GYƆNI 21 - Mampruli

¹ Yɛla wa zaa nyaaŋŋa ka Yisa daa maali n‑wulisi u maŋŋa n‑ti u nyaandɔliba maa yaasa, ka ba daa bɛ Taibiriyasi mɔ'ari ziiya. Di daa niŋi nŋɔa#:-

² Yisa nyaandɔliseeba daa la'am m‑bɛ ni: Piita daa bɛ ni, ni Tɔmaasi, ban daa pa sɔ yupaa, ni, ‘Gyeaa la’ maa, ni Nataniyɛli ŋɔn daa yi Kanna ni na, tinseaa kan zɛ Galilii tingbaŋŋu maa ni; ka Zɛbidii biisi maa daa paasi ba zugu, ni niriba ayi yaasa.

³ Di saha ka Saimoon Piita daa yɛli, ni, “N wa la zaasim gbaabu tuma ni.” Ka ba zaa yɛli u, ni, “Tɔ! Ti gba ya dɔli i n‑kyaŋŋi.” Ka ba daa yi n‑kyaŋŋi mɔ'ari la ziiya n‑kpɛ nyariŋŋu n‑du. Ka ba daa tum halli ka beoo neaai, n‑wɔlim n‑gyɛa. Ba daa bu gbaai halli ziŋŋa yinni.

⁴ N‑neaai beoo asuba pinipini ka Yisa daa zɛ mɔ'agbiriŋŋu ni. Amaa u nyaandɔliba maa daa bu baŋŋi, ni, ŋɔna nla.

⁵ Ka u daa tasi n‑yɛli ba, ni, “M biisi, yee! Ammi, ya gbaai la bundira?”, ka ba labsi n‑yɛli u, ni, “Ay!”

⁶ Ni, “Tɔ: see ka ya zaŋŋi laaŋŋu maa n‑lɔbi nyariŋŋu maa nudirigu lugri ziiya! Lala ka ya nin ti nya.” Ka ba daa niŋi lala. Ka ba daa yɛli, ni, ba ya voaai laaŋŋu maa n‑niŋi nyariŋŋu puuni, ka vaai n‑kɔŋŋi, dama zimi pampam daa bɛ ka ni, ka ba daa bu nyaŋŋi n‑voaara.

⁷ Di saha ka nyaandɔlisɔ Yisa ŋɔn daa wuri pam la daa ti yɛli Piita, ni, “Ti Dugma nla!” Ka Saimoon Piita ŋɔn daa wum lala maa, u daa yɛ u kparigu - dama u daa pun yeaai ka, ni u tumna - ka yikki n‑lu mɔ'ari koom maa ni.

⁸ Ka u nyaandɔlitaaba daa duusi nyariŋŋu maa n‑dɔli u nyaaŋŋa: ba daa mari laaŋŋu maa, ni zimi maa, n‑darigri halli nti paai mɔ'aduuri maa na: di daa bu wɔ'a gba.

⁹ Ba daa paaya, nti nya bugunsaala, ka zaasim beela ni paanu daa tɔm ka zugu n‑seera.

¹⁰ Ka Yisa daa yɛli ba, “Ya zaŋŋi yan na pun gbaai zinseesi la na!”

¹¹ Di saha ka Saimoon Piita daa labi n‑kpɛ nyariŋŋu maa ni nti gbaai laaŋŋu maa n‑darigi n‑niŋi tinkuumni maa ni. Zimi pam n daa bɛ ka puuni, bunkara zaa, ka a daa paai zinkɔbga ni pisinu ni ata: ka di zaa yɔri, laaŋŋu maa daa bu sa'am a tibsim zugu.

¹² Ka Yisa daa yɛli ba, ni, “N zuusi ya! Ya kyɛm na n‑su noori!” Ka vi daa mari ba ka ba daa bu boosi u, ni, “Nyin n nyɛ ŋɔni?”, dama ba daa mi, ni, ti Dugma n‑daa la.

¹³ Ka Yisa daa zaŋŋi paanu maa n‑ti ba na, ni zinseera gba.

¹⁴ Tɔ: Yisa ŋɔn daa wulisi u maŋŋa n‑ti u nyaandɔliba, ni, u yisigi kum ni na, zii napɔmbuta n‑daa la.

