Matei 1 - Matumbi is Lilaganu Lyayambi’

Lukolo lwa Yesu Kilisitu

¹ Yesu Kilisitu aabelekwi mulukolo lwa Daudi, bu'ka mulukolo lwa Bulaimu. Wu'no nga nsisingwa wa lukolo lwake.

² Bulaimu aampapite Isaki, Isaki aampapite Yakobi, Yakobi aampapite Yuda na alongobe.

³ Yuda aampapite Pelesi na Sela (mau' babe bai Tamali), Pelesi aampapite Esiloni, Esiloni aampapite Lamu,

⁴ Lamu aampapite Aminadabu, Aminadabu aampapite Nashoni, Nashoni aampapite Salimoni,

⁵ Salimoni aampapite Boazi (mau' bake Boazi bai Raabu) Boazi na Ruthu bai abelei ba Obedi, Obedi aampapite Yese,

⁶ Yese aampapite Nkulungwa Daudi. Daudi aampapite Selemani, ywembe mau' bake baai yu'lu' ywaabile nnyumbowe Ulia, Bathsheba.

⁷ Selemani aampapite Leoboamu, Leoboamu aampapite Abiya, Abiya aampapite Asa,

⁸ Asa aampapite Yeoshafati, Yeoshafati aampapite Yoramu, Yolamu aampapite Uzia,

⁹ Uzia aampapite Yotamu, Yotamu aampapite Aazi, Aazi aampapite Ezekia,

¹⁰ Ezekia aampapite Manase, Manase aampapite Amoni, Amoni aampapite Yosia,

¹¹ Yosia aampapite Yekonia na alongobe. Awo waai nsimu wa Ayahudi pelekelwa Babeli kulwami.

¹² Bu'ka pa Ayahudi pelekelwa kulwami Babeli, Yekonia aampapite Shealtieli, Shealtieli aampapite Zelubabeli,

¹³ Zelubabeli aampapite Abihudi, Abihudi aampapite Eliakimu, Eliakimu aampapite Azoli,

¹⁴ Azoli aampapite Sadoki, Sadoki aampapite Akimu, Akimu aampapite Eliudi,

¹⁵ Eliudi aampapite Eleazali, Eleazali aampapite Matani, Matani aampapite Yakobi,

¹⁶ Yakobi aampapite Yusupu, ywaabile nsengowe Malia, mau' bake Yesu ywakemelwa Kilisitu.

¹⁷ Kwa nyo, yumulati ya lubelekwo lwoti bu'ka Bulaimu mpaka Daudi yai ku'mi na nsese, bu'ka Daudi mpaka lu'lu' lwami lwa Babeli yai ku'mi na nsese, bu'ka lu'lu' lwami lwa Babeli mpaka ika kwa Nkosopoli ywakemelwage Kilisitu yai ku'mi na nsese.

Belekwa kwa Yesu

¹⁸ Belekwa kwake Yesu Kilisitu kwaabile nnyanya. Malia mau' bake pabayi'ki'tyanie kobekana na Yusupu, lakini babile balo egelyana, Malia aabonekine abile na ndumbo kwa makakala ga Loo Mpeleteu.

¹⁹ Yusupu aai mundu ywabi'ngi'ya salya ya Nnu'ngu', lakini kwa mwanjaa aakani kumwisiya Malia, aabini kunneka kwa kinunu.

²⁰ Lakini paawasage panga nyo, malaika wa Bwana ngampitya kwa ndi'la yo lota, ngammakia, “Yusupu wa mwana wa Daudi, kaneuyogope kunkobeka Malia, kwa mwanjaa utopelwe wabile nawo aupatike kwa makakala ga Loo Mpeleteu.

²¹ Ywembe aapapa mwana nnalu'me, nawenga wantine lina lyake Yesu, kwa mwanjaa ngaywa aakosopolya bandu bake bu'ka mumasambi gabe.”

²² Ago goti gaapangike li'nga litimi li'lu' liyi'gi'yo lya Bwana kwa lilobe lya nnondoli wa Nnu'ngu' kabaya,

²³ “Lingulya, kigoli aayi'ma ndumbo, nembe aapapa mwana nnalu'me, nabembe bantina lina lyake Emanueli,” (lina li' lilombolya, “Nnu'ngu' pamope natwenga”).

²⁴ Yusupu paayumwike mulugono, aapangite kati mwaalagilwe na malaika wa Bwana na ngantola Malia panga nnyumbowe.

²⁵ Lakini aantangiteli nnyumbowe mpaka Malia paapapite mwana nnalu'me, ngaantina lina lyake Yesu.