MAAKI 9 - Mampruli

¹ Ka laa n‑yɛli ba, ni, “Yɛlimaŋni ka n yɛtti ya wa, ninvugseeba bɛ kpa, n‑ku kpi halli ka ba ti nya Naawunni naam kyɛnni na ni yiiko.”

² Dabsa ayoobu ŋɔn daa ti gaari, Yisa daa zaŋŋi Piita ni Gyeemsi ni Gyɔni n‑zi ba n‑kyaŋŋi n‑du zɔtitaari zugu ka ba daa ti bɛ ba kɔkɔa. Ban daa ti gɔsiri maa, ba daa ti nya ka Yisa takki ni,

³ ka u neema daa pɛligi m‑pɛligi nyain! - n‑gaari ninsaala ŋɔn nin toaai m‑peaai neema ka a pɛligi seem.

⁴ Dinsaha ka u nyaandɔliba ata maa daa nya anabi Ilaygya, ni Musa, ka ba daa bɛ ni n‑sɔsiri ni Yisa.

⁵ Ka Piita daa yɛli Yisa, ni, “Ti Karimba, ti kpa wa beesigu veela! Kyɛ ka ti ti suga ata - i dinni yinni, ni Musa dinni, ni Ilaygya mun dinni!”

⁶ Dabeem daa gbaai Piita ni u taaba halli, ka u daa bu mi ŋɔn yɛtti seem.

⁷ Di saha ka sangbaŋŋu daa sigi na nti ligi ba, ka kukɔri daa tɔ'asiri sangbaŋŋu maa ni, ni, “M bii maa nŋɔa, n wuri u ni: ya wumma u yɛligu!”

⁸ Ka lala saha deede ka ba daa gɔsi n‑gyili ban daa zɛ seelli maa zaa, amaa ba daa bu nya sɔa; kulla Yisa kɔkɔ n daa zɛ ba saani.

⁹ Ka ban daa ti yi zoori zugu n‑sigri na, u daa kpaamni ba, ni, “Ya di yɛli sɔ yan nya seelli wa, see ka man Ninsaala Biiya ti yisigi kum ni.

¹⁰ Dizugu ba daa deaai u noori wa ka daa bu yɛli sɔa, amaa ka kur boosiri taaba zaŋŋi n‑kyaŋŋi ‘kum yisigri’ gbinni ŋɔn nyɛ seem.”

¹¹ Ka ba daa boosi Yisa, ni, “Wula zugu ka ti karimbadima yɛtti, ni, Ilaygya ya n‑daŋŋi n‑kyɛ na pɔi, ka Masiiya naayi paai na?”

¹² Ka u daa yɛli ba, ni, “Ilaygya siri ya daŋŋi n‑kyɛ na n‑sɛ'asi buna kam zaa. Amaa wula zugu ka Litaafi maa yɛli, ni, Ninsaala Bii nin di wahala pam, ka ba laa n‑zeem u m‑paasi?

¹³ Amaa n yɛtti ya ni, ni, Ilaygya pun kyɛ na ka ba daa niŋi u ban daa boori seem, hoo Litaafi maa ŋɔn daa pun sɔbi u yɛla seem la.”

¹⁴ Ka ban daa ti paai Yisa nyaandɔliseeba la ŋɔn daa bɛ seela, ba daa nya ka daadam pam gyiligi ba, ka karimbaseeba daa ŋmeeri nangbankpeemni n‑tiri nyaandɔliba maa.

¹⁵ Ka niriba maa ŋɔn daa ti nya Yisa, di daa niŋi ba alahazibu ka ba daa zɔ n‑kyɛnni u saani na nti puusi u.

¹⁶ Ka Yisa daa boosi ba, ni, “Nangbankpeemni bɔ ka ya ni ban ŋmeeri maa?”

