LUUKI 5 - Mampruli

¹ Tɔ; ka dahinseaa ka Yisa daa ti zɛ Gyɛnɛsarɛti mɔ'ari la noori ni, ka niriba pam kpa'ari n‑kyɛnni u saani na ni ba ti wum Naawunni yɛligu maa.

² Ka u daa nya nyarima ayi seesi an daa kpalim n‑dɔya mɔ'aduuri la ni; ka zingbaariseeba ban daa su a maa mun daa kyɛ a n‑dooli ka kyaŋŋi ni ba ti peaai ba laama.

³ Ka Yisa daa kpɛ nyarinseaa ni, nyariŋŋu maa mun daa nyɛ la Saimoon dinni, ka dinŋɔna u daa bɛlim Saimoon, ni, u tugsim ka n‑kpɛ koom maa ni n‑zaali tooni beela. Ka Yisa daa zini nyariŋŋu maa puuni n‑wulisiri niriba maa.

⁴ Ŋɔn daa ti wulisi ba n‑naai, u daa yɛli Saimoon, “Kyɛma nti paai mɔ'ari wa kɔzuliŋŋu ni sa, n‑lɔbi ya laama maa n‑gbaai zaasim.”

⁵ Ka Saimoon labsi n‑yɛli u, “N Daana, ti sa pun lɔbi a yuŋŋu la n‑neaai beoo, ka mun bu gbaai halli yinni gba; amaa nyin ŋɔn yɛli seem wa zugu, n nin lɔbi.”

⁶ Ka ban daa siri niŋi lala ba daa gbaai zaasim pam, halli ka ba laama maa ti boori a kyeesi.

⁷ Ka ba daa booli ba zingbaaritaaba ni ba zaŋŋma nyarinseaa la n‑kyɛ na n‑suŋŋi ba. Ka ba daa kyɛ na nti suŋŋi ba ka yiisi zaasim maa m‑paali nyarima ayi maa zaa, halli ka a ti ya sim koom maa ni.

⁸ Saimoon Piita ŋɔn daa nya lala maa u daa gbaani tiŋŋa Yisa tooni ka yɛli u, “N Dugma, kyɛma ka kyɛ man tumbeeri daana wa m‑basi. M bu sumsi m‑pɔri i saani na.”

⁹ Tɔ; ka ban daa gbaasi zaasim seem maa zugu di daa gyɛri Saimoon ni bankam daa bɛ u saani maa pam.

¹⁰ Ka di daa niŋi Zɛbidii biisi Gyeemsi ni Gyɔni ban daa nyɛ Saimoon tuntuntaaba la gba alahazibu. Ka Yisa daa yɛli Saimoon “Di zɔri dabeem! I yi gbaari la zaasim halli ni zuna; amaa zuna zaŋŋi kyaŋŋi i ya leebi la ŋɔn gbaari ninsaalidima n‑tiri Naawunni.”

¹¹ Ban daa ti zaŋŋi ba nyarima maa na nti dooli duuri ni, ba daa kyɛ ba bunseelli kam zaa m‑basi ka yisigi n‑dɔli Yisa.

¹² Tɔ; ka Yisa ŋɔn daa ti bɛ tinseaa ni maa, dɔsɔ n daa bɛ ni ka kɔmni daa ti wali u ningbina zaa. Doo maa daa kyɛ Yisa saani na nti kuntiri u tooni m‑bɛlimni u n‑yɛtta, “N daana, i yi da sakki lala, i naa kyɛ ka n kɔmni wa naai ka n kpɛ n‑taabi ni.”

¹³ Ka Yisa daa teaai u nuu n‑siisi u ka yɛli, “N sakkiya: di naama!” Ka u kɔmni maa daa siri basi u lala saha maa.

¹⁴ Ka Yisa daa kpaam u n‑yɛli, “Di yɛli sɔa, amaa kur kyɛm nti zaŋŋi i maŋŋa n‑wulisi maalimaanna ka maali sariseesi Musa ŋɔn daa sɔbi n‑zaali zaŋŋi n‑kyaŋŋi kɔmni tippu zii la; dina nin kyɛ ka ba baŋŋi, ni, i siri nya tippu.”

¹⁵ Amaa Yisa yuuri daa maali n‑du pam n‑kyaŋŋi halli, ka daadam pam daa la'am na ni ba ti wum u yɛttɔ'a, ka laa n‑kyɛ ka u tibri ba dooru balibu kam la.

¹⁶ Ka Yisa mun daa yisigri n‑kyɛnni moo ni, ni u ti bɛ u kɔkɔ m‑puusiri ka susiri Naawunni.

¹⁷ Dahinseaa ka Yisa daa laa n‑kpɛ duu ni n‑wulisiri niriba, ka Farisii dima ni Naawunni zaaligu karimbadima seeba daa kpɛ duu maa na n‑zintiri n‑wumni u yɛttɔ'a maa; ba daa pun yi Gyɛrusalɛm tiŋŋa ni, ni Galilii ni Gyuudii tingbana ni m‑paasi n‑kyɛ na. Di saha maa ka Naawunni yiiko daa bɛ u ni n‑kyɛ ka u tibri niriba.

