MATIYU 27 - Mampruli

¹ Ka beoo ŋɔn daa ti kaai, gyeeŋŋu toondaandima ni tinkpamma maa zaa daa la'asi n‑gbaai gbaari zaŋŋi n‑kyaŋŋi ban nin ku Yisa seem.

² Ka ba daa ba Yisa bansi n‑zaŋŋi u n‑kyaŋŋi n‑niŋi Gɔmna Pailiti nuu ni.

³ Gyuudasi muna, sɔ ŋɔn daa yi Yisa nyaaŋŋa la, ŋɔn daa ti wum, ni, Yisa galinsi maa sum la ni kuubu, u sufu daa sa'amiya; ka u daa ya lugi anzulifa pisita la ni u ti ti Gyeeŋŋu Toondaandima ni kpambaya la.

⁴ Nti yɛli ba, ni, “Man galimiya! Dɔsɔ ŋɔn bu tum taalli ka n zaŋŋi n‑figsi n‑ti ya, ka ba ti yɛ n‑ku u.” Ka ba daa labsi n‑yɛli u, “Ka ti ba'a bɔ m bɛ ni? Ay - nyin yɛttɔ'a maa n kur nyɛ di.”

⁵ Di saha ka Gyuudasi daa zaŋŋi anzulifa ligri maa n‑lɔbi m‑basi Gyeeŋŋu Yiri puuni, ka daa bakki. Ka di nyaaŋŋa u daa kyaŋŋi nti yuli u maŋŋa n‑kpi.

⁶ Ka gyeeŋŋu toondaandima maa daa zaŋŋi ligri maa ka yɛli, “Ligri zaŋŋi n‑kyaŋŋi sɔ kum yɛla nŋɔa: ti mun kaya nin ta'ai, ni, di bu sumsi ni ziim ligri wa taabu ti paasi ti Gyeeŋŋu Yiri wa ligri ni.”

⁷ Ka ba zaa daa la'asi n‑gbaai gbaari, ni, ba zaŋŋma ligri maa n‑da paaluseaa dugmeeriba la ŋɔn daa su la, ni ba ti mari n‑sɔ'ari tinzundima bɛni.

⁸ Lala zugu daa kyɛ ka ba boonni bɛni, ni, ‘Ziim Paalu’, halli ni zuna.

⁹ Di saha di siri daa niŋi hoo Anabi Gyɛrimaaya ŋɔn daa tɔ'asi anabitiri yɛliseelli la, ni#:- “Ba nin zaŋŋi anzulifa pisita la, Izraɛli dima maa ŋɔn daa sakki ni ba yɔ seesi la, Ni, ba baŋŋi, ni, u ligri ŋɔn nyɛ seem nla.”

¹⁰ Ni#:- “Ba zaŋŋi a n‑da dugmeeriba paalu. Ti Dugma ŋɔn daa yɛli ma seem la nla.”

¹¹ Tɔ: ka Yisa daa zaani Gɔmna maa tooni, ka u daa boosi u, ni, “Nyini n nyɛ Izraɛli dima Naaba la?”, ka Yisa daa yɛli u, “Nyin ŋɔn yɛli seem maa n nyɛ di.”

¹² Ka gyeeŋŋu toondaandima ni kpambaya maa ŋɔn daa galimni u la, u daa bu yɛli seelli.

¹³ Di saha ka Pailiti daa yɛli u, ni, “I bu wumni ban galimni i seem wa?”

¹⁴ Ka Yisa daa bu gyɛrigi, halli yɛlli yinni gba, ka di daa gyɛri Gɔmna maa pam.

¹⁵ Tɔ, ka Kyuu saha kaari soori n daa nyɛ di, ni, niriba daa yi wulisi dansarika niriba ninvugsɔ ban boora, ka Gɔmna maa ti yiisi di daama n‑kyɛ u ka u kyaŋŋi.

¹⁶ Tɔ: lala saha maa ka dɔsɔ n daa bɛ sarika maa ni, ka u yuuri boonni Barabasi, ka sɔkam zaa daa mi u yɛla.

