Mazhev 26 - Aviel revé St. Maheu troeit é Brehonec Guénet 1858

Pennad XXVI.

¹ Ha goudé m’en doé Jesus per‐laret en ol treu‐zé, e laras d’é zisciplèd:

² Gout e ret penaus e vou Pasq idan deu zé, ha Mab en Dén e vou laqueit étré deourn er béhérion eit bout staguet arh er groéz.

³ Nezé er Pen‐Vêlean hag er Ré‐Quetan ag en Dud hum dolpas é ty er Bêlêg‐Vras, hanhuet Caïphe:

⁴ Eit devis étré‐z‐hai penaus donnet de bén a guemér Jesus hag el laquat d’er marhue.

⁵ Mæs e larent‐ind, n’er heméramb quet épad er gouil, gued eun n’hum sàüéhé en dud inep‐t‐emb.

⁶ Mæs el ma oé nezé Jesus é Bethani, é ty Simon el lovr.

⁷ Ur voès e zas d’er havouèt gued ur lestr guen‐can carguet a lezeu frond huék, ha talvoudus bras, hag er seuillas arh é ben a pe oé doh taul.

⁸ Quement‐cé e zispligeas d’en disciplèd: Perac, e larant‐ind, turel treu él‐cé de goll?

⁹ Guell e vehé bet guerhein kir er lezeu‐zé, ha rein é huèrh d’er beurerion.

¹⁰ Mæs Jesus péhani e hanàué ou chongeu e laras dehai: Perac e ret‐hui poén d’er voès‐cé? un dra vad hi dès groeit ém héver.

¹¹ Rac bout e vou perpet peurerion én hou mesq, mæs mé ne vein quet attàu guet‐n‐oh.

¹² Hag, rac ma telian bout laqueit en douar, hi en dès seuillet arh me horv er lezeu‐cé, aveid me lienein.

¹³ E guirioné, m’el lare d’oh, ne vern é péh léh e vou perdêguet en aviel‐men, conzet e vou gued mêledigueh eid er voés‐cé ag er péh hi dès groeit.

¹⁴ Nezé unan ag en euzec apostol hanhuet Judas Iscariot, e yas de gavouèt er Pen‐Vêlean;

¹⁵ Hag e laras dehai: Petra e rehet‐hui d’eign, ha m’el laquou étré hou teourn? Hag ind e guenias dehou eit quement‐cé tregont péh argand.

¹⁶ Hag a houdevéh ne glasqué meid en tu d’el laquat étré ou deourn.

¹⁷ Mæs d’er hetan a zéieu Pasq, en disciplèd e zas de gavouèt Jesus, hag e laras dehou: Men é vennet‐hui ma campennehemb er péh e zou de vout groeit eit gobér er Pasq.

¹⁸ Ha Jesus e laras tehai: Quêrhet é kær de dy ean‐a‐ean, ha laret dehou: En Eutru e lare d’oh, tostad e ra m’amzér, en hou ty é tan d’hobér er Pasq guet men disciplèd.

¹⁹ Hag en disciplèd e séntas doh Jesus hag e stallas er Pasq.

²⁰ Quentéh el noz, ean hum laquas doh taul gued é zeuzêc disciplèd.

²¹ Hag a pe oént é taibrein, ean e laras dehai: E guirioné m’el lare d’oh, unan a han‐oh em gùerhou.

²² Er gonz‐cé e éo bet un tarh calon aveit hai; ha peb unan a nehai e houlenné guet‐hou: Eutru, ha mé‐é?

²³ Ha Jesus e laras: En hani e laque é zeourn guet‐n‐eign ér plat, hennéh é em gùerhou.

²⁴ Mab en Dén, aveit guir, e ya quit, revé mei scrihuet; Mæs goah d’en dén guet péhani e vou gúerhet Mab en Dén: guell vehé bet d’en dén‐zé ne vezé bet biscoah ganet.

²⁵ Nezé Judas péhani e hùerhas anehou, e houlennas ehué: Eutru: ha mé‐é? Jesus e laras: Hui e hoès el laret.

²⁶ Neoah é pad er goén, Jesus e gueméras bara, er bennigueas, en torras a tameu, hag er hras d’é zisciplèd, én ul laret: Queméret ha daibret: En dra‐men zou me horv.

²⁷ Nezé én ur guemér er halice, ean e drugaréquas é Dad, hag er henias dehai, én ul laret: Ivet ol a nehou.

