MATIYU 21 - Mampruli

¹ Ka Yisa ŋɔn daa kyɛnni m‑pɔtti Gyɛrusalɛm tiŋŋa maa, u daa paai tinkpanseaa ban boonni Bɛtfeegyi la, kan zɛ Ɔlivii zoori kpaŋŋa. Di saha ka Yisa daa daŋŋi n‑tum u nyaandɔliba ayi ni ba gaari tooni,

² ni, “Ya kyɛm ti tooni nti kpɛ tinkpanseaa kan zɛ ya tooni sa. Bɛni ya nin ti nya bunnyaaŋŋa n‑lɔ n‑zɛya, ni u bumbila u saani; ya lɔrigma ba m‑mari na.

³ Ka sɔ yi ya boosi ya seelli, yan yɛlim u, ni, ya Dugma m boori ba ni, ka mun nin labsi ba na yooma.”

⁴ Dinŋɔ daa niŋiya, ni anabi maa yɛlisim niŋi yɛlimaŋni, ni#:-

⁵ “Ya tɔ'asima n‑ti Zayɔn tiŋŋa wa, Hoo yan nin tɔ'asi n‑ti pɔ'asariga, Ni, ‘Nyama, i Naaba n kyɛnni i saani na wa! U sigsi u maŋŋa baalimm Ka baari buŋŋa, Halli bumbila ka u baara.’ ”

⁶ Tɔ; ka nyaandɔliba ayi maa daa kyaŋŋi nti tum Yisa ŋɔn daa wulisi ba seem la.

⁷ Ban daa mari buŋŋa ni u bii maa na, ba daa zaŋŋi ba kyinkyina m‑pa bunsi maa nyaaŋŋa ka Yisa daa m‑ba n‑kyaŋŋi.

⁸ Daadam ban daa dɔli u maa seeba daa zaŋŋi ba kyinkyina n‑yɛligri soori maa ni, ka seeba mun daa kabi n‑kabi tiisi wula, n‑daa dooli n‑dooli soori maa ni.

⁹ Ninvugseeba ban daa bɛ tooni, ni seeba gba ban daa bɛ nyaaŋŋa n‑dɔli maa daa piili n‑kpalimna n‑yɛtti, ni#:- “Hoosana! Tiliginsim daana! NaaDauda Biiya! Zugsuŋŋu bɛ ni n‑ti ŋɔn zaŋŋi ti Dugma yuuri na! Tiliginsim daana gyirima bɛ la zugsaa!”

¹⁰ Yisa ŋɔn daa ti kpɛ Gyɛrusalɛm timpuuni la, tiŋŋa maa zaa daa damni n‑vuura, ka ba boosiri taaba, ni, “Ŋɔni n‑lee n‑nyɛ u?”

¹¹ Ka ban daa dɔli Yisa la daa labsi n‑yɛli ba, ni, “Anabi Yisa nla: u yi la Nazarɛti na, Galilii tingbaŋŋu maa ni.”

¹² Ka Yisa daa paai Naawunni Gyeeŋŋu Yiri maa nti kpɛ bɛni n‑katti ban daa koosiri ka daari neema Yiri maa puuni la n‑yiisiri ba. Baseeba daa takkri ligri bɛni, ka u daa daai ba teebulidima m‑basi, ni ŋmankoosiriba kugsi m‑paasi.

¹³ Ka yɛli ba, ni, “Di sɔbi n‑zaali, ni, ‘Ba nin booli n Yiri wa, ni, Wunsusigu Yiri.’, amaa ya zaŋŋi ka n‑labgi la ‘ta'ayigsi ŋɔn sɔ'ari seela.’ ”

¹⁴ Zoomma ni kɔnsi daa kyɛ u saani na, Naawunni Gyeeŋŋu Yiri puuni, ka u daa tibi ba.

¹⁵ Ka gyeeŋŋu toondaandima, ni karimbadima maa sufu daa yisigi zaŋŋi n‑kyaŋŋi alahazibu tunseesi Yisa ŋɔn daa tumni la; ni biisi ban daa bɛ Gyeeŋŋu Yiri maa ni n‑tasiri n‑yɛtta, “Hoosana! Tiliginsim daana! NaaDauda Biiya!”