¹⁷ Ka daadam ŋɔn daa ti la'am na, Pailiti daa boosi ba, ni, “Ya boori ni n zaŋŋi Barabasi m‑basi ya, bee, Yisa ban boonni sɔ Masiiya, Naaba, la?”

¹⁸ - dama u daa mi halli, ni, nyuuri zugu ka ba daa zaŋŋi Yisa n‑ti u la.

¹⁹ Tɔ: ka Pailiti daa na kur zi la sariya karibu zɔŋŋu maa ni, ka u pɔ'a daa tum u saani na nti ti u lahabaari, ni, “Di niŋi yɛlimaŋni daana wa seelli! Dama n zaasa puuni, yuŋŋu la, ka n sa namsiya pam u yɛttɔ'a zugu.”

²⁰ Di saha ka Gyeeŋŋu Toondaandima ni kpamma maa daa kur tɔ'asiri n‑tiri zama maa n‑kpaasiri ba zugri, ka naayi kyɛ ka ba sakki ni ba ti susi Gɔmna maa, ni, u yiisima Barabasi n‑ti ba na, ka kyɛ ka Yisa baasi yɔri.

²¹ Dizugu Gɔmna maa ŋɔn daa boosi ba, ni, “Niriba ayi wa puuni, ya yiisima yan boori sɔa!”, ba daa labsi n‑yɛli u, ni, “Barabasi ka ti boora!”

²² Ka Pailiti daa laa n‑yɛli ba, ni, “Ka Yisa, ban boonni sɔ Masiiya Naaba la, muna? - Ya boori ni n niŋi u la wula?” Ka ba zaa yɛli, “Kyɛ ka ba kpaasi u n‑tabli dɔpulli zugu!”

²³ Ŋɔn mun daa boosi ba, ni, “Ka taalli bɔ ka u daa tum?” Ka ba daa maali n‑tasi pam n‑yɛtti, ni, “Ba kpaasim u!”

²⁴ Ka Pailiti ŋɔn daa ti nya, ni, u yɛttɔ'a sɛseelli ku toaai m‑maali yɛlli maa, halli u tuma maa zaa yɔri ka niriba maa maali n‑vuuri nti yakki, u daa zaŋŋi koom m‑peaai u nuusi daadam maa tooni. Ni, “Man nuu ka doo wa kuubu ni! Ya tuma nla.”

²⁵ Di saha ka zama maa zaa daa la'am n‑yɛli, “Tɔ! Kyɛ ka u ziim taalli kpalim n‑nyɛ tirima dinni, ni ti biisi la dinni gba!”

²⁶ Di saha ka u daa yiisi Barabasi m‑basi n‑ti ba, ka daa feebi Yisa muna, ka zaŋŋi u n‑tisi ni ba kpaasi u n‑tabli dɔpulli zugu.

²⁷ Gɔmna soogyadima maa daa zaŋŋi Yisa n‑kpɛ Baarikyi maa ni, ka booli ba taaba ni ba la'am na.

²⁸ Ba daa yeaai u neema maa ka daa zaŋŋi naam kparizeoo n‑yeeli u.

²⁹ Ka daa zaŋŋi goosi m‑paam m‑pili u zugu hoo naam zupiliga, ka zaŋŋi kika'ari n‑gbibli u nudirigu hoo naam damni; ka daa gbaantiri u tooni m‑maanni u ansarisi, ni, “Ndana, m Ba Izraɛli Naaba!”

³⁰ Ba daa laa n‑tusi nantoori n‑niŋi u, ka zaŋŋi u kika'ari la n‑kpaasiri u zugu ni.

³¹ Ban daa deem u lala n‑naai ba daa yeaai ba kparigu maa ka labsi u maŋtoori neema n‑yeeli u. Ka daa mari u n‑yi ni ba kyaŋŋi nti kpaasi u.

³² Ka ban daa ti kyɛnni maa, ba daa nya Sairiini tingbaŋŋu dɔsɔ, ka u yuuri boonni Saimoon. Ŋɔna ka ba daa gbaai n‑kyɛ ka u zaŋŋi Yisa dɔpulli daari maa n‑ziiri n‑dɔli Yisa nyaaŋŋa.

