Mazhev 22 - Aviel revé St. Maheu troeit é Brehonec Guénet 1858

Pennad XXII.

¹ Ha Jesus e gonzas hoah guet lavar‐cuhet, hag e laras tehai:

² Ranteleah en Nean e zou haval d’oh ur roué péhani e venne diméein é vab.

³ Hag e gasse é véhuélion de galhuein d’en æredeu er ré e oé bet pedet; mæs él n’ou doé quet prézet donnet,

⁴ Ean e gassas hoah méhuélion arall eit laret tehai: Campenet e mès ur prèd, lahet e mès en éhein, hag er péh em boé laqueit de lardein; daré‐é ol en treu, deit d’en æréd.

⁵ Mæs ind e yas peb unan d’é dû, lod arh er mæzeu, ha lod d’ou marhadeu.

⁶ Lod aral e hum gueméras doh méhuélion er roué, ha goudé m’ou doé ind goal‐casset é peb tu, ind ou laquas d’er marhue,

⁷ A pe gleuas quement‐cé er roué hum laquas én arfleu, hag e gassas é vrézélision péré e lahas er lahérion‐zé, hag e losquas hou hær.

⁸ Nezé ean e laras d’é véhuélion: Peb tra zou daré eid en æred, mæs er ré e oé bet pedet ne tallan quet er boén bout ag en æred.

⁹ Quêrhet enta dré én henteu, ha pedet ol er ré e gavehet.

¹⁰ Hag é véhuélion e yas enta dré en henteu, hag e dolpas mad a fall, él m’ou doé cavet, ha sal en æred e zas de vout lan a dud doh taul.

¹¹ Mæs a pe zas er roué, ean e huélas doh taul unan ha n’en doé quet é husquemant æreden.

¹² M’ami, émé er roué, pérac e hoh hui deit a‐men hemb hou cusquemant æreden? En dén‐zé e chomas hemb sannein gricq.

¹³ Nezé e roué e laras d’é véhuélion: Staguet ean dré en trèd hag en deourn ha taulet ean én tihoéldæd a zianvez: azé e vou dareu ha tarhereah dént.

¹⁴ Rac paud mad e zou galhuet, ha dibaud e zou difforhet.

¹⁵ Nezé er Pharisiénèd hum gonzas étré‐z‐hai eid cavoued en tu de dapoud Jesus en é gonzeu.

¹⁶ Ind e zaveias enta lod a ou disciplèd, gued Herodianèd eid laret tehou: Eutru, goud e hramb é laret perpet er huirioné, hag é quelenet lézen Doué quer clous d’ur ré él d’er ré rall, ha hui e hoès en haval caranté eid en ol.

¹⁷ Laret t’emb enta hou chonge ar guement‐men: Ha deliein é hrér, ya pé naren, paiein en tribut de Cesar?

¹⁸ Mæs Jesus péhani e hanàué ou fallanté e laras tehai: Tud lan a gùeuïér, perac en em anzéet‐hui?

¹⁹ Discoeit t’eign er péh argant e zeliet paiein de Cesar. Ind e hras dehou un dinær.

²⁰ Nezé Jesus e laras dehai: Péh havaledigueah ha péh hanhue e zou merchet ar er péh‐cé?

²¹ Havaledigueah ha hanhue Cesar, é mé ind; Hama, emé Jesus, daccoret de Cesar er péh e zou de Cesar, ha de Zoué er péh e zou de Zoué.

²² Ha pe ind e gleuas quemént‐cé e oent souéhet bras, hag arlerh en dont lézet anehou, ind e yas quit.

²³ En dé‐zé er Saducénèd peré e lare ne zàüou quet en dud a varhue de vihue, e zas d’en gavouèt, hag ind e houlennas en dra‐men guet‐hou:

²⁴ En ul laret: Eutru, Moïse en dès laret: Mar marhue unan benac hemp bugalé, re ziméiou é vrér d’é voés aveid digass hâd d’é vrér.

²⁵ Mæs bout e oé en ou mésq seih brér; hag er hetan goudé bout bed diméiet d’ur voés, e varhuas; hag él n’en doé quet a hâd, ean e lausquas é prièd d’é vrér.

²⁶ El‐cé e digoéhas d’en eil, d’en drivèd betig en seihvèd.

²⁷ En dehuéhan ol er voés e varhuas ehué.

²⁸ Mæs a pe zàüou en dud a varhue de vihue, a béhani er seih‐zé, e vou‐hi prièd? Rac ind ol ou dès bet anehi.

²⁹ Mæs Jesus e rescondas hag e laras tehai: Hum fariat e hret, ha ne hanaùet quet er Scritur na guelloud en Eutru Doné.

³⁰ Rac pe sàüou en dud a varhue de vihue, ne vou mui diméet hanni, hag hanni n’en dou prièd er bet; mæs en ol e vou él Æled ér Baraouis.

³¹ A zivout er sehuel ag er ré varhue de vihue, ha ne hoès hui leinet er péh e zou scrihuet, pe lare d’oh en Eutru Doué:

³² Me zou Doué Abraham, Doué Izaac, ha Doué Jacob. Ean e zou Doué, naren ag er ré varhue, mæs er ré vihue.

³³ Hag er boble e chomas bâmet, é cleuet er honzeu‐zé.

³⁴ Mæs a pe gleuas er Pharisiénèd en doé Jesus laqueit er Saducénèd de cherrein ou bêg, ind e zas ol d’er havouèd.

³⁵ Hag unan a nehai, den ag el lézen, e houlennas guet‐hou, é sigur en anzéein,

³⁶ Eutru, péhani é er guetan gourhemen ag el lézen?

³⁷ Jesus e laras tehou: Hui e gârou hou Toué a ol hou calon, a ol hou sperèd, hag a ol hou ç’inean:

³⁸ Hennéh‐é er guetan hag er vrassan gourhemen.

³⁹ Ha chetu en eil péhani e zou haval doh honnéh: Hui e garou hou nessan él oh hou ç’hunan.

⁴⁰ En nihue hourhemen‐zé é ma ol el lézen hag er brofætèd.

⁴¹ Nezé er Pharisiénèd en hum dolpas, ha Jesus e houlennas dehai:

⁴² En ul laret: Petra e chonget‐hui ag er Chrouist? De bihue é‐ma ean mab? De Zavid, e m’ind‐i.

⁴³ Hag ean e laras tehai: Penaus enta David, dré er Sperèd, en er galhue ean é Eutru, én ul laret:

⁴⁴ En Eutru en dés laret d’em Eutru: Azéet én tu déheu d’eign, bet que n’em bou laqueit hou ç’énebourion idan hou treid.

⁴⁵ Mar er galhue enta David é Eutru, penaus é‐ma ean é vab?

⁴⁶ Ha dén ne zeuhanteras guir dehou: hag a houdevèh dén ne gredas en aterçein.