MAAKI 13 - Mampruli

¹ Yisa ŋɔn daa kyɛnni n‑yiiri Gyeeŋŋu Yiri maa ni na la, u nyaandɔliba yinni daa yɛli u, “N Karimba, gɔsim kugnyalima wa ŋɔn bɛ seem, ni ban daa zaŋŋi a m‑mɛ duri ni gooma seem!”

² Ka Yisa daa yɛli u, “I bu nya mɛkara wa? Tɔ: dahinseaa kyɛnni na ka a kugseaa ku kpalim n‑tɔm ka kugkpeaa zugu, amaa a zaa nin ti ŋmɛ n‑wurim n‑lu tiŋŋa na.”

³ Di nyaaŋŋa u daa zini Ɔlivii Zoori zugu, Gyeeŋŋu Yiri maa ya'ari sa, ka Piita ni Gyeemsi ni Gyɔni ni Anduru daa kyɛ u saani na nti sɔ'ai m‑boosi u, ni,

⁴ “Yɛlim ti wula saha ka dinŋɔ nin niŋi. Ka bumbɔ nin ti niŋi n‑wulisi, ni, anŋɔ zaa ya paai a tariga?”

⁵ Di saha ka Yisa daa yɛli ba, “Ya baŋŋma suŋŋa ka di kyɛ ka sɔ yɔmsi ya.

⁶ Niriba pam nin zaŋŋi n yuuri n‑kyɛ na, ni, ‘Mani nla!’ ka ba nin yɔmsi niriba pam m‑basi.

⁷ Ya yi ti wumni tɔppu damni, bee di lahabaya, yan di kyɛ ka yam-ŋmaa gbaai ya, dama lala nin niŋi pɔi, amaa pa naari maa nla.

⁸ Tinsi dima nin yisigi n‑tuusi taaba tɔppu, ni nadima gba nin tuusi taaba. Tingbaŋŋu maa nin damni kpa, ni kpa, ni kpa sa; ka kɔm nin ti lu; amaa anŋɔ zaa ti ya bɛ ni hoo pɔ'apudaana wɔlisigu piiligu beerim ŋɔn bɛ seem la.

⁹ Amaa ya gbaam ya mansi, dama ba nin ti mari ya n‑niŋi kootu dima nuu ni, ba nin ti bu ya la'aŋŋu duri ni, ka ba nin kari ya sariya gɔmnadima ni nadima tooni. Di zaa nin niŋi man zugu, ka lala nin kyɛ ka ba baŋŋi suŋŋa.

¹⁰ See ka lahabasuŋŋu maa daŋŋi m‑paai tinsi kam zaasa.

¹¹ Ba yi ti mari ya n‑yi sariya karibu ziiya, yan di daŋŋi n‑fabinni yan nin tɔ'asi yɛttɔ'aseesi zugu: ya tɔ'asim yɛttɔ'aseesi an bɛ ya sufu ni di saha maa, dama di pa yarima n ya n‑tɔ'asi amaa Naawunni Sii Kasi maa nin tɔ'asi.

¹² Dɔseeba nin gbaai ba mabiisi n‑tisi ka ba ku ba, bee ba nin gbaai ba biisi, ka biisi mun nin yisigi n‑zabi ba badima ni ba madima halli nti ku ba.

¹³ Ba zaa nin yaai ya man yuuri zugu, amaa sɔ kam zaa ŋɔn nin kpaŋŋi u maŋŋa m‑bari n‑zaani halli nti paai yɛla wa tariga maa nin nya tiliginsim.

¹⁴ Ya nin ti nya ka ba zaŋŋi bumbɛseelli kan kyisiri la n‑zaali luginseaa kan bu sum ni ka zɛya, n‑sa'amni yɛla. [Kyɛ ka ninvugsɔ ŋɔn karimni anŋɔ baŋŋi suŋŋasuŋŋa.] Tɔ: ya yi ti nya lala, di saha maa ya kyɛ ka ban bɛ Gyuudii tingbaŋŋu ni la zɔ n‑du zɔya ni.

¹⁵ Yan di kyɛ ka ban bɛ pii zugu ti sigi tiŋŋa na nti kpɛ duu puuni n‑zaŋŋi sɛseelli,

¹⁶ ka seeba ban bɛ puri ni di labi nyaaŋŋa nti zaŋŋi ba kpari la.