¹⁷ Ka daadam maa puuni dɔsɔ daa labsi n‑yɛli, “N Karimba, m bii wa mari la arizimbeoo ŋɔn kyɛ ka u bu tɔ'asira;

¹⁸ dizugu ka m mari u n‑kyɛ i saani na. Halli arizimbeoo maa yi ti yisigi u ka yi zaŋŋni u m‑basi la tiŋŋa, ka nantɔfufugri yiiri u noori ni na, ka u dumni u nyina, ka u niŋŋa zaa kpaŋŋi. N da yɛli i nyaandɔliba wa, ni, ba karim arizinni maa m‑basi amaa ba da bu nyaŋŋi n‑kari u.”

¹⁹ Yisa daa yɛli ba, “Ah! Ya yɛdda kɔŋŋniba wa! N ya n‑yuui la wula ya saani? Bee man nin di sugru ya saani ka di yuui wula? Yan mari bii maa n‑kyɛ n saani na!”

²⁰ Ka ba daa mari u n‑kyɛ u saani na. Arizimbeoo maa ŋɔn daa nya Yisa, u daa lusi bii maa hoo kpisinkpiiri, ka bidibga maa daa lu tiŋŋa m‑bilimna, ka nantɔfufugri yiiri u noori ni.

²¹ Ka Yisa daa boosi bii maa ba, ni, “Dooru wa piili u ka di yuui, bee?” Ka u daa labsi n‑yɛli u, ni, “Di daa piili ka u na nyɛ la bibila.

²² Napɔŋŋu paai seem ka arizinni maa zaŋŋni u m‑basiri bugum ni, bee koom ni, ni u ya ku u. Zɔm ti namboo ka suŋŋi ti, di yi nin toaai n‑niŋi!”

²³ Ka Yisa daa yɛli u, “Ni, di yi ti toaai, walla!”, ni, “Bunseelli kam nin toaai n‑niŋi yɛdda daana saani.”

²⁴ Ka bii maa ba tasi yooma n‑yɛli, “N niŋi yɛdda, amaa n yɛdda maa bu zoaai ni. Kur suŋŋma ma ka n yɛdda paasira!”

²⁵ Ka Yisa daa baŋŋi, ni, daadam maa ya n‑lim ba na, ka dizugu u daa yɛli arizimbeoo maa, ni, “Nyin arizinni tubkpira ni zɔligu daana wa, yim na ka di laa n‑kpɛ bidibga wa yaasa!”

²⁶ Arizinni maa daa yisigiya ka kyɛ ka bii maa daa kaasi pampam ka lu kpisinkpiiri; ka arizinni maa daa yi ka kyɛ u, halli ka bii maa daa kpalim n‑dɔya hoo kum, ka niriba maa pam daa yɛli, ni, u kpi ni.

²⁷ Amaa Yisa daa gbaai bii maa nuu n‑suŋŋi u ka u daa doaai n‑zaani.

²⁸ Di nyaaŋŋa Yisa daa ti bɛ duu ni, ka u nyaandɔliba maa daa kpɛ na nti sɔ'ai m‑boosi u, ni, “Bɔ n niŋi ka tirima guui arizimbeoo maa karibu?”

²⁹ Ka Yisa daa labsi n‑yɛli ba, “Seelli ka ni n nin toaai n‑kari arizinni wa taabu na'ala wunsusigu kɔkɔa.”

³⁰ Di saha maa ka Yisa ni u nyaaŋŋa daa yi bɛni nti goori n‑dɔla Galilii tingbaŋŋu sɔya. Yisa daa bu boori ni sɔ baŋŋi ŋɔn bɛ seela,

³¹ dama u daa wulisiri u nyaandɔliba la; ka yɛtti ba, ni, “Ninsaala Bii n nyɛ ma, ka ba nin zaŋŋi man Ninsaala Bii n‑niŋi ninvugseeba nuu ni ni ba ti deaai ma n‑ku ma. N kum maa nyaaŋŋa di nin paai dabsa ata ka n nin laa n‑doaai.”

³² Amaa ba daa bu baŋŋi u yɛttɔ'a wa gbinni, ka dabeem mun daa mari ba ni ba boosi u di gbinni yaasa.

