ZAKARIYA 7 - BIBALDA TA PELDETTA

Laata

¹ Hay busata fiɗita vi Dariyus hay mulda, Ma-Vatɗina di yoboyn co tam Zakariya, kayn hay buurta fiɗita vi til ma zleeŋena ma yum ala Kisilev.

² Sum sa hay Betel cuk Saretser hiɗi Regum-Melek, hiɗi sum segen kuɗsiya kay nisi tuɗ tiy tam Ma-Vatɗina.

³ Kay nisi di tam muliyan-sa-ɗifinna sa ka hay ziyna vi Ma-Vatɗina hiɗi sa jobta kaw ala: Wulin kayn numa ma tiya hay til ma vaslna, numa tel tuwma kay ci niy kaw ki numa li hay busat ŋol kayn nala su?

⁴ Ma-Vatɗina vi vok-ma-duura di yoboyn tanu, nam dan ala:

⁵ Naŋ ma di tam sum sa hay nagat kafe, tam muliyan sa ɗifinna kaw ala: Hay li ma nigi li laata, nigi tiya kaw hay til ma vaslna hiɗi til ma siɗiyana, nigi li kayni dok-dok ta-ta busat dok-siɗiya, nigi lum kayn man nan su?

⁶ Hay li ma nigi ka ti'e ci kaw, kayni kuɗ minda vigiɗi su?

⁷ Yoboyn ma Ma-Vatɗin dum hiɗi del sa jobta sa jewna nigi may humumɗi su? Kayn hay li ma Yerusalem ka hiɗi sumun haya' tuwa, winek may haya' tuwaɗina, hay li ma hoyok-ziyna va' ma gurayn ka ŋuyi ta' tuwa, hay li ma galla va' ma kayamna hiɗi liyn ma beɗna ka hiɗi ziyn hayam tuwa?

Yita kay kitata ta ɗigerta

⁸ Ma-Vatɗina di yoboyn tam Zakariya ala:

⁹ Humaŋ va ma Ma-Vatɗin vi vok-ma-duur di'e: Kaagi kitat hay hagata va'a, ligi ŋaata hiɗi slugot jar-tuwgiya.

¹⁰ Ligi ŋal hiɗi cata duhulta hiɗi sa ma kuyuna, sa ma pulla hiɗi sa ma hawna, nigi ma curoɗsiɗi. Sa var law ma joo'o kay niramna hay dikamɗi.

¹¹ May nisi min jak humsi kat dita valamɗi, nisi ŋel humsi goyo, min hum noŋɗi.

¹² Nisi muɗ diksi ɗeŋ ki kawayn nala. Gatta hiɗi yoboyn ma Ma-vaɗina vi vok-ma-duura di tisiya hiɗi dikam kaf hay vun sa jobta sa jewna nisi min huma' noŋɗi. Nala Ma-vatɗina vi vok-ma-duura dikam ɓulak tisi ŋolo.

¹³ Hay li ma nan yisiya, nisi min humanɗi, nala nan kaw hay li ma nisi min yanu nan min humsiɗi kaw. Din mi Ma-Vatɗina vi vok-ma-duura.

¹⁴ Nan mersiyawa goy kafe jar jaf ma nisi wumɗina, nagat ɓulakawa goy bugolsiya. Nagat muɗi kayni sa ma tuɗa hot kaw may haya' loɗi, nagat ta ŋaata nisi muɗa'awa goy liyn ma hiweŋ' ɦawa'a.