GYƆNI 13 - Mampruli

¹ Ban daa ti piili m‑puusi Yakki-n‑Gaari Kyuu maa sahanseaa la, Yisa ni u nyaandɔliba n daa bɛ ni: u daa baŋŋiya, ni, saha maa paaya ni u bakki ka kyɛ duniya wa n‑kyaŋŋi u Ba saani. Ka ŋɔn daa pun wuri u niriba wa seem la - baseeba ban ya kpalim m‑bɛ duniya wa puuni maa - u daa na wuri ba halli ni u yaa tariga.

² Di saha ka Sintaani daa kpɛ Gyuudasi sufu ni, ŋɔn Saimoon Isikariyɔti bii la, ni u ti kyɛ ka u zaŋŋi u sufu ni teesibeeri n‑gbaai Yisa figsigu la. U daa pun niŋi lala pɔi, ka ba naayi la'am ni ba ti di.

³ Yisa mun daa mi halli, ni, u Ba Naawunni pun zaŋŋi bunseelikam zaa n‑tisi u nuu ni; ka laa m‑mi, ni, u daa yi ŋɔn Naawunni saani na ka ya labi n‑kyaŋŋi u saani yaasa.

⁴ Ka dinŋɔna u daa doaai bundira diibu zii la ni n‑zaani nti yeaai u kparigu ka zaŋŋi bɔduuwa n‑lɔ u seaa ni.

⁵ Ka naayi zaŋŋi koom n‑niŋi tasilaa la ni n‑gbaai u nyaandɔliba nɔba peaari; ka u daa zaŋŋi bɔduuwa la n‑nyeesi n‑nyeesi a n‑ti ba.

⁶ U daa niŋi lala nti paai Saimoon Piita saani na: ka ŋɔn Piita daa yɛli u, ni, “Kala, n dugma, i ya peaai la man nɔba bee?”

⁷ Ka Yisa daa labsi n‑yɛli u, ni, “Man ŋɔn niŋni seem maa muna, i ku toaai m‑baŋŋi di gbinni pampaŋŋɔa; di nyaaŋŋa ka i nin ti baŋŋi.”

⁸ Ka Piita yɛli, “Ay, n ku sakki ni i peaai n nɔba la, halli sahakam!” Ka Yisa yɛli u, ni, “N yi bu peaai i, i nuu laa n‑ka n yɛla ni.”

⁹ Ka ŋɔn Saimoon Piita daa yɛli, ni, “Tɔ, n dugma! Ka dinŋɔna pa n nɔba kɔkɔ ka i ti ya peaai - see ka i peaai n nuusi ni n zugu m‑paasi!”

¹⁰ Ka Yisa yɛli, ni, “Ninvugsɔ ŋɔn pun su koom, di daama bu laa m‑boori suubu yaasa, amaa u peaai u nɔba kɔkɔa. Lala nin kyɛ ka u leebi bunveelli kasi zaa.” Ni, “Ii, ya siri nyɛ la ninvugseeba ban peaai kasikasi. Amaa pa ya zaa.”

¹¹ (U daa pun baŋŋi dɔsɔ ŋɔn ya figsi u la yɛla, ka lala zugu ka u daa yɛli, ni, pa ba zaa n nyɛ ninvugveela kasikasi.)

¹² Tɔ: ka ŋɔn daa peaai ba zaa n‑naai maa, u daa maali n‑yɛ u kparigu n‑labi bundira diibu ziiya. Di saha ka u daa yɛli ba, ni, “Ammi, ya baŋŋi man ŋɔn niŋi ya seem maa?

¹³ Tɔ, di gbinni nŋɔa#:- Ya boonni ma la, ni, ya karimba ni ya dugma, bee m ma'ai ni? Ka yan yɛtti seem wa, di mari soori, dama man nyɛ la lala n‑ti ya.

¹⁴ Tɔ, ka mani, ya karimba ni ya dugma la, n peaai ya nɔba n‑ti ya - ka di gbinni nyɛ la: see ka yarim zaa gba ti peaari ya taaba nɔba n‑tiri ba.

¹⁵ N tum tuma wa n‑ti ya ni n ti wulisi ya ya tunsuŋŋu soori ŋɔn nyɛ seem la, ka ya gba ti tumni lala.

¹⁶ Yɛlimaŋni ka n yɛtti ya wa, ni, daabri bu kpeem u dugma, bee, tuumu n‑kpeem ŋɔn tum u.

¹⁷ Anŋɔ zaa ka ya pun baŋŋi: tɔ, zugsuŋŋu nin bɛ ni n‑ti ya, ka di nyɛ la yan wumni a n‑dɔli a maa.

¹⁸ Pa ya zaa yɛla ka n yɛtti maa: man mi man gamsi ninvugseeba la. See ka din daa sɔbi n‑dooli maa siri nin ti niŋi lala, ni: ‘Man ni ninvugsɔ ŋɔn la'amni n‑diri diibu ni taaba, di daama yi la n nyaaŋŋa nti sa'am n yɛla.’ ”

¹⁹ Ni, “Pampaŋŋɔ n daŋŋi n‑wulisiri anŋɔ zaa n‑tiri ya pɔi, ka a ti naayi niŋi. Ka dizugu a yi ti siri niŋi lala, ya nin baŋŋi n‑niŋi yɛdda, ni, ‘mani n nyɛ Man Ŋɔn Bɛ ni maa’.