²⁸ Rac en dra‐men e zou men goaid, er goaid ag en testamant neuhé, péhani vou scuilled eid hilleih, eit ma vou distollet dehai ou féhedeu.

²⁹ A vremen larein e ran d’oh, penaus ne ivein quet mui ag er fréh‐zé ag er huiniêg, bet en dé m’en ivein guet‐n‐oh‐hui a nehué é Ranteleah me Zad.

³⁰ Hag arlerh er ganen a drugaré, ind e yas ar er Manné Olived.

³¹ Nezé Jesus e laras dehai: Ol é gavehet en arben‐a‐lam hineah dré en arben a me ç’hanhue. Rac scrihuet‐é: Me scoei er bugul, hag en devèd e yei de bep tu.

³² Mæs goudé ma vein sàüet a varhue de vihue me yei en hou raug d’er vrô a Galile.

³³ Nezé Pierre e laras: Hag e gavehent ol er réral en arben‐a‐lam dré en arben a hou çhanhue, eid on mé, birhuiquin n’en gavein hanni.

³⁴ Jesus e laras dehou: E guirioné, m’el lare d’oh: Hineah, quênt ma gannou er hog, hui em nahou dré dair guéh.

³⁵ Quentéh Pierre e laras: Hag é vehé ret t’eign merhuel guet‐n‐oh, é guirioné n’hou nahein birhuiquin. Hag en ol disciplèd e laras él d’hou.

³⁶ Nezé Jesus é yas guet‐hai én ul léh hanhuet Gethsemani, hag ean e laras d’é zisciplèd: chomet a‐men é pad ma hein un tamicg a dû eid gobér me feden.

³⁷ Ean e gueméras guet‐hou Pierre ha deu vab Zebede, hag ean e goéhas én ur gloès hag én ur dristedigueah vras.

³⁸ Nezé ean e laras: Glaharus é m’inean bet er marhue: chomet a‐men, dihousquet caër guet‐n’eign.

³⁹ Ean e bellas un tamicg doh‐t‐hai, hag e hum daulas arh é tâl doh en douar eit pedein, én ul laret: Me Zad, mar dès tu, pelleit er halice‐zé doh‐eign: mæs neoah ne veèt quet groeit revé me vennedigueah, mæs revé hou ç’hani.

⁴⁰ Ean e yas arlerh de gavouèd é zisciplèd, hag él m’ou gavas cousquet, ean e laras de Bierre: Petra, ne hoès quet guellet bout dihousquet él d’eign en æriad?

⁴¹ En n’hum dalhet dihousquet ha pedet eit ne gouéhehèt quet én goal‐chongeu. Rag er sperèd e zou bean, hag er hicg e zou goann.

⁴² Ean e bellas doh‐t‐hai a neuhé, hag e hras er beden‐men: Me Zad, mar d’é ret ma ivein er halice‐men, hou vennedigueah revou groeit.

⁴³ Ean e zas en drô devad é zisciplèd, hag ou havas hoah cousquet; rac béet oé ou deulegad gued er housqued.

⁴⁴ Mæs ean ou lausquas, hag hum dennas eit pedein un dairvèd guéh, én ul laret en haval conzeu.

⁴⁵ Nezé ean e zas de gavouèt é zisciplèd, hag e laras dehai: Cousquet bermen ha dischuéhet. Chetu digoéhein e hra en ær, hag é ha Mab en Dén de vout laqueit étré deourn er béherion.

⁴⁶ Sàüet, damb, tost e en hani em gùerhou.

⁴⁷ Ne oé quet hoah laret é gonz a pe tas Judas, unan ag en euzéc, ha guet hou un nivéh a dud guet gleanniér ha bihiér, digasset a berh er Pen‐Vêlean hag aberh er Ré‐Guetan ag en Dud.

⁴⁸ Mæs en hani e hùerhas anehou en doé reit dehai er merche‐men, én ul laret: En hani ma voquein dehou, hennéh‐é, croguet én hou.

⁴⁹ Quentéh, ean e dostas de Jesus, én ul laret: Beah yah, Eutru: hag ean e voquas dehou.

⁵⁰ Ha Jesus e laras dehou: M’ami, de betra é oh‐hui deit a‐men? Nezé ind e dolpas tro ha tro dehou, e groguas én hou, hag en dalhas.

⁵¹ Mæs unan ag er ré oé guet Jesus, e dennas é glean, hag e drohas scoharn unan a dud er Bêlêg‐Bras.