³³ Tɔ; ka ban daa ti paai luginseaa kan yuuri boonni ‘Gɔligɔtta’, ka di gbinni nyɛ la “Zuguŋmaaŋŋu Zii la”,

³⁴ ba daa zaŋŋi daam bun gyɛri ni titoori, ni, u nyuuma! Amaa ŋɔn daa lam bu, u daa bu sakki n‑nyu bu.

³⁵ Ka ba daa kpaasi u n‑tabli dɔpulli zugu, ka zaŋŋi ka n‑sa. Di saha ka ba daa puri u sutura n‑tɔri taaba, n‑toori tɛtɛ ni ba ti nya a puribu soori.

³⁶ Di nyaaŋŋa ba daa zinni bɛni ka gɔsiri u ni.

³⁷ Ka ba daa sɔbi bunni n‑galimni u, ka zaŋŋi ka n‑tabli dɔpulli maa saazugu, ni, “Yisa, Yɛhudiyadima Naaba la, nŋɔa.”

³⁸ Di saha maa ka ba daa kpaasi na'ayigsi ayi gba: ka daa sa ba yinni u nudirigu ya'ari, ni ŋɔnla u nuzaa ya'ari.

³⁹ Niriba ban daa gatti daa lɔbri ba zugu ka tuuri Yisa,

⁴⁰ ni, “Ɔhɔ! Nyini n daa yɛnni, ni, i nin daai Gyeeŋŋu Yiri la n‑lusi, ka laa n‑zaŋŋi daba ata m‑mɛ ka la yaasa! Tɔ, ka pampaŋŋɔ, i yi siri nyɛ la Naawunni biiya, nyin sigma dɔpulli maa zugu na n‑fa i maŋŋa m‑basi!”

⁴¹ Lala ka gyeeŋŋu kpamma, ni karimbadima ni tinkpamma maa gba, daa laari Yisa ka yɛtti taaba,

⁴² ni, “U daa faari la niriba m‑basira, amaa ka bu toaai n‑fa u maŋŋa m‑basi! Ni, Izraɛli Naaba n nyɛ u, fa! - tɔ, kyɛ ka u yi dɔpulli maa zugu n‑sigi na ka ti niŋi u yɛdda!”

⁴³ Ka ba daa laa n‑yɛtti, ni, “U niŋi la Naawunni yɛdda, ka yɛli, ni, u nyɛ la Naawunni biiya: tɔ, ka dinŋɔna ŋɔn Naawunni yi siri boori u, ŋɔn faam u m‑basi ka ti nya!”

⁴⁴ Ka na'ayigsi ayi seeba ban daa kpaasi n‑sa Yisa ya'a ayi maa gba daa tuuri u.

⁴⁵ Ka agbaa saha zaŋŋi n‑kyɛnna, tingbaŋŋu maa zaa daa sɔbgi zimm, ka zibsim daa ligi ya'ari kam zaa n‑yuui m‑paai zaanoori hoo kurigu ata saha.

⁴⁶ Di saha maa Yisa daa kaasiya pam, ni, “iIlayi, Ilayi, lima sabakyitani?” - di gbinni n nyɛ ‘N Naawunni, n Naawunni, wula ka i kyɛ ma m‑basi?’

⁴⁷ Niriba ban daa zɛ bɛni maa seeba daa ti wum u yɛttɔ'a maa ka yɛli, ni, “Ya wumma! U boonni la Ilaygya!”

⁴⁸ Di saha ka ba ninvugyinni daa kyaŋŋi nti bɔ sɔ'asu n‑zaŋŋi n‑niŋi damiisiri ni, ka mari na n‑zaŋŋi n‑kusi kika'ari zugu n‑duusi m‑paai Yisa ni u ti nyu.

⁴⁹ Ka banla daa yɛli, ni, “Kyɛla! Kyɛ ka ti nya Ilaygya nin kyɛ na n‑fa u m‑basi, bee?”