²⁰ Yɛlimaŋni ka n yɛtti ya wa, ni, ninvugsɔ ŋɔn ya n‑deaai n tuumusɔ suŋŋa, mani ka u deaara; halli ni ninvugsɔ ŋɔn deaari ma muna - Sɔ ŋɔn tum ma gba ka u deaara.”

²¹ Yisa ŋɔn daa yɛli dinŋɔ n‑naai maa, sufusa'aŋŋu daa ti gbaai u, ka u daa yɛli u noori yɛlimaŋni zaa, ni, “Ya sɔ n yɛ koosi ma n‑figsi ma.”

²² Ka u nyaandɔliba maa sufu daa gyɛtta, ka ba gɔsiri taaba m‑birisiri ni ba ti baŋŋi sɔ maa.

²³ Ka Yisa nyaandɔlisɔ daa pɔri n‑tabli u saani; ŋɔn daa wuri pam sɔ n‑daa la.

²⁴ Ka Saimoon Piita daa bugsi n‑yɛli doo wa, ni, u boosima Yisa m‑baŋŋi ŋɔn tɔ'asiri sɔ yɛla maa.

²⁵ Di saha ka nyaandɔla maa daa vuui m‑paai Yisa n‑sɔ'ai m‑boosi u, ni, “Ŋɔni nla, n dugma?”

²⁶ Ka Yisa daa labsi n‑yɛli u, “I yi ti nya ka n ŋmaai diibu n‑sugi laa ni n‑zaŋŋi n‑ti sɔa - tɔ, ŋɔna nla.” Ka u daa ŋmaai n‑sugi ka zaŋŋi n‑ti Gyuudasi, Saimoon Isikariyɔti bii la.

²⁷ Ka Gyuudasi ŋɔn daa deaai diibu la n‑naai, di saha ka Sintaani daa kpɛ u sufu ni. Ka Yisa yɛli u, “Nyin ŋɔn ya tum seelli maa, tumma yooma!”

²⁸ U nyaandɔliba maa mun daa bu mi u yɛligu wa gbinni.

²⁹ Halli Gyuudasi daa su ba la'abooriga yɛla, ka baseeba daa yɛtti, ni, Yisa tɔ'asiri ligri yɛttɔ'a n‑ti u, ni, u kyɛma nti da ba kyuu neema an kpalim na, bee, n‑yiisi zakka n‑ti faradima.

³⁰ Tɔ, ka Gyuudasi daa deaai diibu la ka doaai yooma n‑yi. Di saha ka yuŋŋu daa zibi zimm.

³¹ Gyuudasi ŋɔn daa bakki n‑naai la, Yisa daa yɛli ba, ni, “Pampaŋŋɔ ka Ninsaala Bii maa gyirima yɛ yi paalu. Ka Naawunni gba gyirima yi paalu u saani na.

³² Ka din bɛ la lala zugu, dinŋɔna Naawunni nin kasigi ka u gyirima ti yi paalu Ninsaala Bii la saani, halli yoomyooma ka u nin niŋi lala.”

³³ Ni, “M biisi, n ku laa n‑yuui ya saani: di kpalim la beela ka ya nin ti bɔ m‑bɔ n ziiya n‑gyɛa. Man daa pun yɛli lala n‑ti Yɛhudiya dima maa, ni, man wa seelli maa, ya ku toaai m‑paai bɛni: tɔ, ka pampaŋŋɔ n yɛtti lala n‑tiri ya gba.

³⁴ N zaanni la zaalipaalli n‑tiri ya, ni, ya wuri taaba; hoo man daa wuri ya seem la, yan mun wuri taaba lala.

³⁵ Ya yi siri yɛ wuri taaba lala, dinŋɔna sɔkam zaa nin baŋŋi, ni, ya nyɛ la n nyaandɔliba.”

³⁶ Ka Saimoon Piita daa boosi u n‑yɛli, “Yani ka i wa, n dugma?” Ka Yisa daa gyɛrigi u, ni, “Man n wa seelli maa, i ku toaai n‑dɔli ma m‑paai bɛni pampaŋŋɔa: amaa i nin ti naayi dɔli n nyaaŋŋa m‑paai sahanseaa.”

³⁷ Ka Piita daa laa n‑yɛli u, ni, “N dugma, bɔ n lee n‑kyɛ ka n ku toaai n‑dɔli i pampaŋŋɔa? N sɛ'asiya ni n kpi n‑ti i.”

³⁸ Ka Yisa labsi n‑yɛli u, ni, “Ni, i sɛ'asiya ni i kpi n‑ti ma, bee? Ay! - yɛlimaŋni ka n yɛtti i wa, ni, nɔroo sa ku ti kum ka di pa la ka nyin sa nin pun kyiisi napɔmbuta, ni, i bu mi ma.”