³³ Ban daa ti paai Kapirinyum la ba daa bɛ la duu ni ka Yisa daa boosi u nyaandɔliba maa, ni, “Nangbankpeemni bɔ ka ya da ŋmeeri soori ni la?”

³⁴ Amaa ba sɔsɔ daa bu labsi u seelli, dama soori maa ni ka ba yi ga'ari ni zaŋŋi n‑kyaŋŋi ba taaba kpamni.

³⁵ Yisa daa zini tiŋŋa ka booli u nyaandɔliba piiya ni ayi la na nti yɛli ba, “Sɔ yi boori ni u leebi toondaana, see ka u sigsi u maŋŋa n‑leebi sɔkam daabri.”

³⁶ Ka u daa yiisi bii yinni n‑zaali ba tooni.

³⁷ U daa zaŋŋi u nuusi n‑gɔbi bii maa ka yɛli ba, “Sɔ yi gyaari bibila wa taabu man yuuri zugu, mani ka di daama n gyaari. Sɔ mun yi gyaari ma, pa man kɔkɔ ka u gyaari, amaa u gyaari la Ŋɔn tum ma na la gba.”

³⁸ Ka Gyɔni daa yɛli u, “Ti Karimba, ti da nya la dɔsɔ ka u zaŋŋi i yuuri n‑katti arizimbeeri, ka ti da yɛli u, ni, u di laa m‑paasi lala yaasa, dama u bu dɔli ti.”

³⁹ Ka Yisa daa yɛli ba, “Ya di goaari u, dama sɔ yi ti tum tunkarigu man yuuri zugu, di daama ku laa n‑ŋmaligi ya'abi ka tu ma.

⁴⁰ Sɔ yi bu yi ti nyaaŋŋa, di daama nyɛ la ti nira.

⁴¹ Yɛlimaŋni ka n yɛtti ya wa, sɔ yi zaŋŋi koom n‑ti ya, yan nyɛ man Masiiya la niriba zugu, di daama ku kɔŋŋi u tuma laara.

⁴² Amaa sɔ yi yɔmsi bibisi wa yinni ka u kyɛ u yɛdda niŋbu ka za'asi ma di zugu di bu veeli gba. Lala nira nin ti nya ka ba yi da zaŋŋi nɛtitaari n‑yeeli u nangoori ka daai u m‑basi mɔ'ari ni, ni, di nin ti sɔ u beesigu.

^43-44 Dizugu i nuu yi yɔmsiri i ka kyɛ ka i kɔŋŋi yɛdda, nyin ŋmaam ka m‑basi. I yi mari nuu yinni ka mari nyɔvuri, lala veela n‑gaari ni i mari nuusi ayi ka kpɛ wahala ni, bugum bun bu kpiiri ziiya.

^45-46 I nɔbri yi kyɛ ka i tum tumbeoo, nyin ŋmaam ka m‑basi. I yi mari napɔŋŋu yinni ka mari nyɔvuri, lala veela n‑gaari ni i mari napɔna ayi ka kpɛ wahala ni.

⁴⁷ I nimbiri yi yɔmsiri i ka kyɛ ka i kɔŋŋi yɛdda, nyin lukkma ka m‑basi. I yi mari nimbiri yinni ka kpɛ Naawunni naam ni, lala veela n‑gaari ni i mari nini ayi ka kpɛ wahalaseaa kan ka naari,

⁴⁸ seelli ka bugum bu kpiira, ka zunzuya kur kpalim n‑ŋɔbra.

⁴⁹ Bugum nin maali sɔkam zaa tuma hoo yaarim ŋɔn maanni zeeri seem la.

⁵⁰ Yaarim nya'asa, amaa ka biim maa yi ti yi ka kyɛ ka, bɔ n nin laa n‑toaai n‑kyɛ ka ka mari biim yaasa? Ya sɔkam mari yaarim nya'asim maa taabu ya beebu ni, lala ka ya nin la'am m‑bɛ ni ka yɛttɔ'aseaa ka ni.”