ZAKARIYA 14 - BIBALDA TA PELDETTA

Buura vi Ma-Vatɗina

¹ Ɗuwgiya, buura vi Ma-Vatɗin ka co'o, sle ma ɓuraŋŋa ma ɓurawam kulo hay Yerusalem.

² Nan ma tok jaf-sumun kaf, kay nisi tuɗ mok Yerusalem. Sumun ma sli hoyok-ziyna, nisi ma vurum sle ma hay ziyn kafe, nisi ma bur hiɗi boyn dono'o; galla vi sum sa kulo hay Yerusalemna ma tuɗ goy gorvo'o, may dir sum sa hin kulo hay hoyok-ziyna ma vat goy kafɗi.

³ Ma-Vatɗina ma vul tuwami goyo, nam ma dur sum nisina, ki nam ka li hay buura vi duur ŋolla nala.

⁴ Hay buur namna ɗawni selem ma cuk gaa kay hiɗiyta vi Olive, ta ka ɗiger vok Yerusalem hay gal ma kuɗuwna; hiɗiyt-Olive ma mun gaa ja ɗiger, gal ma kuɗuwn valamu, gal ma vulatina valamu, zul ŋolla ma jugo' gaa waya'a. Galla vi hiɗiyn ma jaŋ hay gal gaa'a, galla valam hena ma jaŋ hay gal ma kayamna.

⁵ Hay na'ta nigi ma jaŋ gaa hay liy ma beɗna vi hiɗiyna kay liyn ma beɗna ma dab ta-ta gaa hay Atsal. Nigi ma mun jaŋi, ki nigi jaŋ hay buur ma wira vi nagat li'e hay buura vi Oziyas mul ma Yudana nala. Ma-Vatɗina Lawna van ma co'o hiɗi sa peldetna valam pet kuɗumu.

⁶ Hay buur namna ɗawni, sle ma vul haraŋ kulon can muɗ may loɗi, sleɗna hiɗi mogoyna ma li ŋolo.

⁷ Buur namna ɗawni mi buur ma goy ir valamu. Buur namna wum mi Ma-Vatɗin kepe, buur namna henje may hayamɗi, falay may hayamɗi lay. May hay vulatita haraŋa ma vul tuwam goyo.

⁸ Awa, hay buur namna ɗawni, niy-ma-irina ma riŋ goyo hay Yerusalem pa, galam hena ma jaŋ hay niy ma gal kuɗuwna, galam hena ma jaŋ hay niy ma gal hena; liyn ma li ki hay walda nala.

⁹ Hay buur namna ɗawni, Ma-Vatɗin ma ti mul kay nagat kuɗulu. Hay buur namna ɗawni, hin mul ɗawn mi Ma-Vatɗin Lawn kepe, semda valam hin ɗawn na' kepe.

¹⁰ Yam nagat kaf ma hot gaa beɗe, tun caw hay Geba ta-ta hay Rimmon, hay gal ma kayamna vi Yerusalem, yam Yerusalem ma day kulo'o, ma hot kulo hay liya'na ma jewna, tun caw ay hay vun-galana vi Benyamin pa, ta-ta hay vun-gala ma jewna, ta-ta hay vun galana ma yum Gefna, tun caw ay hay gulmunna vi Hananeel pa, ta-ta hay liyn ma kesl gulda-guldana vi mulla.

¹¹ Sumun ma li ziy kulo hay Yerusalem, va ma telay ma li kulo haya' loɗi, Yerusalem ma mus hay sle'ta.

¹² Sum sa dur hiɗi Yerusalemna, Ma-Vatɗina ma watsi hiɗi bakmarana, sliwsi ma tisin ma loɗ goyo, yak goy gaa'a hay li ma nisi ka kulo kay sesi tuwa zawna, irsi ma loɗ goy hay zulamu, hay li ma nisi ka kulo kay sesi tuwa, sinsi ma loɗ kalaf hay vunsiya, hay li ma nisi ka kulo kay sesi tuwa.

¹³ hay buur namna ɗawni, Ma-Vatɗina ma gi gijum-gijumta ŋolda gaa jarsiya, gigekaw ma gar a jik niramna, nisi ma li tuwsi joo'o jar-tuwsiya.

¹⁴ Sa fi Yudana ma li duur kulo hay Yerusalem, nisi ma tok farayna vi sum sa ziysi ŋuyi tisin noŋ kaf, ora, gurjuta hiɗi sligara nisi ma yawam ŋolo.

¹⁵ Bakmara namna ma jok kuɗ kulumayna, kuɗ kulumay-kurona, kuɗ lamgana, kuɗ kurona, kuɗ muuriyana ma ka toki hay fara namna kafe, bakmara namna ma sli tuwam nala.

¹⁶ Dir sumun ma hini kuɗ sum sa co kay sur Yerusalemna, ma tuɗ kulo haya' busat kaf kay girif gaa vok mulla, Ma-Vatɗina vi vok-ma-duura, kay li Yuldeta vi guɗukŋa.

¹⁷ La jaf-sum sara ka'a, min tuɗ kulo hay Yerusalem, kay girif mulla, Ma-Vatɗina vi vok-ma-duuraɗi, niyn ma si kay nagata visiɗi.

¹⁸ La jafna vi Egipte min tu'ɗi, la nisi min coɗi, niyn ma si gaa kisiɗi; nisi ma fi bakmarana ma Lawn vulum mi jaf-sum segena, sa min tuɗ kulo Yerusalem kay li yuldeta vi tabernakleɗina.

¹⁹ Bakmara ma fi sum sa Egipten ɗawni, mi bakmara ma fi jaf-sumun kaf, sa min tuɗ kulo hay Yerusalem kay li yuldeta vi guɗukŋɗina.

²⁰ Hay buur namn ɗawni, ɗot ma ɗoys kat gilereŋ ma kel kulumayn ala: «Peldet ir vi Ma-Vatɗina». Doway ma kalaf hay ziyna vi Ma-Vatɗina ma muɗ ŋray ca ki tasana ma hay giwin-ma-ɗifinna vi Ma-Vatɗin nala.

²¹ Dowayna ma hay Yerusalem hiɗi Yuda kafe ma muɗ goy peldete ir vi Ma-Vatɗina; nisi kaf sa li ɗifini ma co'o, nisi ma yawamu kay zal sliwn hayamu. Hay buur namna ɗawni, sa mara ma hin li filiw hay ziyna vi Ma-Vatɗina vi vok-ma-duura may loɗi.