YOSUWA 5 - BIBALDA TA PELDETTA

Ka-gosayta hiɗi Paskata hay fulda vi Yeriko

¹ Hay li ma muliyana vi sa Amoriyana kaf sa ka goy bugol Yordan hay gal ma vulatina, hiɗi muliyana vi sa Kanaaniyan kaf, goboy hiɗi niy-lumna, hay li ma nisi hum ala Ma-Vatɗina so niy-lumna Yordan goy vok sa Israyella, ta-ta nisi jik kulo'o, nala sutaysi to'o, suksi tok kelsiya vok sa Israyella.

² Hay na'ta kayni, Ma-Vatɗina di tam Yosuwa: Ceɗaŋ hiɗiyn kewe, sem ma ma'na lo, naŋ ma ka gurona vi Israyel gosaya.

³ Yosuwa ceɗ hiɗiyn kewe, nam kaasi gosaya, goboy hiɗi hiɗiyta vi Aralot.

⁴ Kayni mi va ma Yosuwa kaasi gosay kalamna: Kay sumun kaf cukay goy hay Egipte pa kayni, jufayn kaf, sum sa wi duur kaf ay miti hay fulda hay poyta visiya, hay li ma nisi cukay goy hay Egipte pa.

⁵ Sum sa cukay goy hay Egipten kay kaay gosaya, may sum sa vuɗi hay fulda hay poyta visin kaf, nisi may ka sa gosay kuɗsiɗi.

⁶ Kay na'ta gurona vi Israyel poyay hay fulda ir busat dok-fiɗi, ta-ta vokŋa vi sum sa wi duura sa cukay goy hay Egipte pa, sa min hum vun Ma-Vatɗinɗina vat goy kafe; Ma-vatɗina yi va kalam ala, nagata ta nam yi va kalamu kay vula' mi sumaysiya, nagata ta miira hiɗi yumda ka riŋ goy haya'ta, nagat na'ta irsi ma cuk ka'ɗi.

⁷ Nam tunsi hay baŋalsi kayni si gurona visiya. Yosuwa kaasi gosaya, kay hay li ma nisi ay hay hagata, nisi may kaasi gosayɗi.

⁸ Hay li ma nisi kaasi gosay kana, nisi lak hay liyna visiya hay kaŋŋa, ta-ta milla visi kaf cita tuwa.

⁹ Ma-Vatɗina di tam Yosuwa: Vaydi zulota vi Egipte ta kigita nan zuta'awa goyo. Nala liyn namna semda valam Gilgal ta-ta vaydi.

¹⁰ Sum sa Israyella tun hay Gilgal, nisi li yuldeta vi Paskata hay buurta doogo yam fiɗita vi tilla, hay vulatita, hay fulda vi Yeriko.

¹¹ Nisi tum mi vuɗna vi sle ma hay nagatna, fun-bay-kufna hiɗi wan ma hawayna, hay buurta ka'ta vi Paskata, hay buur na'ta de'.

¹² Hay li ma nisi tun caw ti vuɗna vi sle ma hay nagatna, manna may loɗi. Hay busat na'ta manna min cuk gaa kay sum sa Israyel loɗi, nisi tun caw tum mi vuɗna vi sle ma hay nagata Kanaan hay busat na'ta.

Nisi sli Yeriko

¹³ Hay li ma Yosuwa ka goboy hiɗi Yeriko, nam poŋ iram kulo'o, ɗuw na kayni san kep ka coli vokom zaw, kew-gaferaŋa valam ka patay goy kalam kay'. Yosuwa ɦur kulo talamu, ka dum ala: Naŋ mi sana vuma lebo sa ma gawt kuma'na su?

¹⁴ Nam di'e: A'a, may nanu mi ma ŋolla vi sojena vi Ma-Vatɗina, wulini nan coowa. Yosuwa girif gaa kay nagata, dab vokom gaa'a di'e: Mulanna min dan mige?

¹⁵ Ma-ŋolla vi sojena vi Ma-Vatɗina di tam Yosuwa: Pataŋ tuguruna vaŋ ma seŋŋa goyo, kay liyn ma naŋ coli hayamna zawni mi liyn ma peldetna. Yosuwa li nala kaw.