HIBRUU DIMA 7 - Mampruli

¹ Lala Mɛlikyizɛdɛkka wa daa nyɛ la Salɛm tiŋŋa naaba, ka laa n‑gyeemni Naawunni Ŋɔn Ka Kpeaa, ka maanni u maaligu m‑paasi. Ka Ibrahim ŋɔn daa tuusi tɔppu n‑nyaŋŋi nadima maa n‑naai ka kunna, ŋɔn Mɛlikyizɛdɛkka daa yi na n‑tuusi u soori ka daa susi Naawunni bunsuma n‑ti Ibrahim.

² Din saha ka Ibrahim daa yiisi bunni pii kam zaa puuni bunyinni zakka n‑ti u. Mɛlikyizɛdɛkka mun yuuri gbinni nyɛ la buyi: u mammaŋŋa yuuri gbinni nyɛ la ‘Yɛlimaŋni Naaba’, amaa ba yɛnni m‑paasi, ni, u nyɛ la Salɛm Naaba, ka di gbinni nyɛ la ‘Sufudoaa Naaba’.

³ Luginseaa ka ni n‑wulisi, ni, ŋɔn Mɛlikyizɛdɛkka daa mari u ba, bee u ma, bee u yaadima. Bunseelli mun ka ni n‑wulisi u dɔ'am bee u kum yɛla. Dinzugu u ŋmani la Naawunni Bii maa. U kur ya kpalim n‑gyeemni Naawunni ka maanni sara halli ni saha din ka tariga.

⁴ Ya kur gɔsim n‑nya ŋɔn daa nyɛ ninvugtitaari seem! Halli ti yaaba Ibrahim daa zaŋŋi ŋɔn daa deaai bunseelli kam zaa tɔppu la ni n‑yiisi zakka n‑ti Mɛlikyizɛdɛkka.

⁵ Tɔ; zaaligu wulisiya, ni, Liivai za'anɔri biisi kɔkɔ nin toaai n‑leebi maaligu maanniba. Ban kɔkɔ ka zaaligu wulisi, ni, ba deaari zakka Izraɛli dima saani. Izraɛli dima mun nyɛ ba mabiisi, amaa ba yiisiri zakka n‑ti ba, halli ni ba zaa yaaba n nyɛ Ibrahim maa yɔri.

⁶ Mɛlikyizɛdɛkka daa bu yi Liivai za'anɔri ni na, amaa u daa deaai zakka Ibrahim saani. Ibrahim mun nyɛ sɔ ŋɔn daa deaai Naawunni nangbambasiri, amaa ŋɔn Mɛlikyizɛdɛkka daa susi Naawunni bunsuma n‑ti u.

⁷ Di ka birisigu, ni, ŋɔn galisi n susiri Naawunni bunsuma n‑tiri ninvugsɔ ŋɔn poora.

⁸ Liivai za'anɔri ni maalimaanniba n nyɛ seeba ban kpiira, ka ba deaari zakka. Mɛlikyizɛdɛkka mun kum lahabaari ka ni, dinŋɔna u vu. Litaafi ŋɔn yɛli seem la nla.

⁹ Tɔ; Ibrahim ŋɔn daa yɔ zakka n‑ti Mɛlikyizɛdɛkka la, di nyɛ la kaman hoo u bii Liivai gba daa yɔa, halli ni ŋɔn ni u biisi n nyɛ ban deaari zakka.

¹⁰ Dama Ibrahim ŋɔn daa tuusi Mɛlikyizɛdɛkka soori ni sahanseaa la, ba daa na bu dɔ'ai u ya'aŋŋa Liivai.

¹¹ Tɔ. Liivai maalimaantiri soori maa zugu ka Naawunni daa zaŋŋi zaaligu n‑tisi u niriba Izraɛli dima. Amaa ba tuma maa yi daa toaai n‑kyɛ ka niriba zaani Naawunni tooni ka ka galimni, dinŋɔna di daa bu kpa talasi ni maalimaannisɔ kyɛ na yaasa. Maalimaanna wa nyɛ la sɔ ŋɔn yi la Mɛlikyizɛdɛkka zuliya ni na, pa Aruuna za'anɔri nira.

¹² Dama maalimaantiri soori yi ti takki, di kpa la talasi ni zaaligu gba takki.