¹⁶ Dinŋɔ zugu ba daa boosi Yisa, ni, “I bu wum ban yɛtti seem wa?” Ka u daa labsi n‑yɛli ba, ni, “Ii, n wumiya. Ammi, ya na bu karim Sɔppu maa yɛla? - ni, ba pɛ'ari Naawunni, ni, ‘Nyin, Naawunni, bamsi la biisi - halli bileesi gba - ni ba tiri pɛ'abu.’ ”

¹⁷ Dinŋɔ nyaaŋŋa ka Yisa daa kyɛ ba m‑bakki n‑yi Gyɛrusalɛm timpuuni n‑kyaŋŋi nti paai Bɛtani tinkpaŋŋa n‑gbɛa.

¹⁸ Beoo ŋɔn daa neaai asusuba, ka Yisa ŋɔn daa kyɛnni n‑labri timpuuni na, kɔm daa ti mari u.

¹⁹ Ka u daa gɔsi n‑nya ka kinkaŋŋa n zɛ sɔkpaŋŋa sa; ka u daa kyaŋŋi m‑paai ka ni, amaa ŋɔn daa ti paai tii maa na, u daa bu nya sɛseelli na'ala vaari kɔkɔa. Ka Yisa daa yɛli kinkaŋŋa maa, ni, “I ku laa n‑wali walli yaasa!” Ka tii maa daa gbirigi n‑kuui di saha maa.

²⁰ Ka u nyaandɔliba maa ŋɔn daa ti nya lala, di daa gyɛri ba pam. Ka ba boosiri n‑yɛtti, “Bɔ n niŋi ka tii maa gbirigi n‑kuui lala yooma?”

²¹ Ka Yisa daa labsi n‑yɛli ba, ni, “Yɛlimaŋni ka n yɛtti ya wa, ni, ya yi mari yɛdda, ka bu birisira, ya nin toaai n‑niŋi man niŋi kinkaŋŋa wa seem. Ka pa dinŋɔ kɔkɔa, amaa halli ya yi ti yɛli zoori wa, ni, ka doaama n‑lɔbi ka maŋŋa m‑basi teeku puuni, di nin niŋi.

²² Ya yi susi Naawunni bunseelli kam zaa, ka niŋi yɛdda, ya nin nya.”

²³ Ka Yisa daa kyaŋŋi Naawunni Gyeeŋŋu Yiri maa, ni u ti wulisiri niriba la. Ka gyeeŋŋu toondaandima daa kyɛ u saani na, ban ni tiŋŋa maa kpamma la, m‑boosi u, ni, “Ŋɔni n ti i soori ni i tum i lala tuma maa, bee, yiiko bɔ ka i mara?”

²⁴ Ka Yisa daa labsi n‑yɛli ba, ni, “N gba ya boosi ya la boosigu yinni. Ya yi yɛli ma pɔi, ka man gba nin naayi labsi ya ya boosigu wa.

²⁵ Tɔ: ŋɔni n daa ti Gyɔni soori ni u suuri niriba Naawunni koom la, bee, u yiiko yi la yani? Di daa yi la Naawunni saani, bee, ninsaalidima saani?” Ka ba daa piili n‑ŋmeeri nangbankpeemni n‑tiri taaba, ni, “Ti ya yɛli la wula? Ti yi yɛli, ni, Naawunni saani, u nin boosi ti, ni, bɔzugu ka ti daa bu niŋi Gyɔni yɛdda?

²⁶ Ka ti yi sakki n‑yɛli, ni, ninsaalidima saani...? - Ay! ti zɔri la niriba, dama sɔkam sakkiya, ni, Gyɔni Kɔsuura daa nyɛ la anabi.”

²⁷ Dizugu ba daa labsi n‑yɛli Yisa, ni, “Ti bu mi.” Ka Yisa daa yɛli ba, ni, “Dinŋɔna n gba ku yɛli ya ŋɔn ti ma soori ni n tumni anŋɔ zaa.”

²⁸ Ka Yisa daa laa n‑yɛli, ni, “Tɔ; ka ya teesiri la wula? - Dɔsɔ n daa bɛ ni m‑mari u bidibsi ayi. Ka u daa kyaŋŋi u bii yinni saani nti yɛli u, ni, ‘Kyɛma nti tum tiisi puu maa tuma zuna.’

²⁹ Ka bii maa daa labsi n‑yɛli, ni, ‘Ay! - N ku kyaŋŋi.’, amaa di nyaaŋŋa u daa laa n‑takki u teesa ka kyaŋŋi.

³⁰ Di saha ka u daa paai u bii ŋɔnla, ka yɛli ŋɔn gba, ni, u kyɛma nti tum, ka ŋɔn mun sakki n‑yɛli, ni, ‘Tɔ, n wumiya.’, amaa u daa bu kyaŋŋi.