⁵² Nezé Jesus e laras dehou: Chairret ou clean én é léh, rac a guement hum chervige ag er glean, e varhuou dré er glean.

⁵³ Ha credein e ret‐hui n’ellan quet pedein me Zad, hag aben ean e zigassehé d’eign orhpen deuzêc rumad Æled?

⁵⁴ Penaus enta e vou er scritur laquet de vout é guirioné, a p’en dé merchet é‐teli bout él men?

⁵⁵ Nezé Jesus e laras d’er vanden tud‐cé: Deit oh d’em hemér guet gleanniér ha bihier, él pe vehen ul laër. E oén bamdé en hou mesq a pe berdêgué én Ty‐Doué; ha ne hoès quet laqueit dorn ar‐n‐han.

⁵⁶ Mæs quement‐cé n’en dé bet digoéhet meit eit ma vou laquet de vout é guirioné er péh en dès laret er brofædèd. Quentéh é zisciplèd en delézas, hag e déhas.

⁵⁷ Hag en dud en doé queméret Jesus er hassas nezé de dy Caïphe er Bêlêg‐Bras; ino e oé tolpet er Scribed hag er Ré‐Hen ag en Dud.

⁵⁸ Pierre en hélias a ziabel bet porh er Bêlêg‐Bras, è péhani é yas abah hag e chouquas gued er mehuélion, eit guélèd péh tro e guemérehé en treu‐zé.

⁵⁹ Neoah Pen‐Vêlean, hag en ol Sanhedrin e glasqué ur destoni cazus benac enemb de Jesus eid el laquat d’er marhue.

⁶⁰ Mæs ne gavent hanni, deusto neoah me oé deit hilleih a testeu cazus. Mæs én dehuéhan‐tu e tas deu hag e laras:

⁶¹ En den‐zé en dès laret: Me elle dismantein en Ty‐Doué, hag er hleuiat arré é corv tri dé.

⁶² Nezé er Bêlêg‐Bras e zàüas hag e laras dehou: Ne laret‐hui nitra d’er péh e lare en dud‐cé inemb d’oh?

⁶³ Mæs Jesus ne sanné gricq. Nezé er Bêlêg‐Bras e laras dehou: Me hourhemenne d’oh, aberh er gùir Doué, laret t’emb ha hui‐é er Hrouist, mab Doué?

⁶⁴ Jesus e laras dehou: Hui el lare: ha neoah m’el lare d’oh, é huélehet un dé Mab en Dén azéet en tu déheu de vrastæd Doué, é tonnet arh er hogus ag en Nean.

⁶⁵ Nezé er Bêlêg‐Bras e ringuas é zillad, én ul laret: Touïet en dès; de betra hun nès ni hoah hoant a desteu? Cleuet e hoès en touïereah.

⁶⁶ Petra e chonget‐hui a zivout quement‐cé? Talvout e hra er marhue, e larant ol.

⁶⁷ Quentéh é oé bet scopet en é zrem; scoeit a dauleu dourn, hag ur ré benac hum laquas d’er jottadein én ul laret:

⁶⁸ Chrouist, Profæt, diougan pihue en dès ha scoeit?

⁶⁹ Neoah Pierre e oé attàu azéet er mæz ag er porh; nezé ur vatéh e dostas dehou, én ul laret: Hui e oé ehué guet Jesus a Galile.

⁷⁰ Mæs ean en nahas dirac en ol, én ul laret: Ne houyan quet petra e laret.

⁷¹ Ha pe dremené dré en ôr, ur vatéh aral en guélas, hag e laras d’er ré e oé ino: Hinnéh oé ehué guet Jesus a Nazareth.

⁷² Pierre en nahas eid en eilvèd guéh, hag e douïas n’en hanàué quet.

⁷³ Un herradicg arlerh, er ré e oé ino hum dolpas tro‐ha‐tro de Bierre, hag e laras dehou: E guirioné, hui e oé ehué quet en dud‐zé, rac hou lavar en disco réhmad.

⁷⁴ Nezé hum laquas de goal‐bedein ha de douïein ne hanàué quet en den‐zé, ha quentéh er hog e gannas.

⁷⁵ Rac‐tal, e tas chonge de Bierre ag er péh en doé laret Jesus dehou: Quênt ma cannou er hoq, hui em nahou dré dair guéh: hag ean e yas quit er mæz, en dar én é zeulegad, hag ur glahar huerve én é galon.