HIBRUU DIMA 3 - Mampruli

¹ M mabiisi, ya nyɛ la Naawunni dinni ka nyɛ kasi; ka ya gba ka Naawunni daa booli ka ya sakki. Tɔ! - ya teaama sɔ ŋɔn nyɛ ti toondaana yɛla - di nyɛ la: sɔ tin sakki u yɛla, ni, ti tuumu n nyɛ u, ni ti gyeeŋŋu toondaana - Yisa nla.

² U daa zaani yummu n‑ti Ŋɔn yiisi u n‑zaali maa, kaman Musa gba ŋɔn daa zaani yummu u Naawunni gyeeŋŋu duu puuni tuma ni seem la.

³ Amaa Masiiya nyɛ la ŋɔn sumsi ni u mari gyirima n‑gaari Musa, kaman tammeera ŋɔn mari gyirima n‑gaari yiri seaa ŋɔn mɛ seem la.

⁴ Yiri kam mari la ninvugsɔ ŋɔn mɛ ka, amaa Naawunni n nyɛ ŋɔn mɛ bunseelli kam zaa.

⁵ Ŋɔn Musa daa zaani yummu hoo kpambari Naawunni yiri maa zaa ni, bee, hoo wuddaana, ni u ti niŋi sɛhara zaŋŋi n‑kyaŋŋi Naawunni ŋɔn ya n‑tɔ'asi yɛliseesi la.

⁶ Yisa Masiiya mun bɛ la Naawunni yiri ni hoo yiddaana biiya, ka tirima muna - ti yi ti mari sufukpeemni ni nimbirimoaa - tirima mun nyɛ la hoo yiri dima maa, see ka ti laa n‑niŋi tin mari tamaseaa maa yɛdda, zaŋŋi n‑kyaŋŋi di baasigu.

⁷ Dizugu ka Naawunni Sii Vuusim Kasi teaari n‑yɛtta#:- “Ya yi wum Naawunni kukɔri zuna dabsiri wa,

⁸ Ya miri ka ya mari tuppuwumni, Kaman ya Izraɛli dima ŋɔn daa mari seem, n‑nya galinsi yoo maa ni sahanseaa la, Yan daa zamsi ma la zugu.

⁹ Bɛni ka ya yaadima daa zamsi ma, Halli ni ba daa kur nya man Naawunni tuma maa zaa yɔri -

¹⁰ N tuma ŋɔn daa nyɛ seem yuumpisinaasi puuni la. Di zugu n daa gyɛ suuri n‑niŋi ba zamaani maa ni Halli nti yɛli ba yɛla, ni, ‘Ba sufu teesa ni ka ba kur burigri ni, Ka za'asiri n sɔya dɔligu!’

¹¹ Lala zugu ka n sufu daa yisigi, Ka n daa pɔ noori n‑yɛli#: ‘Ba ku ti nya vuusim ziiya man saani!’ ”

¹² Tɔ: m mabiisi, yan di kyɛ ka ya sɔ mari teesibeeri u sufu ni an birisira ka za'asiri yɛdda niŋbu; lala nin kyɛ ka u yi Naawunni nyaaŋŋa - Naawunni sɔ ŋɔn nyɛ Nyɔvuri Daana.

¹³ Amaa sahanseaa Naawunni Sii Kasi ŋɔn boonni, ni, ‘zuna dabsiri wa’ la, ya kpamsima taaba sufu dabsiri kam, ka di kyɛ ka ya sɔsɔ mari tuppuwumni ka dɔli tumbeeri yɔmsigu yɛla. -

¹⁴ Dama ti yi ti kpalim m‑mari tin daa daŋŋi m‑mari tamaseaa la halli nti paai seelikam baasigu maa, lala nin kyɛ ka ti nyɛ la baseeba ban la'am m‑bɛ Masiiya saani, ka ti zaa teesa nyɛ yummu. -

¹⁵ Hoo tin na pun yɛli seem la, ni#:- “Ya yi wum Naawunni kukɔri zuna dabsiri wa, Ya miri ka ya mari tuppuwumni, Kaman ya Izraɛli dima ŋɔn daa mari seem, ”

¹⁶ Tɔ, ka bandima n‑lee n‑nyɛ ban ‘n daa wum Naawunni kukɔri’ maa ka daa ‘mari tuppuwumni’? - Pa Musa ŋɔn daa zaŋŋi ninvugseeba n‑yi Igyipti tingbaŋŋu ni na zaa la nla?

¹⁷ Ka bandima zugu ka Naawunni daa gyɛ suuri n‑niŋi ba, yuumpisinaasi puuni la? - Pa ninvugseeba ban daa tum tumbeeri la nla? - halli ka ba daa kpi m‑basi yɔri, yoo maa ni.

¹⁸ Ka bandima ka Naawunni daa pɔ noori n‑yɛli ba, ni, ‘Ba ku ti nya vuusim ziiya man saani.’? - Pa ninvugseeba ban daa mari tuppuwumni maa nla?

¹⁹ Tɔ: ka dizugu ti nya ka di nyɛ la ba yɛdda za'asigu zugu ka ba daa bu kpɛ lala vuusim zii maa ni.