^13-14 Ban tɔ'asi maalimaannisɔ yɛla maa n nyɛ ti Dugma Yisa. Amaa u bu yi Liivai za'anɔri ni na, Gyuuda za'anɔri nira n nyɛ u - sɔkam zaa mi lala. Ka lala za'anɔri maa ni sɔ mun na zi n‑leebi maalimaanna m‑maanni sara Naawunni Gyeeŋŋu Yiri ni. Yɛlimaŋni Musa ŋɔn daa tɔ'asiri maalimaanniba yɛla la u daa bu purigi Gyuuda yuuri.

¹⁵ Ka maalimaannisɔ hoo Mɛlikyizɛdɛkka yi daa yi paalu na, dinŋɔna tin tɔ'asiri yɛttɔ'aseelli maa nin yi kasi ka sɔkam baŋŋi.

¹⁶ Pa ninsaala zaaligu zugu ka lala maalimaanna daa di u maalimaantiri, bee, u yaadima za'anɔri tuŋŋu zugu, amaa nyɔvuri seaa kan ka naari la yiiko zugu.

¹⁷ Dama Litaafi yɛliya, ni#:- “I nin di Gyeeŋŋu Toondaana nti bɛ ni saha kam, Ka di dɔlisi Mɛlikyizɛdɛkka zuliya soori ŋɔn nyɛ seem.”

¹⁸ Zaalikurigu la daa ka yaa, ka ku toaai n‑ku ninsaala bukyi. Lala zugu ka Naawunni daa kyɛ ka m‑basi.

¹⁹ Bɔ zugu? - Musa zaaligu maa ŋɔn daa na ku toaai n‑kyɛ ka bunseelli leebi kasi ka ka galimni maa zugu. Dinzugu ka Naawunni daa zaŋŋi tamapaalli n‑zaali zaalikurigu zaani maa ni. Lala tama maa n ya kyɛ ka ti paari Naawunni saani.

²⁰ Din paasi dinŋɔ zugu, Naawunni daa pɔ la pɔri sɔpaalli wa ni. Zaalikurigu soori ni, ba daa bu pɔ pɔri n‑diisiri maalimaanniba.

²¹ Amaa Naawunni ŋɔn daa ya diisi Yisa maalimaanna, u daa daŋŋi m‑pɔ pɔri. Dama di sɔbi n‑dooli, ni#:- “Ti Dugma n pɔ pɔri wa, Ni, ‘I ya nyɛ la maalimaanna Sahaseaa din ka tɔriga.’ U ku laa n‑takki u sufu yaasa.”

²² Naawunni ŋɔn daa pɔ pɔseaa wa zugu ka ti baŋŋi, ni, Yisa ŋɔn zaali nangbambasipaaliseaa la gaari zaalikurigu la.

²³ Din paasi nŋɔa: maalimaanniba wa pam n daa bɛ ni, dama ba daa kpiiri ni. Sɔ daa yi naai la u tuma ka sɔ daa deaai u.

²⁴ Yisa mun bɛ la saha din ka tɔriga. Dizugu u pa la sɔ ŋɔn bakki ka sɔ zaani u zaanni ni m‑maali sara.

²⁵ Lala zugu ka u mari yiiko ka di nin toaai n‑tuligi bankam paai u ka u zi ba n‑kyaŋŋi Naawunni saani la, pampaŋŋɔ ni saha zaa. U vu la saha din ka naari n‑zɔri Naawunni sindaani ba zugu.

²⁶ Yisa ŋɔn yi leebi ti Gyeeŋŋu Toondaana wa - tɔ! lala kɔkɔ ka ti nin ku ti bukaata zaa. U nyɛ la kasi. U ka taaliseaa bee ala'akyi. U beebu ni ka Naawunni wɔligi u n‑zaali u kɔkɔ n‑kyɛ tumbeeri dima. Halli gba u daa duusi u saazugu n‑yakki sangbana zugu.

²⁷ U bu ŋmani la Gyeeŋŋu Toondaandima wa. Dama dabsiri kam ba yi daŋŋni m‑maanni la sara ba mammaŋŋa ala'akyi zugu, ka naayi maali niriba zugu. Amaa Yisa daa maali sara yinni, u daa maali yimmu n‑ti ninsaalikam, ŋɔn daa zaŋŋi u maŋŋa n‑tisi la.

²⁸ Musa zaaligu puuni ba daa gaŋŋni la ninsaala dima, baseeba gbarigi ka mari galimni, n‑diisiri ba Gyeeŋŋu Toondaandima. Amaa di nyaaŋŋa Naawunni daa pɔ la pɔri ka diisi u Bii maa. Ŋɔna n ka galimni saha din ka baasigu.