KASIGRI 22 - Mampruli

¹ Ka malaaka maa daa laa n‑wulisi ma nyɔvuri koom kuliga, ka bu neaai kasikasi m‑pɔbri n‑yiiri naam zizii maa ni na, kan nyɛ Naawunni ni Pɛbila maa dinni.

² Kuliga koom maa daa pɔbri n‑dɔla tiŋŋa maa sɔyɛliŋŋu sunsukkuni. Ka nyɔvuri tiisi daa zɛ kɔsoori maa ya'a ayi zaa, n‑wanni wala balim pii ni ayi, n‑wanni gɔri gɔri. Ka tiisi maa vaari daa nyɛ la an tibri tinsi zaa niriba.

³ Naawunni ŋɔn yɛli yɛlibeoo n‑niŋi bunseelli kam ku laa m‑bɛ bɛni. Naam zizii maa kan nyɛ Naawunni ni Pɛbila maa dinni nin bɛ tiŋŋa maa puuni: ka ban gyeemni u maa nin pɛ'ari u ka tiri u gyirima.

⁴ Ka ba nin nya u nindaa, ka u mun yuuri nin pa ba gbeeri ni.

⁵ Yuŋŋu ku laa m‑bɛ ni. Ba ku laa m‑boori firila, halli wuntaŋŋa neesim gba ka ba ku laa m‑boora; dama ti Dugma Naawunni nin neaari n‑tiri ba. Ka ba nin di naam, saha din ka tariga.

⁶ Di saha ka malaaka maa daa yɛli ma, ni, “Yɛttɔ'a anŋɔ mari la yɛdda ka nyɛ yɛlimaŋni. Ti Dugma Naawunni daa su anabidima siisi maa, ka ŋɔn Naawunni tum u malaaka na, ni u ti wulisi u tuntumniba maa bunseesi an nin niŋi ka bu ya n‑yuui la.”

⁷ Ni, “Nyama! Pampaŋŋɔ ka n kyɛnni na.” Ni, “Zugsuŋŋu bɛ ni n‑ti sɔkam zaa ŋɔn dɔli yɛttɔ'a wa, anabitiri yɛttɔ'aseesi an sɔbi bukku wa ni la.”

⁸ Tɔ. Ka man, Gyɔni, muna - mani n daa wum ka nya anŋɔ zaa. Ka man ŋɔn daa wum ka nya a maa, n daa gbaani tiŋni, malaaka maa tooni - malaaka sɔ ŋɔn daa wulisiri yɛla wa maa - ni n ti gyeem u.

⁹ Amaa u daa yɛli ma, ni, “Di niŋi lala! Man gba nyɛ la i taraana, sɔ ŋɔn gyeemni Naawunni, n‑la'amni ni nyini ni i mabiisi, anabidima maa, ni baseeba ban dɔli bukku wa yɛttɔ'a maa. Naawunni ka i gyeemna!”

¹⁰ Ka u laa n‑yɛli ma, “Di kpabi bukku wa n‑tabli, ni ka anabitiri yɛttɔ'a la! Dama a saha maa bu ya yuui.

¹¹ Kyɛ ka tumbeeri daana kpalim n‑tumni u tumbeeri, kyɛ ka da'ari daana kpalim n‑tumni u tunda'arisi, ka kyɛ ka yɛlimaŋni daana mun kpalim n‑tumni din tu ni yɛlimaŋni, ka ŋɔn nyɛ Naawunni nira kpalim n‑nyɛ bunkasi n‑tiri u.”

¹² Ni, “Nyama, pampaŋŋɔ ka n kyɛnni na! Man ŋɔn ya yɔ ba yoori maa muna, m mari ka n‑kyɛnni na. Sɔkam nin deaai u tuma ŋɔn sumsi seem.

¹³ Mani n nyɛ piiligu ka mun laa n‑nyɛ naari, man daŋŋi tooni ka laa n‑dɔli nyaaŋŋa.”

¹⁴ Ni, “Zugsuŋŋu bɛ ni n‑ti baseeba ban peaai ba situra nyain; lala ka ba nin su soori ni ba ti paai nyɔvuri tii maa ni na, ka laa n‑nyaŋŋi n‑kpɛ za'anɔya maa ni m‑paai tiŋŋa maa puuni.

¹⁵ Baasi mun kpalimni m‑bɛ kpaŋŋa sa. Ban niŋni tiima, ni zina, ka kuuri niriba nla; ba gyeemni la bunseesi an pa Naawunni.”

¹⁶ Ti Dugma Yisa yɛliya, “Mani, Yisa, tum n malaaka ni u ti ti ya lahabaari wa, ka ban la'amni tinsi tinsi n‑gyeemni ma la nin ti wum. Mani n nyɛ NaaDauda dɔ'am tuŋŋu maa Nya'ari: u bii n nyɛ ma gba. Mani n nyɛ bɛŋmariga ka neaari nyain.”

¹⁷ Naawunni Sii maa gba, ni Pɛbila pɔ'apaalli maa m‑paasi n yɛtti, ni, “Kyɛm na!” Kyɛ ka ŋɔn wumni gba yɛli, ni, “Kyɛm na!” Kɔnyuuri yi mari sɔ zaa, kyɛ ka u kyɛ na, ka sɔ zaa ŋɔn boora: ba nin ti nyu nyɔvuri koom maa yɔri, ka samni ka ni.

¹⁸ Tɔ: ka ya wumiya! N yɛtti sɔkam zaa ŋɔn wumni bukku wa anabitiri yɛttɔ'a maa, ni, yan di zaŋŋi sɛseelli m‑paasi yɛttɔ'a wa zugu; sɔ yi ti paasi, Naawunni nin paasi u wahala seesi bukku wa ŋɔn yɛli wa.

¹⁹ Ka sɔ mun yi yiisi bukku wa yɛttɔ'aseesi m‑basi, Naawunni nin yiisi u tɔrli m‑basi, ka u ku toaai n‑nya nyɔvuri tii maa, ni tiŋŋa kasi la, ban sɔbi seesi yɛla bukku wa ni la.

²⁰ Sɔ ŋɔn niŋi anŋɔ zaa sɛhara la yɛtti, ni, “Ii pampaŋŋɔ ka n kyɛnni na.” Ammi: n Dugma Yisa kyɛm na!

²¹ Tɔ: Ti Dugma Yisa piinisuma bɛ sɔkam saani. Ammi.