⁵⁰ Ka Yisa daa laa n‑tasi pampam ka naayi ti ka ni.

⁵¹ Ka pateesa kan daa ya'ai Gyeeŋŋu Yiri Dutitaari puuni maa daa toaai buyi, ka saazugu zaŋŋi n‑sigri tiŋŋa ni; ka tingbaŋŋu maa daa damni ka tampiisi bɔkki.

⁵² Ka gbala daa yaamna, ka Naawunni niriba kpiimma pam daa doaai na.

⁵³ Ka Yisa ŋɔn daa yisigi kum ni n‑naai, lala kpiimma pam daa yi gbala la ni na n‑kpɛ Naawunni tiŋŋa la timpuuni, ka niriba pam daa nya ba.

⁵⁴ Soogyadima toondaana maa ni u niriba daa guri Yisa; ka ban daa nya tingbaŋŋu ŋɔn daa damni seem maa, dabeem daa gbaai ba pam, ka ba daa yɛli, ni, “Doo wa siri daa nyɛ la Wumbiiya.”

⁵⁵ Ka pɔ'aseeba daa bɛ kpaŋŋa ka gɔsiri na - pɔ'aseeba ban daa dɔli u n‑yi Galilii na ni ba ti suŋŋni u la n daa nyɛ ba.

⁵⁶ Mariama ŋɔn daa yi Magdala na n‑daa la, ni Mariama sɔ ŋɔn daa nyɛ Gyeemsi bila ni Gyoosɛfi ma, ni Zɛbidii pɔ'a gba.

^57-58 Tɔ. Bundaansɔ n daa bɛ ni ŋɔn yuuri daa boonni la Gyoosɛfi: Arimatiiya tiŋŋa nira n daa nyɛ u, ka u daa dɔli la Yisa. Di saha, zaanoori ŋɔn daa ti maai, ŋɔn Gyoosɛfi daa kyaŋŋi m‑paai Gɔmna Pailiti na nti susi u soori ni u kyɛ ka u zaŋŋi Yisa ningbiŋŋu nti sɔ'ai. Ka Pailiti daa yɛli, ni, tɔ, ba zaŋŋma n‑ti u.

⁵⁹ Ka Gyoosɛfi daa deaai ningbiŋŋu maa ka zaŋŋi kasinveelli n‑vili.

⁶⁰ Ka zaŋŋi u n‑niŋi gbalipaali ban kyiibi seaa tampii ni, ka daa bilim kugtitaari n‑ligi ka noori ka naayi bakki.

⁶¹ Mariama, Magdala tiŋŋa pɔ'a la, ni u tɔ'ama, daa zintiri n‑tuusiri tampifeoo gballi la dunoori ni.

⁶² N‑neaai beoo - Vuusim Dabsiri daari maa n‑daa la - ka Gyeeŋŋu Toondaandima daa la'am Gɔmna Pailiti saani na, ban ni Farisidima maa m‑paasi.

⁶³ Nti yɛli u, ni, “Ti wumiya, ziridaana wa ŋɔn daa na bɛ ni maa, ni, u yɛtti, ni, u nin niŋi dabsa ata pɔi ka naayi doaai.

⁶⁴ Tɔ; ka dinŋɔna kyɛ ka soogyadima kyaŋŋi nti guri u tampifeoo gballi maa n‑niŋi dabsa ata la. Dama di pa seem u nyaandɔliba nin zu u n‑yiisi na, ka yɛli niriba, ni, u doaai la kum ni. Di yi bɛ lala, di naari nin niŋi yɔmsigu n‑gaari daŋŋni dinni ŋɔn daa bɛ seem la.”

⁶⁵ Ka Pailiti daa yɛli ba, “Ya mari la ya maŋtoori tɔbbiisi; tɔ - kur kyɛma n‑niŋi yan nin nyaŋŋi seem n‑guri ka suŋŋasuŋŋa.”

⁶⁶ Ka ba daa kyaŋŋi nti guri gballi maa, ka daa zaŋŋi bunni n‑tabli kugbiliŋŋu maa, ka laa n‑zaali tɔbbiisi ni ba gura.