ZAKARIYA 11 - BIBALDA TA PELDETTA

¹ Mal vun-ziyna vag goyo Libaŋ, hin kut ŋal gu-gamna ma hay nagata vagu.

² Tiyaŋu, naŋ gu-siprena, kay gu-gamna kaw nigawa gaa'a. Nisi sa tiy sesi ŋolla vatawa goyo. Tiyaŋu, naŋ gu-ma'asna ma hay Basan, kay juru ta sa jik kuɗa' jewɗita vatawa goyo.

³ Sum sa ŋomda ka tiy tiy ma hawna, kay ŋolda visi vatawa goyo, gurona vi zlon ka tiya, kay subur-tuwta vi Yordan vatawa goyo.

Sa ŋomda hiɗi farayna

⁴ Ki kayn nala Ma-Vatɗin Lawna van di'e: Ŋomaŋ fokŋa ma tuɗum ŋat goyna.

⁵ Nisi sa gusumna ŋatam ki nisi min nala; sa ma gus fok namna goyna di'e: Bolda ka kay Ma-Vatɗina, kay nan ka li tuwan faraya; kay sa ŋomda farayn may kirsi haw noŋ ne'ɗi.

⁶ Kay sum sa hay nagatna nan min hin sa goy kuɗsi noŋɗi, Din mi Ma-Vatɗina. Humgiya nan min vul sumun goy mi nuroysina, vulsi goy hay ɓam muliyan lay; nisi ma ja ir nagat goy ne' ne', nan ma but sumun goy hay ɓisi noŋɗi.

⁷ Bugol kayni nan tun caw ŋom fok-dimina ma tuɗum kay ŋat goyna, namu mi ma haw ŋolo jar hena. Nan yaw zugulayn hay ɓan ma': Ta kepta nan ya' ala luma'da, ta heta nan ya' ala tapta; nan gi kuɗ farayn kay ŋomomu.

⁸ Ir til kep nan vat sa ŋomda sa ɦidin goyo; kay dikan may tun-suk kisi noŋɗi, kay nan kaw kirsi bis lay.

⁹ Nala nan ka di tam fok-dimina: Nan as ŋomgi loɗi, na' ta min mita mit ma'a, na' ta min ba goyta ba ma' lay, nam ma hinna mut tuwam jar tuwam malam lay.

¹⁰ Nan sli zugulda vanu ta ya' ala luma'da, nan kusa' goy purat', kay ja bonota van ta nan va' hiɗi sumunta goyo.

¹¹ Hay na'ta de' bonot ja goyo, fok-dimi namna ma muɗi las ŋolla tun caw li nar kanu, nam wi ala kayni mi dita vi Ma-vatɗina.

¹² Nan di tisiya: La nigi mina, nigi vulan wurakŋa vanu, la min migiɗi, vulanti migiɗi lay. Nisi ŋaɓ gurjut goy ir sikel dok-ɦidi, vulanta kay wurakŋa vanu.

¹³ Ma-Vatɗin di tanu: Vula' goy mi sum sa li dowayna, kay hiɗi gurju na'ta kayni nisi ŋaɓanawa. Nala nan yaw sikel ma dok-ɦidina, nan cukum hay ziyna vi Ma-Vatɗina, ir vi sa ma in dowayna.

¹⁴ Bugol kayni nan kus zugulda van ta ma'ta ta ya' ala «tapta» goyo, kay ɓuraw jar ɓosiyom-tuwsin Yuda hiɗi Israyel goyo.

¹⁵ Bugolda Ma-Vatɗin di tanu, yawaŋ slena vi sa ma ŋomda ma ɦay-ɦayn hay ɓaŋu,

¹⁶ kay ɗuwaŋu, nan min mar hay nagata sa ma ŋomda ma dikam may tum kay fok-dimin ma ba goynɗi; nam ma tuɗ gar fok-dimi ma guraynɗi, ma tuwam milla nam ma kotom vun milla valamɗi, ma tuwam bay moyna nam ma vulum hatɗi, may nam ma lig sliw fok-dimi ma ɗorayna, nam ma jetem goyo ta-ta gaa tirekem goŋ'.

¹⁷ Joot kay sa ŋomda sa waa ɗaara, sa noy fok-dimin goyo, kew-gaferaŋa calsi glaŋatsi goy calge, cosi irsi ta jufta goy coge. Gilaŋatsi soys goy soge, irsi ta jufta muɗ wiɗi muɗge.