¹⁸ Ka ninvugseeba daa zaŋŋi ba baarisɔ ka u gbaya ayi zaa daa kpi, n‑niŋi u sɔŋŋu ni n‑zi u na; n‑kyɛ na nti boori soori ni ba zaŋŋi u n‑kpɛ n‑dooli Yisa tooni

¹⁹ ka kɔŋŋi, daadam maa ŋɔn daa zoaai m‑mugsiri u maa zugu. Dinŋɔ zugu ba daa zaŋŋi u n‑du la yiri maa pii saazugu nti kyiibi voori n‑yoaai n‑sigsi u, ŋɔn ni u sɔŋŋu maa zaa, voori maa ni, halli nti paai tiŋŋa; ka ba daa zaŋŋi u n‑dooli Yisa tooni lala.

²⁰ Yisa ŋɔn daa nya ban niŋi u yɛdda seem maa zugu, u daa yɛli baara maa dizugu, ni, “N zɔsuŋŋu, n kyɛ i taalli m‑pɛŋŋi i.”

²¹ Ka karimbadima ni Farisii dima maa daa boosiri ba sufu ni, n‑teesiri n‑yɛtta, “Bɔ n niŋi ka doo wa zaŋŋi u maŋŋa n‑zaantiri Naawunni zaaziiya seem wa? Ŋɔni n lee n‑toaai n‑kyɛ niriba taalli m‑pɛŋŋi ba? Ka pa ni Naawunni kɔkɔa?”

²² Ka Yisa daa baŋŋi ba sufu ni teesa maa zaa, ka boosi ba, ni, “Bɔ zugu ka ya birisira?

²³ Yɛla ayi wa sunsukkuni, kani m bu tɔa - i yi yɛli sɔ, ni, ba kyɛ u taalli m‑pɛŋŋi u, bee i yi yɛli sɔ, ni, u doaama n‑kyaŋŋi?”

²⁴ Ka laa n‑yɛli ba, “Amaa m boori ni ya baŋŋi, ni, ba pun ti man Ninsaala Biiya soori ni n kyɛri niriba taalli m‑pɛŋŋni ba, duniya wa puuni.” Di saha maa ka u ŋmaligi n‑yɛli baara maa, “N ya n‑yɛli i, ni, doaama n‑zaŋŋi i bundoaa wa n‑kuli!”

²⁵ Ka doo maa daa siri doaai n‑zaŋŋi u bundoaa maa ba zaa nini ni m‑pɛ'ari Naawunni ka va n‑kuli.

²⁶ Ka di daa gyɛri ba zaa pam; ka ba pɛ'ari Naawunni n‑yɛtta, “Ti siri nya alahazibu tuma zuna!”

²⁷ Tɔ. Ka dinŋɔ nyaaŋŋa ka Yisa daa yi nti nya lampodeaarisɔ ŋɔn yuuri daa boonni Liivai. Ŋɔnŋɔ mun daa zi ba lampoo tuma ziiya n‑tumna, ka Yisa yɛli u, “Doaama n‑dɔli ma!”

²⁸ Ka u daa doaai n‑kyɛ u bunseelli kam zaa ka dɔli u.

²⁹ Ka ŋɔn Liivai daa dugi diibu u yiri maa ni, ka daa booli Yisa n‑zuusi u ni u kyɛm na n‑di. Ka lampodeaariba ni daadam pam daa paasi u zugu n‑la'am na nti dira.

³⁰ Lala zugu ka Farisii dima ni karimbadima ban daa bɛ bɛni maa daa galim Yisa nyaandɔliba maa ka boosiri ba, ni, “Wula ka yarima ni lampodeaariba ni tumbeeri dima la'amni n‑dira ka nyuura?”

³¹ Ka Yisa daa yɛli ba, ni, “Ban mari alaafɛ bu boori tiimaraana, na'ala ban beeri m‑boori u.

³² Pa tunsuma dima zugu ka n kyɛ na, ni m boonni, amaa tumbeeri dima ka m boonni ni ba kyɛm na n‑takki ba beebu, ni ba sufu ni teesibeeri zaa.”

³³ Ba mun daa labsi n‑yɛli u, “Seeba ban dɔli Gyɔni maa loori la noori sahakam ka puusiri aduuwa, ka Farisii dima nyaandɔliba gba n niŋni lala, amaa nyini mun nyaandɔliba wa n kur diri ni ka nyuura.”

³⁴ Ka u daa boosi ba, “Dɔsɔ yi ti di pɔ'apaalli ka ba deemni dizugu, ammi, pɔ'apaalli sira maa yi ti bɛ u saamma sunsukkuni ba nin lɔ noori di saha maa, bee? Ay! Ba bu ya lɔa.

³⁵ Amaa sahanseaa kyɛnni na ka ba nin ti yiisi amriya doo maa ba saani - di dabsa maa puuni ka ba nin lɔ noori.”

³⁶ Ka u daa laa m‑paasi ba nyɛsiri n‑yɛli, “Sɔ na zi n‑toaai bunyeeripaalli tanni n‑ligi bunyeerikurigu. U yi niŋi lala u nin sa'am bumpaalli maa, ka tampaalli maa ku ŋmani bunkurigu la.

³⁷ Sɔ mun ku laa n‑sakki n‑zaŋŋi dapaalli n‑lɛ daga'akurigu ni. U yi niŋi lala, daam maa nin ŋma ga'akurigu maa ka yuuli m‑basi, ka ga'ari maa gba sa'am.

³⁸ Ay! Ba zaŋŋma ga'apaala n‑leeri dapaalli n‑niŋi a puuni.

³⁹ Ninvugsɔ ŋɔn nyu daam m‑miili mun bu boori dapaalli; amaa u yɛli, ni, dakurigu kɔkɔ n nya'asa u saani.”