ZAKARIYA 13 - BIBALDA TA PELDETTA

Sa jobta bay-gasina ma fi lawta

¹ Hay buur namna ɗawni, niy-ma-riŋŋa ma jaŋ goy hay ziyna vi David, hiɗi sum sa hay Yerusalem, kay muz sulukŋa hiɗi liwista visi goyo.

² Ma-vatɗina vi vok-ma-duura di'e: Hay buur namna ɗawni, semda vi lawayn ma waana nan ma yawam goy hay nagata, kay hum sa ma gum kalam loɗi; sa jobta sa hay nagatna, hiɗi ŋusta visi ta liwista kaf, nan ma yawsi goy hay nagata.

³ La sa mara tun caw di slen ma vokomna lo, bulum hiɗi sulum sa vuɗumna dum ɗawn ala, naŋ hayɗin as mus iri loɗi, kay naŋ di law ma sinna hay semda vi Ma-Vatɗina. Hay li ma nam colawa di law ma vokomna ni, bulum hiɗi sulum sa vuɗumna ma jikim hoyokomu.

⁴ Hay buur namna ɗawni, sa jobta nisina tuwsi ma muɗ zulo'o hay li ma nisi ma tun caw di goy kay sle ma vul tuwam kirsina, nisi ma cuk sligar bakŋa tisiya kay ka sinda loɗi.

⁵ Gige-gige jarsiya ma tun caw di'e: Nan may mi sa ma job manɗi, nan sa ma zum sine'e, kay lopna van mi sinena hay joriyota vani pa.

⁶ La nisi jobomawa ala, ɦuɗuk ma hay ɓaŋ lakŋ may arige pa ni, nam ma hot dit ala: Mil namna nan fumi kayni hay ziyna vi sa boniyonna.

Kew-gaferaŋa

⁷ Kew-gaferaŋa, fokaŋ kulo'o, calaŋ sa ma ŋomda hiɗi sa ma nan tapam kuɗanna, Din mi Ma-Vatɗina vi vok-ma-duura. Calaŋ sa ma ŋomda, hin fok-dimin mer goyo, nan ma muɗ iran kir nam ma maŋayna.

⁸ Lawn di'e: Hay nagat noŋ kaf kayni, galla visi ma ma'na ma vat goyo, hin ɗawn mi gal ma ɦidina.

⁹ Gal ma ɦidina visiya nan ma cukum hay kuta, nan ma porom hay kuta ki san yor gurjuta hiɗi wak ora hay kuta nala. Nisi ma yi semda van hay vunsiya, nan ma humsi may. Nan ma di'e: «Nisi si sumuna vanu», nisi kaw ma di'e: «Ma-Vatɗina mi Lawna vuma'a».