¹⁵ Ka ban daa di n‑naai maa, Yisa daa yɛli Saimoon Piita, ni, “Saimoon, nyin Gyɔni bii wa, i wuri ma n‑gaari niriba wa, bee?” Ka u daa yɛli, “Ii, n Dugma, i mi, ni, n nyɛ la i zɔa.” Ka u yɛli u, ni, “Wubsima n pɛbisi wa.”

¹⁶ Ka u daa maali n‑yɛli u yaasa, ni, “Saimoon, nyin Gyɔni bii wa, i wuri ma, bee?” Ka u daa yɛli, “Ii, n Dugma; i mi, ni, n nyɛ la i zɔa.” Ka u yɛli u, “Kur guri n peesi.”

¹⁷ Ka u maali n‑yɛli u napɔmbuta daana, ni, “Saimoon, nyin Gyɔni bii wa, ammi, i siri nyɛ la n zɔa?” Di saha ka Piita sufu daa bu maai, Yisa ŋɔn boosi u di napɔmbuta wa, ni, u zɔ n nyɛ u, bee? Di zugu u daa labsi n‑yɛli u, ni, “I mi n yɛla halli zaa, n Dugma; ka baŋŋi, ni, n nyɛ la i zɔa.” Ka Yisa yɛli u, “Kur wubsiri n peesi maa.”

¹⁸ Ni, “Yɛlimaŋni ka n yɛtti i wa, ni, nyin ŋɔn daa nyɛ na'akyimbila, i daa bɔbi i maŋŋa n‑kyaŋŋi i sufu yuubu kyɛnni, amaa nyin yi ti kurigi maa i nin teaai i nuusi ka ba nin yeeli i n‑taasi i ya'aseaa i sufu ŋɔn bu boora.”

¹⁹ Yisa ŋɔn daa yɛli u lala, u daa wulisiri la u kum soori yɛla n‑tiri u, ni, lala ka u nin ti ti Naawunni gyirima. Ka naayi yɛli u, ni, “Kur dɔli n nyaaŋŋa.”

²⁰ Di saha ka nyaandɔlisɔ Yisa ŋɔn daa wuri pam la daa bɛ bɛni, ka Piita daa ŋmaligi n‑gɔsi n‑nya nyaandɔla wa ka u dɔli la ŋɔn ni Yisa nyaaŋŋa ka ba sɔsira: dɔsɔ ŋɔn daa pɔri n‑tabli Yisa saani yuŋŋu Kyuu bundira diibu saha nla, sahanseaa ka u daa vuui m‑paai Yisa saani m‑boosi u, ni, “Ni, ti ninvugsɔ ya figsi i - ka ŋɔni nla, n dugma?”

²¹ Ka Piiya daa nya u ka daa boosi Yisa n‑yɛli, ni, “N Dugma, ka ŋɔnŋɔ fa?”

²² Ka Yisa daa labsi n‑yɛli u, “Halli n yi ti boori ni u kpalim m‑bɛ ni halli ni n ti labi na, pa i yɛlli nla: nyin mun ka n yɛtta - kur dɔli ma!”

²³ Lala maa zugu ka ninvugseeba daa yɛtti taaba, ni, nyaandɔla wa ku kpi: amaa Yisa daa bu yɛli, ni, u ku kpi; u daa yɛli Piita, ni, “Halli n yi ti boori ni doo wa kpalim m‑bɛ ni halli ni n ti labi na, pa i yɛlli nla.”

²⁴ [Ŋɔna n nyɛ Yisa nyaandɔlisɔ ŋɔn daa nya anŋɔ zaa n‑sɔbi n‑ti ti la; ka tin mun mi, ni, ŋɔn wulisi seem wa zaa nyɛ la yɛlimaŋni.]

²⁵ Tɔ; ka Yisa daa tum tuntumsa pam m‑paasi anŋɔ zugu. A zaa yi ti sɔbi n‑dooli yinniyinni, n bu teesi, ni, paalu naa m‑bɛ duniya wa zaa puuni ni ba ti mari lala litaafidima maa n‑su.