¹⁷ Di saha maa di nin ti kpeem pam n‑tisi pɔ'apuusi dima ni pɔ'aseeba ban mari biisi ka ba na mɔ'ara.

¹⁸ Dizugu ya susim Naawunni ka dinŋɔ di kyɛ na waari saha,

¹⁹ dama di dabsa maa ka wahala nin bɛ ni pam, wahalaseaa ban na zi n‑nya Naawunni ŋɔn daa naam duniya wa sahanseaa zaŋŋi n‑kyaŋŋi zuna, ka ku laa m‑maali n‑nya lala taabu yaasa.

²⁰ Ka ti Dugma maa yi daa bu ŋmaai dabsa maa gyiŋŋa, saalibii n daa ka ni n‑da naa n‑nya tiliginsim, amaa ŋɔn daa yiisi seeba la zugu ka u siri daa ŋmaai dabsa maa.

²¹ Ka di saha maa, sɔ yi ti yɛli ya, ni, ‘Nyama, Masiiya maa bɛ la kpa.’ bee ‘Kpa sa ka u bɛ ni.’ yan di niŋi ba yɛdda.

²² Seeba nin ti doaai na m‑ma'ari ziri, ni, ban n nyɛ Masiiya, bee, ni, ban n nyɛ anabidima; ba nin tum alahazibu tuma ni ba ti yɔmsi niriba m‑basi, halli ni Naawunni ŋɔn yiisi seeba la gba, amaa Naawunni ku sakki lala.

²³ Ya gbaam ya mansi, dama m pun daŋŋi n‑yɛli ya seelli kam zaa.”

²⁴ Ka u daa laa n‑yɛli ba, ni, “Amaa di saha, wahala maa nyaaŋŋa, ni#:- ‘Wuntaŋŋa nin ti zibgi zimm! Ka namboaa ku laa m‑pɛligi:

²⁵ Saŋmariwuusi nin ti yiiri saazugu n‑luri na, Ka arizana yiikodaandima zaa nin damna.’

²⁶ Di saha ka ba nin ti nya ‘Ninsaala Bii maa ka u pɔtti na, ka sangbana nin gyiligi u’, ka u ti mari yiiko pam ni gyirima veelim.

²⁷ Di saha maa ka u nin ti tum malaakadima maa ka ba yi na m‑paai duniya wa lugri kam zaa n‑zaŋŋi ŋɔn yiisi seeba la ka la'asi ba taaba.”

²⁸ Ni, “Ya kyɛ ka kinkaŋŋa yɛla wulisi ya di gbinni ŋɔn nyɛ seem: ya yi ti nya ka lala tii maa yiisiri wuliŋmeena ka pusiri vapaala, ya nin baŋŋi, ni, siga saha pɔtta.

²⁹ Ka di bɛ la lala: ya yi ti nya ka yɛla wa zaa niŋna, ya nin baŋŋi, ni, saha maa pɔriya.

³⁰ Yɛlimaŋni ka n yɛli ya wa, ni, zuna niriba zaa ku gaari see ka dinŋɔ zaa niŋi.

³¹ Saazugu ni tingbaŋŋu nin gaari, amaa man yɛttɔ'a wa ku gaari.”

³² Ni, “Amaa di daari maa, bee di saha, ŋɔn ya paai sahanseaa la ka sɔsɔ bu mi deede, halli malaakadima ban bɛ arizana ni la bu mi, Naawunni Bii maa gba bu mi, na'ala ti Ba maa mi.

³³ Dizugu ya gura, yan di gbisira, dama ya bu mi di saha maa.

³⁴ Di ti ya n‑nyɛ la hoo dɔsɔ ŋɔn daa wa goorim ka puri u yiri tuma n‑tisi u tuntumniba seem, sɔkam zaa ni u tuma. Ka yɛli ŋɔn guri u yiri za'anɔri maa, ni, u di gbisi.

³⁵ Dizugu ya gura suŋŋa, dama ya bu mi yiri maa daana lappu saha na - ammi, zaanoori, bee yuntasuusi, bee bɛkasigri, bee asuba?

³⁶ Ya sɛ'asima, ka di kyɛ ka u paai na n‑libgi ya ka ya na gbisira.

³⁷ Ka man yɛtti yarima seem wa, n yɛtti la sɔkam zaa, ni, ya sɛ'asima n‑gura.”