³¹ Tɔ, ka babayi wa saani, ŋɔni n daa tum u ba ŋɔn boori seem?” Ka ba labsi n‑yɛli u, “Ŋɔn daŋŋi tooni la.” Ka u daa yɛli ba, “Yɛlimaŋni ka n yɛtti ya wa, ni, ban deaari lampoo ni ban goori gyɛ'amiru la nin gaari yarima tooni n‑kpɛ Arizana naam ni.

³² Dama Gyɔni daa kyɛ na ni u ti wulisiri ya yɛlimaŋni soori, ka yarima daa bu niŋi u yɛdda, amaa ka lampodeaariba ni gyɛ'amirudima daa niŋi u yɛdda. Ka yarima muna, halli ni yan daa nya lala zaa, ya daa bu takki ya teesa n‑naayi niŋi u yɛdda.”

³³ Ka u daa gbaai yɛttɔ'a n‑yɛli ba nyɛsiseaa yaasa, ni, “Yiri daansɔ n daa bɛ ni n‑daa sa u tiwanna puu. U daa mɛ la goomni n‑gyili puu maa, n‑gbi bɔkku ba n soorigri tiwala maa seela, ka laa n‑ti sugri puu maa puuni. U daa maali di zaa ka zaŋŋi puu maa n‑niŋi ninvugseeba nuu ni ni ba tumma puu maa tuma n‑tiri u: ka u daa naayi kyaŋŋi n‑gɔa.

³⁴ Tɔ, ka tiisi maa wala saha ŋɔn daa ti pɔri, u daa tum u daaba ni ba kyaŋŋi tuntumniba maa saani nti deaai u puu maa diibu na n‑ti u.

³⁵ Amaa tuntumniba maa daa gbaai ba yinni m‑bu u, ka sɔ mun ka ba daa ku, ka daabsɔ yaasa ka ba daa lɔbi kuga.

³⁶ Ka puu maa daana daa laa n‑tum seeba, daaba pam gba n‑gaari banla, ka tuntumniba maa daa niŋi ba zaa lala.

³⁷ Ka u daa naayi tum u toori biiya ba saani, dama u daa teesiya, ni, ‘Ba nin ti m maŋtoori bii maa gyirima.’

³⁸ Amaa tuntumniba maa ŋɔn daa nya puu maa daana bii la, ba daa yɛli n‑ti taaba, ni, ‘Ŋɔn nin di puu maa daana faari la nŋɔa. Ya kyɛ ka ti ku u, ka mari u faari maa.’

³⁹ Ka lala zugu ba daa gbaai u n‑zaŋŋi u m‑basi puu maa kpaŋŋa n‑ku u.

⁴⁰ Tɔ: ka puu maa daana yi ti paai na, u nin niŋi tuntumniba wa wula?”

⁴¹ Ka ba daa labsi n‑yɛli u, ni, “U nin ku tuntumniba wa zaa ka ba kum nin ti bɛ halli. Ka u nin zaŋŋi puu maa n‑ti tuntunseeba ban nin sakki n‑zaŋŋi u wala maa n‑ti u, a walibu saha yi ti paai.”

⁴² Ka Yisa daa yɛli ba, ni, “Ammi, ya na bu karim Sɔppu la? - ni#:- ‘Kugseaa tammeeriba ŋɔn daa za'asi la Kana daa leebi kan gbaai nyeebri maa, N‑gbaari ka zaa ni kpeeŋŋu; Ti Dugma tuma maa nla, Ka di nyɛ la alahazibu n‑ti ti.’ - ya bu baŋŋi lala sɔppu maa?”

⁴³ Ni, “Dinŋɔna man yɛtti ya ni, ni, ba nin fa Naawunni naam yɛla ya saani nti zaŋŋi n‑ti tingbanseaa niriba, ban tuma sumsi ni ba deaai.” [[

⁴⁴ Ni, “Ŋɔnkam zaa lu kugri maa zugu nin kabi m‑basi, amaa kugri maa ŋɔn lu sɔ zugu ka nin ŋmɛrigi u zaa.”]]

⁴⁵ Di saha ka gyeeŋŋu toondaandima ni Farisii dima maa daa wum lala ka daa baŋŋi, ni, nyɛsiri maa galimni la bana.

⁴⁶ Ka ba daa boori soori ni ba gbaai u; amaa ba daa zɔri la daadam la dabeem, dama zama maa daa yɛnni, ni, anabi n nyɛ u.