GYEEMSI 5 - Mampruli

¹ Pampaŋŋɔ, ya wumma man ya n‑yɛli ya seelli wa, yaseeba ban nyɛ bundaandima maa: ya kumma ka kaasira, dama wahala kyɛnni ya zugu na.

² Ya marigu maa zaa poaai, ka leelisi ŋɔbi ya neema maa zaa n‑yoosi.

³ Ya salima ni ya anzulifa maa zaa nyamiya, ka a nyaŋŋu maa nin ti wulisi ya galiŋŋu ŋɔn bɛ seem. Di nin kpɛ ya ningbina ni n‑vuunni n‑dira hoo bugum. Ya boori la buna ni nimmoaa n‑zaanni a ni, amaa naari dabsa maa pun paai ti na.

⁴ Tuntumniba daa tum ya tuma, amaa ya daa nyɛri ba; ya wumma! - ya lala tumbeeri damni ŋɔn paai saazugu seem! Ba daa la'asi ya puri antaam n‑ti ya na, ka bu deaai sɛseela: ban kumni seem n‑niŋni ya, ya baŋŋma ka ba kunkuma maa lu la ti Dugma Naawunni Ŋɔn Ka Kpeaa tuba ni.

⁵ Duniya wa puuni ya daa bɛ la beesisuŋŋu ka daa diri ya sufu yuubu bundira. Ya diri n‑karigri zaŋŋi n‑kyaŋŋi ya kɔribu daari.

⁶ Halli ya daa kari ban ka galiŋŋu sariya n‑lusi ba, ka ku ba, ka ba daa bu ta'ai ya sufu ni teesa.

⁷ Dizugu, m mabiisi, ya mari sugru ka gbaai ya mansi n‑guri ti Dugma kyɛnni saha na. Ya teaam pukpaara tuma soori, ni, u mari sugru n‑guri u puu bundira ŋɔn ya niŋi seem. Ni, u mari saha n‑guri siga saa maa, ni u ti buri; ka laa n‑guri bundira niŋbu saha saasi maa gba.

⁸ Lala zugu ya gba mari sugru ka di koaai tama, dama ti Dugma nin kyɛ na, u bu ya yuui.

⁹ Dizugu yan di fabinni ni taaba zaŋŋi n‑kyaŋŋi yɛttɔ'abisibisi. Ya baŋŋma, ni, ba nin kari ya sariya di zugu. Sariya Katta ni yɛlimaŋni la nin paai ti na - halli u pun bɛ la za'anɔri ziiya!

¹⁰ M mabiisi, ya baŋŋma anabidima ban daa tɔ'asi ti Dugma yuuri zugu la yɛla. Ba daa zɛ yummu wahala pam puuni. Lala nin ti wulisi ya sugru ŋɔn nyɛ seem.

¹¹ Ya teaama, ni, di nyɛ la seeba ban mari ba maŋŋa maa ka ti yɛtti, ni, ba nya zugsuŋŋu Naawunni saani. Ya pun wum Ayuuba ŋɔn daa gbaai u maŋŋa n‑di sugru seem maa; ka ya mi halli, ti Dugma Naawunni ŋɔn daa naayi tum seem n‑ti u. Dama ti Dugma Naawunni maa nyɛ la wurilim zaa daana ka zɔri niriba namboo.

¹² Di zaa nyaaŋŋa, m mabiisi, yan di poori noori: di pɔ arizana, bee, tingbaŋŋu, bee, seelli kam zaa. Ya kyɛ ka ya ‘Ii’ nyɛ la ‘Ii!’ ka ya ‘Ay!’ nyɛ la ‘Ay!’: di yi pa lala, ba nin kari ya sariya n‑lusi ya.

¹³ Ya sɔ bɛ mugsima ni, bee? U susim Naawunni! Ya sɔ mari sufumaasim, bee? U yuumma pɛ'abu yuuma n‑ti Naawunni!

¹⁴ Ya sɔ beera? U boolim Naawunni niriba kpamma ka ba susi n‑ti u, ka niŋi kpaam n‑soosi u zugu, ti Dugma yuuri maa ni.

¹⁵ Ka wunsusigu yi susi la ni yɛdda, di nin kyɛ ka dooru daana maa nya alaafɛa; ti Dugma nin doaai u. Halli u yi tum la tumbeeri, u nin nya kyɛ-m‑pɛŋŋi.

¹⁶ Dizugu ya yɛlim yan tum taalli seem yɛla n‑ti taaba, ka susi Naawunni n‑ti taaba, ka di nin kyɛ ka ya nya alaafɛa. Ninvugsɔ ŋɔn ka taalli ka susi ni nimmoaa, u susigu mari yaa pam ka u nin nya.

¹⁷ Ilaygya daa kur nyɛ la ninsaala hoo tirima. U daa susi ni sufu yinni, ni, saa di mi, ka saa siri daa bu mi tingbaŋŋu maa ni, ka di daa niŋi yuuma ata ni purigri.

¹⁸ Ka u daa laa n‑susi ka sangbana daa ti tisi saa na, ka tingbaŋŋu maa daa yiisi diibu na.

¹⁹ M mabiisi, di yi pa seem ya sɔ nin ti bɔrigi zaŋŋi n‑kyaŋŋi yɛlimaŋni ziiya, ka u taraansɔ zi u n‑labsi soori ni na.

²⁰ Ya kyɛ ka lala nira baŋŋi dinŋɔa: ni, ŋɔnkam nyaŋŋi n‑kyɛ ka ala'akyi daana kyɛ u tumbeeri maa m‑basi, u yiisi tumbeeri daana wa kum yɛla puuni, ka sɔ'ai la tumbeeri pam taalli.