YOSUWA 9 - BIBALDA TA PELDETTA

Yalda vi sum sa Gabawonna

¹ Muliyan kaf sa goy bugol niy-lumna Yordan, sa kulo kay hiɗiyna, sa hay liyn ma lokŋa hiɗi sa goy gal hena vi niy-lum ma ŋolla hay galla vi Libaŋ, sa Hititna, sa Amoriyana, sa Kanaaniyana, sa Feresiyena, sa Heviyena hiɗi sa Yebusiyena kaw, hay li ma nisi hum kayni,

² nisi ŋra vunsiya kay tuɗ dur Yosuwa hiɗi sa Israyella.

³ Sum sa Gabawonna hum kaw nanige Yosuwa ci sum sa hay Yeriko hiɗi Ay.

⁴ Nala nisi li milet tara kepe, nisi kaliya ki sum sa cuki sunna nala, nisi lak suwal ma jireɓayn kay kurona visiya, hiɗi tiliyn ma ɦok vinna hayamna ma jeti goyna, ma haway goyo, ma duɓi vun tuwamna;

⁵ tuguru ma sesina mi tuguru ma jeti goyna ma tuwam sliraɓina, tisi mi sligar busayna ma jeti goyna; fu ma nisi tumna ɓeki ɓek', bokay goy ne' ne'.

⁶ Nisi kalay kat Yosuwa hay Gilgal hay kaŋŋa, nisi di talamu hiɗi sum sa Israyella kaf ala: Numa co'ay kayni goy hay nagata ta gine pa. Wulin kayni, jungi bonot hiɗi numa'a.

⁷ May sum sa Israyella ci wayt hiɗi sum sa Heviyena ala: La li ŋalɗi ziyna vigi ka goboy hiɗi numa'a klasige. Nala numa'a jun bonot hiɗi nigi ɗawni ir nanige?

⁸ Nisi ka di tam Yosuwa ala: Numa si sa sunda vaŋu. Yosuwa ka jobsi ala: Nigi kayni si sum sarige? Nigi ay arige pa?

⁹ Nisi hotom dit ala: Sa sunda vaŋu co'ay hay nagata ta gine'e pa; kay numa humi labara kay Lawna vigiya hiɗi slen ma nam lum hay Egipte kafna.

¹⁰ Hiɗi slen kaf ma nam lum tam muliyana vi sa Amoriyana goy bugol Yordan, tam Sihon mulla vi Hesbon, hiɗi Og mulla vi Basan, sa ka laki ziy hay Astarot.

¹¹ Sa maariyana vuma'a hiɗi sum sa hay nagata vuma kaf di tuma ala: Gargi slen ma tin kigi hay hagata, kay ŋafsi irsiya. Nigi ma di tisi ala: Numa si sa gorvona vigiya. Wulin kayni, jungi bonot hiɗi numa'a.

¹² Ɗuwgi funa vuma tige. Hay buur ma numa yaway goy hay ziyna vuma pa, kotomi kuma hay hagat kayni, nam ay ku tuwa, wulin kayni nam ɓeki ɓek', muɗi ɗeŋ noŋo.

¹³ Tiliyna vi vinna numa hobomi kayni nam ay wuli tuwa, wulin nam jeti goyo tige. Ɗuwgi sligara hiɗi tuguruna vuma'a tige, nam kaf jeti goyo, kay hagat gine'e.

¹⁴ Nisi yaw sle ma tin hay ɓisiya bay job Ma-Vatɗina.

¹⁵ Yosuwa li toyt hiɗi nisiya, nam jun bonot hiɗi nisiya, kay nisi as cisi goyɗi. Sa ŋulona vi Israyel yi va kisiya.

¹⁶ Hay li ma buur ɦidi vatawa, bugol nisi jun bonot hiɗi nisi junna, sum sa Israyella hot hum ala nisi si sum sa ziysi katsi goboyo, nisi ka laki kayn jarsiya.

¹⁷ Sum sa Israyella kaliya, hay buurta ɦidita nisi co hay hoyok-ziyna visiya. Hoyok-ziyna visi namna kayni: Gabawon, Kefira, Beerot hiɗi Kiryat-Yeyarim.

¹⁸ Sa Israyella may cisi goyɗi, kuɗ va ma sa ŋulona vi Israyel yi kisiya vok Ma-Vatɗina Lawna. May sum sa Israyel kaf ŋurnay kat sa ŋulona visiya.

¹⁹ Sum sa ŋulona vi Israyel kaf ka di tisi ala: Numa yi vaawa kuma'a vok Ma-Vatɗina Lawna vi Israyel, wulin kayni, nay as tun ɓay tisiɗi.

²⁰ Kayni mi va ma nay ma li tisiya: Nay ma hinsi iriya kuɗ va ma nay yi kaya vok Lawna, kay nay ma mar ɦiyda valam kayɗi.

²¹ Sa ŋulona vi Israyel di tisi ala: Hinsi lak iriya. Nisi vul lopn hay ɓisiya kay ka guna, kay go niyn kaw mi sa Israyel kafe, kuɗ va ma sa ŋulona vi sa Israyel di'e.

²² Yosuwa yisi aya, nam disi ala: Nigi dolay ka goboy hiɗi numa'a, may nigi ɗutma ala nigi ka goy gine hiɗi numa'a kayn kay mige?

²³ Nala wulin kayni nigi beɗay goyo, sa ma jargi ma gorvota valam vat goy mayɗi, nigi ma ka guna, nigi ma go niyna ma hay ziyna vi Lawna vanu may.

²⁴ Nisi hot dit tam Yosuwa ala: Kay nisi vuma labar goy haraŋi kay Ma-Vatɗina Lawna vigiya vul hagat tam Musus ma sunda valamu kay nam ma vulgi nagat kafe, kay ci sum sa hay nagatna goy vokgi kafe. Cota vigiya muɗma nar ŋolo kaw, kuɗ na'ta numa li ki kayn nala.

²⁵ Wulin kayni numa hin tuwma hay ɓigiya, nigi as li tuma'a ki nigi min nala.

²⁶ Yosuwa li ki kayn nala, nam butsi goy hay ɓam sa Israyella, sa Israyella may cisi goyɗi.

²⁷ Hay buur na'ta pa, Yosuwa vulsi lopna kay ka guna, kay go niyna kaw mi sa Israyella hiɗi giwin-ma-ɗifinna vi Ma-Vatɗina kaw, hay liy ma nam as vilekemna, ta-ta vaydi.