn bugsiri ba ka na tumni lala tuma maa zugu.

² Ti mun mi, ni, Naawunni ŋɔn katti sariya ka galimni ban tumni lala tuma maa n‑lusiri ba, ni, u sariya karibu wa dɔli la yɛlimaŋni.

³ Dizugu nyin ninsaala kur bugsiri ban tumni lala tuma yɛla hoo sarikatta ka galimni ba, ka nyin gba tumni lala. Ammi, i teesi, ni, i nin nyaŋŋi n‑yi galinsi ni n‑liisi Naawunni sariya karibu di zugu?

⁴ Bee, i bu baŋŋi, ni, Naawunni zɔri i la namboo ni u ti zi i n‑taasiri ziseaa ka i ŋmaligi ka kyɛ i tumbeeri ni i teesibeeri yɛla? Lala zugu ka i zeemni ŋɔn Naawunni nambɔzoaa, ni u veelim, ni u sugru, an galisi n‑tiri i: bee, m ma'ai ni?

⁵ Ay! I tuppuwumni zugu ka i ku sakki n‑ŋmaligi ka kyɛ i yɛlibeeri maa, ka lala ka i la'asiri toom yɛla n‑zaantiri n‑tiri i maŋŋa, zaŋŋi n‑kyaŋŋi Naawunni suuri daari; sahanseaa ka u laa n‑nyɛ la ŋɔn katti sariya ni yɛlimaŋni ka sɔkam zaa nya.

⁶ Di saha maa ka Naawunni nin ti kyɛ ka sɔkam deaai bunseesi an sum ni ŋɔn daa pun tum seem la.

⁷ Baseeba ban kpa n‑tum suŋŋa m‑boori veelim, ni gyirima, ni nyɔvuri din bu sa'amni la ziiya, ban ka Naawunni nin tisi nyɔvuri kan ka tɔriga.

⁸ Ban mun mari halibeoo n‑kur boori ba mansi ka za'asiri yɛlimaŋni ka dɔli yɛlibeeri, ban ka Naawunni sugyeaa nin kpeesi namsigu ni toom ni.

⁹ Nira ŋɔn tumni tumbeeri zaa nin nya wahala ni sufusa'aŋŋu: Izraɛli dima nin daŋŋi tooni n‑nya, ka ban pa Izraɛli dima naayi pa.

¹⁰ Amaa veelim, ni gyirima, ni sufumaasim nin bɛ ni n‑tiri ban niŋni din tuusi: Izraɛli dima nin daŋŋi tooni n‑deaai, ka ban pa Izraɛli dima naayi pa.

¹¹ Dama Naawunni bu wulisiri ninvuggaŋŋsim.

¹² Bankam ka zaaligu maa, ka tumni ala'akyi, ba nin ti baasi yɔri ka zaaligu maa nuu ka di ni; ban mun mari zaaligu maa, ka tumni ala'akyi, ban ka ba nin zaŋŋi zaaligu maa n‑kari ba sariya n‑lusi ba.

¹³ Dama di pa la ban tuba wumni zaaligu maa yɛligu la n nin nya yɛlimaŋni Naawunni saani, amaa ban tumni zaaligu tuma maa ka Naawunni deaai, ni, yɛlimaŋni dima n nyɛ ba.

¹⁴ Yɛlimaŋni, di pa seem ban pa Izraɛli dima la - ban ka Musa zaaligu maa - ba ninvugseeba yi tumni din tu n‑dɔli zaaligu maa soori, ba maŋtoori sufu ni teesisuma zugu: di yi bɛ la lala, halli ni ban ka Musa zaaligu maa zaa, ba siri zaali la zaalimaŋni n‑ti ba mansi.

¹⁵ Dama ba wulisiri, ni, zaaligu maa tunsuma bɛ la ba sufu ni, ka ba sufu yɛm kyɛ ka lala zaaligu yi paalu, ba mammaŋŋa teesa yi diri sɛhara n‑galimni ba tunseesi ka laa n‑sakkri ni aseesi yaasa, ni, ana n tuusi.

¹⁶ Tɔ: anŋɔ zaa nin niŋi la dabsiri seaa Naawunni ŋɔn ya kari saalidima yɛlisɔ'ara sariya la, ka di yi Kirisita Yisa saani na. Lala ka man kur wulisiri niriba, n lahabasuŋŋu mooligu maa ni.

¹⁷ Tɔ, n zɔa, wumma - i yi ti booli i maŋŋa, ni, Izraɛli nira, ka yɛtti, ni, i zaaziiya nyɛ la Naawunni zaaligu yɛla, ka nyuuri bara zaŋŋi n‑kpa i Naawunni saani beesigu ziiya.

¹⁸ Ka laa n‑yɛtti, ni, i mi Naawunni yuubu ŋɔn nyɛ seem, ka sakki n‑ti din veela halli nti yakki zaa, ka pun bamsi zaaligu kariŋŋu n‑naai.

¹⁹ Ka i laa n‑teesi, ni, i nyɛ la ŋɔn datti zoomma, n‑nyɛ neesim n‑ti ban bɛ zibsim ni la;

²⁰ ni, i wulisiri ban kɔŋŋni yɛm; ni, biisi karimba n nyɛ i. I niŋni i mammaŋŋa yɛdda anŋɔ zaa zugu, dama i mari la zaaligu maa, ka yɛm ni yɛlimaŋni zaa gbinni bɛ di ni.

²¹ Tɔ, nyin ŋɔn wulisiri niriba lala maa, i ku wulisi i maŋŋa? Nyin ŋɔn moonni n‑tiri ba, ni, ba di zuura la - i mammaŋŋa zuuri, bee?

²² Nyin yɛtti, ni, niriba di niŋni zina la, i niŋni zina i mammaŋŋa? Ka yɛtti, ni, i bu boori buga yɛla, i zuuri buga duri buna?

²³ Halli i mari la zaaligu maa ka nyuuri bara dizugu, i burigri zaaligu maa ni, m‑boaari Naawunni gyirima?

²⁴ Hoo din sɔbi n‑dooli la, ni, “Yarima zugu ka Naawunni yuuri sa'amni ban pa Izraɛli dima saani.”

²⁵ Zaŋŋi n‑kyaŋŋi gunibu yɛla muna - i yi dɔli zaaligu maa tuma suŋŋa, dinŋɔna ka i gunibu mari la anfaani; amaa i yi burigi zaaligu maa ni, i labgi la hoo ban bu guni sɔ la.

²⁶ Ban bu guni la mun yi dɔli zaaligu maa deede, ba ku nya ba la hoo ban guni maa? Ay! - ba nin nya ba lala.

²⁷ Ŋɔn bu guni ka dɔli zaaligu maa nin galim nyin ŋɔn mari zaaligu gbaŋŋu ka guni ka mun burigi zaaligu maa ni.

²⁸ Dama ŋɔn nyɛ Izraɛli nira la paalu ni kɔkɔa pa la Izraɛli nira halaali; ka gunibu maŋni mun pa la din niŋi ningbina paalu ni kɔkɔa.

²⁹ Ay! U sufu ni ka nira n nyɛ Izraɛli nira halaali, ka gunibu maŋni gba nyɛ la sufu ni yɛttɔ'a. Di yi la Naawunni Sii maa ni na, pa gbana sɔppu saani. Lala nira pɛ'abu bu yiiri la ninsaala saani, amaa Naawunni saani.