KASIGRI 17 - Mampruli

¹ Di saha ka malaakadima ayɔpɔi yinni - malaakaseeba ban daa mari laasi ayɔpɔi maa - malaaka yinni maa daa kyɛ n saani na nti yɛli ma, ni, n kyɛm na ka u nin wulisi ma pɔ'agoorli ŋɔn galisi la yɛla, pɔ'asɔ ŋɔn daa du n‑zi n‑tɔm kooma pam zugu la. Ni, u ti wulisi ma ban ya kari u sariya n‑lusi u seem.

² Ni, ŋɔna n nyɛ sɔ duniya nadima zaa ŋɔn daa doontiri u saani la, ka duniya zaa daa bugi u pɔ'agootiri maa zugu hoo ban nyuuri daam m‑bugi seem maa.

³ Tɔ; ka Naawunni Sii daa na mari ma, ka malaaka maa daa zi ma n‑kyaŋŋi yoo ni. Ka n ti nya pɔ'asɔ ka u zi bunkɔbzeaa zugu, ka Naawunni tuubu yuya daa sɔbi n‑niŋi bunkɔbgu wa lugri kam, ka u mari u zugri ayɔpɔi ni yiila piiya.

⁴ Ka pɔ'a maa daa yɛ situriveela an nyɛ bunzeesi wuyiŋ ni bunzeesi zimizimi, ka ba paasi la salima ni mansɔ'asi kugveeliseesi an ligri zoaai pam, halli bumpeela gba. U daa zali salima kɔbeaa u nuu ni, ka u tumbeeri daa paali ka, ni u pɔ'agootiri da'ari yɛla maa zaa.

⁵ Ka yuseaa daa sɔbi m‑pa u gbeoo zugu - ka din daa sɔbi seem maa nŋɔa: ‘Babɛlɔn titaari’, ni, ‘Ŋɔn dɔ'ari la duniya zaa pɔ'agootiri ni da'ari yɛla zaa.’ - ka lala yuuri mari la ka gbinni, amaa ka sɔ'aya.

⁶ Ka n daa nya, ka pɔ'a maa nyuuri Naawunni niriba ziim m‑bugra, ni ninvugseeba ban daa mooli Yisa yɛla ban daa nya ka wum seesi maa - ba gba ziim ka u nyuura. Ka man daa nya lala maa ka di niŋi ma alahazibu pam.

⁷ Ka malaaka maa daa boosi ma, ni, “Bɔ zugu ka i kyɛ ka di niŋi i alahazibu? N nin wulisi i yɛlisɔ'ara maa gbinni ŋɔn nyɛ seem, zaŋŋi n‑kyaŋŋi pɔ'a maa ni bunkɔbsɔ ŋɔn baara, ka u mari u zugri ayɔpɔi ni yiila piiya maa.”

⁸ Ni, “Nyin nya bunkɔbsɔ maa nyɛ la ŋɔn daa pun bɛ ni, ka laa n‑ka ni pampaŋŋɔa, ka u ti ya n‑du n‑yi bɔ'azuliŋŋu maa ni na. Amaa u kur wa la baasiyɔri ziiya. Ka duniya dimseeba ban yuya pa la an daa pun sɔbi nyɔvuri bukku maa puuni duniya piiligu saha maa - di nin niŋi ba alahazibu pam, ban gɔsi n‑nya bunkɔbbeoo maa yɛla, ni, ŋɔn daa bɛ ni, ka laa n‑ka ni, ka mun ya n‑kyɛ na.

⁹ Tɔ! [Kpa wa ka nira yi zaŋŋi yam m‑baŋŋi di gbinni suŋŋasuŋŋa] bunkɔbgu zugri ayɔpɔi la, anŋɔ mun nyɛ kunkuna ayɔpɔi seesi zugu pɔ'a maa ŋɔn ziya maa. Ni nadima ayɔpɔi n nyɛ a gba.

¹⁰ Nadima maa mun sunsukkuni, ba niriba anu pun lu, ka ninvugyinni na bɛ ni, yinni mun na bu paai na, amaa u yi ti paai na sahanseaa u nin yuui beela.

¹¹ Ka bunkɔbgu maa muna - sɔ ŋɔn daa pun bɛ ni ka laa n‑ka ni la - ŋɔna n nyɛ ŋɔn paasi anii daana, halli ka u nyɛ la nadima ayɔpɔi maa sunsukkuni. Ka u wa la baasiyɔri ziiya.

¹² Nyin nya yiila piiya maa muna - tɔ, a gba nyɛ la nadima piiya. Ba na bu di naam, amaa ba nin ti ti ba yiiko, ka ba di naam m‑paasi bunkɔbgu zugu n‑niŋi saha beela.

¹³ Banŋɔ nin ti niŋi nangbanyinni ni taaba, n‑zaŋŋi ba fukumsi ni ba yiiko n‑niŋi bunkɔbbeoo maa nuu ni.

¹⁴ Ka banŋɔ zaa nin ti la'am taaba n‑tuusi Pɛbila maa tɔppu, amaa ka Pɛbila maa nin ti nyaŋŋi ba, dama u nyɛ la dugmadima zaa Dugma ni nadima zaa Naaba. Ka ban bɛ u saani maa nyɛ la ŋɔn booli ninvugseeba maa, ka u yiisi ba ka ba zɛ yummu u nyaaŋŋa.”

¹⁵ Di saha ka malaaka maa daa laa n‑yɛli ma, ni, “Ammi, i nya kooma wa? - kɔseesi pɔ'agoorli la ŋɔn du n‑zi a zugu maa? - tɔ: a nyɛ la tinsi pam niriba, daadam ban la'am n‑zoaai pam, ni yɛttɔ'azuna pam dima, ni bura pam.

¹⁶ Ka nyin nya bunkɔbsɔ ni u yiila piiya seem maa, ban nin laa n‑yaai pɔ'agoorli maa halli nti sa'am u yɛla zaa ka kyɛ u yɔriyɔri, ka ba nin toosi u niŋŋa n‑ŋɔbi ka naayi zaŋŋi din kpalim n‑nyɔ bugum.

¹⁷ Naawunni n daa zaŋŋi lala teesa n‑niŋi ba zaa sufu ni, ni ba ti tum ŋɔn Naawunni yuubu - ni ba ti niŋi nangbanyinni n‑zaŋŋi ba yiiko zaa n‑ti bunkɔbbeoo maa, halli nti paai sahanseaa Naawunni tuma ŋɔn ti tum n‑naai hoo ŋɔn daa pun yɛli seem la.

¹⁸ Halli ka nyin ŋɔn nya pɔ'asɔ la nyɛ la tintitaari maa - tinseaa kan su duniya nadima zaa fukumsi ni yiiko la.”