YOSUWA 6 - BIBALDA TA PELDETTA

¹ Vun Yeriko ay dukiya, vuna' ciy kulo'o kuɗ sa Israyella. Sa may kal goyɗi, sa may kal kulo haya'ɗi kaw.

² Ma-Vatɗina di tam Yosuwa: Ɗuwaŋu, nan min vul Yeriko hiɗi mulla va'a, hiɗi sum sa wi duura kaf hay ɓaŋu.

³ Nigi ma ŋuy hoyok-ziyna, sum sa wi duura kaf; nigi ma ŋuy kat hoyok-ziyna sem kepe. Nigi ma li kayni ir buur karkiya.

⁴ Muliyan-sa-ɗifinna siɗiya ma ziy togolomna siɗiya kaw vok timgilla. Hay buurta siɗiyat ɗawni, nigi ma ŋuy hoyok-ziyna sem siɗiya, muliyan-sa-ɗifinna ma buw togolomna may.

⁵ Hay li ma togolomna buwawa, hay li ma nigi hum del togolomnawa, sumun kaf ma ciriy digi-digi', ki kayn nala gulmun ma tam hoyok-ziyna ma ɦo gaa kay tuwamu, gigekaw ma jikis vokom ɗiger.

⁶ Yosuwa goora vi Nun yi muliyan-sa-ɗifinna, nam di tisi ala: Ziygi timgilla vi bonota, hin muliyan-sa-ɗifinna siɗiya kaw ziy togolomna siɗiya vok timgilla vi Ma-Vatɗina.

⁷ Bugol kayni nam di tam sumuna: Tuɗgiya, ŋuygi hoyok-ziyna, soje sa tun vokŋa hinsi tun vok timgilla vi Ma-Vatɗina.

⁸ Van li'e ki Yosuwa di tam sumun nala. Muliyan-sa-ɗifinna siɗiya sa ka ziy togolomna siɗiya vok Ma-Vatɗina kaliya, nisi buw togolomna. Timgilla vi bonota vi Ma-Vatɗina ka tuni bugolsiya may.

⁹ Soje sa tuni vokŋa ka tuɗ vok muliyan-sa-ɗifinna sa ka buw togolomna, sojen sa bugolla ka tuɗ kuɗ timgilla may. Nisi ka ŋra sesi kayn kuɗ buwna vi togolomna.

¹⁰ Yosuwa vul dit tisi ala: Nisi as siwelɗi, nigi as di delgi goyɗi, hin law kal goy hay vungi noŋɗi, ta-ta hay buur ma nan ma di tigi ala: Patgi ciriyna! Nala nigi ma pat ciriyna.

¹¹ Timgilla vi Ma-Vatɗina ŋuy hoyok-ziyna, nisi ŋuy sem kepe, bugolda nisi hotay hay kaŋŋa, nisi bura.

¹² Yosuwa fok kulo graw culum, hay na'ta lo muliyan-sa-ɗifinna sli timgilla vi Ma-Vatɗina.

¹³ Muliyan-sa-ɗifinna sa ziy togolomna siɗiya vok timgilla vi Ma-Vatɗina yaway kulo'o kay tuɗa, nisi buw togolomna. Soje sa vokŋa ka tuni voksiya, soje sa bugolla ka tuɗ kuɗ timgilla vi Ma-Vatɗina. Nisi ka ŋra sesi kayn vun buwna vi togolomna.

¹⁴ Nisi ŋuy hoyok-ziyn sem kep lo hay buurta ma'ta; bugol kayni nisi hot hay kaŋŋa. Nisi li ki kayn nala ta-ta ir buur karkiya.

¹⁵ Hay buurta siɗiyata, nisi yaw kulo hay ŋarpita, nisi ŋuy hoyok-ziyna ki nisi ka tuni kay tuwsi jew nala kaw, sem siɗiya. Hay buurta na'ta ta siɗiyata nisi ŋuy hoyok-ziyna sem siɗiya.

¹⁶ Nala hay semda siɗiyata, muliyan-sa-ɗifinna buw togolomna, Yosuwa di tisiya: Patgi ciriyna, kay Ma-Vatɗina vulgi hoyok-ziynawa.

¹⁷ Hoyok-ziy namna, vuli ɗifini mi Ma-Vatɗina hiɗi sle ma hayamna kaf. Ma hin iri ti Rahab, cata gawlaŋga kepe, na' hiɗi sum sa vo ta' hay ziyna tuta, kay sum sa nay cuksina na' vulsi liyn ma ŋayna.

¹⁸ May ligi ŋali, nigi ma ŋom tuwgi kay sle ma telayna. Kay la nigi yaw sle ma telaynawa, nigi kaw ma kal kaŋŋa vi sa Israyella hay ɓulakka hay li ma nigi ma gi lawt jarsiya.

¹⁹ Gurjuta kaf, ora kaf, sle ma koti hiɗi wayna hiɗi kawayna, namu vuli goy tam Ma-Vatɗina: Ma cukum hay timgilla vi Ma-Vatɗina.

²⁰ Sumun pat ciriyna, nisi buw togolomna may. Hay li ma sumun hum buwna vi togolomna, nisi pat ciriyna, gulmunna ɦo gaa kay tuwamu, nisi cuk kulo hay hoyok-ziyna, gigekaw vokomis ɗiger, nala nisi sli hoyok-ziyna.

²¹ Sum sa hay hoyok-ziyna kaf, jufayna hiɗi boyna, gurosgurayna hiɗi sa maariyana nisi cisi goy kaf. Luwayna, fok-dimina hiɗi kuron kaw nisi cum goy kafe.

²² Sum sa ma'na sa kal goy jewe kay fek gul-liyna, Yosuwa di tisi ala: Tuɗgi hay ziyna vi cata gawlaŋga, cat kayni hiɗi sumuna va' kaf nigi ma kalsiyay goyo, ki nigi yi va kigi voka' nala.

²³ Joriyona sa ɗuw gul liyna kaliya, Rahab hiɗi bu'a, su'a, ɓosiyo'na, hiɗi slena va' noŋ kaf, sumiya'a, nisi cuksi ay goy kafe. Nisi tunsi goy jiy kaŋŋa vi Israyel, bay va josiya.

²⁴ Nisi ŋal hoyok-ziyn goyo hiɗi sle ma hayam kafna. May gurjuta, ora, wayna hiɗi kawayna kaf, nisi lakam hay timgilla vi ziyna vi Ma-Vatɗina.

²⁵ Rahab, cata gawlaŋga, Yosuwa hina' iriya, jafna va'a hiɗi sumuna va' kaf. Na' musi jar sa Israyella ta-ta vaydi, kay na' vul liyna ma ŋayna mi sa sunda sa Yosuwa cuksi aya kay fek Yeriko.

²⁶ hay na'ta kayni, Yosuwa yi va kalam ala: sa ma fokawa kay hot in Yeriko kulo'o, nam beɗay goyo vok Ma-Vatɗina, hay li ma nam min va' baga' gaa'a, nam ma ci goora valam ma ŋolla mati; hay li ma nam min tun vun-galan gaa'a, nam ma ci goora valam ma cawna tuwa.

²⁷ Ma-Vatɗina li hiɗi Yosuwa, selem ma tiyna biya goy hay nagat kafe.