FAILIIMƆN 1 - Mampruli

¹ Man Pɔla, ŋɔn daa kpɛ sarika Kirisita Yisa Masiiya yɛla zugu, ni ti mabii Timɔti - ti puusiri i ni. Mani Pɔla n‑sɔbri gbaŋŋu wa n‑tiri nyini Failiimɔn, tin la'am n‑tumni Kirisita Yisa tuma la zugu.

² Ti laa m‑puusiri i pɔ'a Siisita Afiiya, ni i bii Akyipusi, ni Yisa nyaandɔliba ban la'amni i yiri puuni la. Akyipusi gba nyɛ la ŋɔn moori n‑dɔla Yisa suŋŋa.

³ Ti Dugma Naawunni ni ti Dugma Yisa suŋŋma i ka ti i sufumaasim.

⁴ Tɔ: m mabii Failiimɔn, man ŋɔn susiri wunsusigu sahanseaa zaa, n yi puusiri Naawunni pam i zugu.

⁵ Dama m mabiisi yɛtti ma, ni, i wuri ti Dugma Yisa pam, ka laa n‑niŋni u yɛdda, ka boori ban nyɛ Yisa nyaandɔliba zaa.

⁶ N laa n‑susiri Naawunni, ni, u kyɛ ka nyin ni ban niŋi yɛdda ka la'am n‑gyeemni Naawunni maa zaa ti mari nangbanyinni. Lala maa nin kyɛ ka i baŋŋi Naawunni ŋɔn zaŋŋi bunsunseesi zaa n‑ti ti Kirisita zugu.

⁷ Nyini Failiimɔn n nyɛ m mabisuŋŋu, ka i boori la Naawunni nyaandɔliba zaa yɛla ka kpamsiri ba sufu n‑tiri ba. Lala zugu ka man gba nya sufupeelli ni sufudoaa.

⁸ Tɔ: ka man ŋɔn su fukumsi seelli Kirisita tuma zugu, m mari soori ni n ti zaali i noori, ni, i tumni din tuusi.

⁹ Amaa man ŋɔn wuri i la zugu ka n susiri i ni, ni, i suŋŋi ma. Ii: man Pɔla, ŋɔn nyɛ Kirisita Yisa kpambari la - halli ka pampaŋŋɔ ba gbaai ma n‑kyaŋŋi nti kpari Yisa yɛla zugu -

¹⁰ man Pɔla yi susiri i n‑tiri Ɔneesima. Ŋɔn daa nyɛ i daabri ka zɔ la zugu ka n sɔbri gbaŋŋu wa n‑tiri i na. N ya yɛli i, ni, u wum n yɛligu, halli man bɛ la dansarika ni zaa yɔri, ka yi niŋni Yisa yɛdda, di zugu u leebi la hoo m biiya.

¹¹ Ŋɔn Ɔneesima yuuri maa gbinni nyɛ la ‘anfaani’, amaa u daa ka anfaani n‑ti i; ŋɔn mun yi niŋi tuuba wa, u mari la anfaani n‑tiri mani ni nyini zaa.

¹² Di zugu ka man Pɔla tumni u, ni u labi i saani na, halli ni n wuri u pampam.

¹³ Halli m boori u kpalim n saani n‑tumni Naawunni tuma maa; lala ka u laa n‑zɛ i zaazii ni n‑suŋŋni ma, ban daa kpari ma lahabasuŋŋu maa zugu la.

¹⁴ Amaa m bu boori ni n niŋi seelli, see ka nyin mammaŋŋa baŋŋi di gbinni. I yi ti baŋŋi, i nin tum din tuusi i toori sufu yuubu zugu, pa la man zaali i lala maa zugu.

¹⁵ Di yi pa seem ka lala zugu ka ŋɔn daa zɔ ka kyɛ i beela maa: ni, u yi ti labi na, i nin mari u halli saha din ka tɔriga.

¹⁶ Pampaŋŋɔ u yi leebi la ti mabiwuttigu, u laa m‑pa daabri, ka lala veela n‑gaari zaa. U nyɛ la m mabiiya, amaa see ka nyin ni ŋɔn lɔ la mabiitiri. N‑gaari lala, ti wuri u hoo dɔsuŋŋu, ka laa n‑wuri u hoo ti Dugma biiya m‑paasi.

¹⁷ Man ni nyin la'am n‑tumni Naawunni tuma. Di zugu deaama u hoo nyin deaai ma seem maa.

¹⁸ U yi sa'am la i bunseelli kam, bee, u di la i samni, nyin yɛlima ma ka n yɔa.

¹⁹ I bu nya? - man Pɔla n sɔbri wa n toori nuu ni: man nin yɔ u samni. Halli man yɛligu ŋɔn daa kyɛ ka i niŋi Naawunni yɛdda maa, ka di zugu i pun di n samni i maŋtoori nyɔvuri zugu.

²⁰ Di zugu kpaŋŋma i maŋŋa n‑kyɛ ka n nya anfaani dinŋɔ zugu: kur kyɛ ka n sufu maai, dama ti zaa nyɛ la Yisa nyaandɔliba.

²¹ N sɔbri gbaŋŋu wa n‑tiri i, dama m baŋŋiya, ni, i nin wum n noori wa, halli ka tum n‑gaari man yɛtti seem wa.

²² Din paasi, n susiri i ni, ni, i maalima duu siri n‑zaali ma. Dama m mari tama, ni, Naawunni nin kyɛ ka ba yiisi ma n‑ti ya na, dama ya susiri Naawunni n‑tiri ma.

²³ Ɛpafraasi gba puusiri i ni. Ŋɔn gba ka ba daa kpari duu, Kirisita Yisa zugu.

²⁴ Maaki, Arisitaakusi, Diimasi, ni Luuki dima zaa puusiri i ni. Man ni ban n la'amni n‑tumni Yisa tuma maa.

²⁵ Ti Dugma Yisa Kirisita Masiiya piinisuma bɛ ya sufu zaa ni.