YOSUWA 4 - BIBALDA TA PELDETTA

Hiɗiyna ma doogo yam ma'na

¹ Hay li ma nisi kaf ɦaw Yordan kulo ɦawna, Ma-Vatɗina di tam Yosuwa:

² Yawgi sumun jargi doogo yam ma', sa kep kuɗ jafna jafna.

³ Nigi ma disi ala: Nigi ma co hay way Yordan, hay liyn ma muliyan-sa-ɗifinna lak hayna, nigi ma yaw hiɗiyn doogo yam ma', nigi ma tuɗum hay kaŋŋa vigiya kay nam ma bur tigi ɗawni.

⁴ Yosuwa yi sum sa doogo yam ma'na sa nam vileksi jar sa Israyella, kep kuɗ jafna jafna.

⁵ Yosuwa di tisiya: Tuɗgi vok timgilla vi Ma-Vatɗina Lawna vigiya, ɗiger hay way Yordan, gigekaw ma sli hiɗiy pelem kep kep, ŋray dig ŋaɓta vi jaf sa Israyella,

⁶ kay kayni ma li ti ɗekka jargiya. Hay li ma grawta gurona vigi jobgiyawa ala hiɗiyn kayni ɗek mige ni,

⁷ nigi ma hotsi dit ala: Kay niy-lumna Yordan so goyo vok timgilla vi bonota vi Ma-Vatɗina hay li ma nisi ɦaw niy-lumna Yordan kulo'o, hiɗiy namna ma lin mi gi-humda kay dok-dok kat gurona vi Israyel.

⁸ Sum sa Israyella li kuɗ va ma Yosuwa dumna, nisi yaw hiɗiyn goy doogo yam ma' goy jar niy-lumna Yordan pa, ki Ma-Vatɗina di tam Yosuwa nala, kuɗ ŋaɓta vi gurona vi Israyel. Nisi jikis hiɗi namu hay kaŋŋa pa tuɗ lakam ɗawni.

⁹ Yosuwa lak hiɗiyn doogo yam ma' goy way Yordan, hay liyna ma muliyan-sa-ɗifinna sa ziy timgilla vi bonota lak sesi hayna. Hiɗiy namna ka hay liy namna lak' ta-ta vaydi.

¹⁰ Muliyan-sa-ɗifinna sa ziy timgilla lak hay way Yordan lak, ta-ta sle ma Ma-Vatɗina dum tam Yosuwa kay dum tam sumuna vunam hob kulo kafe, kuɗ slen ma Musus dum tam Yosuwan kafe. Bugolda sumun gos tuwsiya kay ɦaw kulo'o.

¹¹ Hay li ma sumun kaf ɦaw kulo ɦawna, timgilla vi Ma-Vatɗina hiɗi muliyan-sa-ɗifinna tun vok sumuna.

¹² Jafna vi Ruben, jafna vi Gad hiɗi gal jafna vi Manase gan tuwsi kay duura, nisi ɦaw kulo'o, tuni vok sa Israyella, ki Musus diys tisi nala.

¹³ Sumun ir birim dok-fiɗi hiɗi sle-ma-duur hay ɓisiya jik vok ir Ma-vatɗina, tuwsi koti kay duura, nisi sli hagata vi fulda vi Yeriko.

¹⁴ Hay buur na'ta kayni, Ma-Vatɗina muɗ Yosuwa ŋolo vok ir sa Israyel kafe, nisi hum kuɗum ki nisi hum kuɗ Musus hay buura vi irita valam kafe nala.

¹⁵ Ma-Vatɗina di tam Yosuwa:

¹⁶ Vulaŋ hagata tam muliyan-sa-ɗifinna sa ziy timgilla vi di-goyta kay nisi ma hin Yordan jikay kulo'o.

¹⁷ Ki kayn nala Yosuwa vul hagata tam muliyan-sa-ɗifinna kay nisi ma hin Yordan jikay kulo'o.

¹⁸ Hay li ma muliyan-sa-ɗifinna sa ka ziy timgilla vi bonota vi Ma-Vatɗina jikay goy hay way Yordan pa jikŋa, hay li ma nisi tun sesi kulo deŋel tunna, niyna vi Yordan hot hay baŋalamna de', nam tun caw jaŋ ki jew nala, nam hob goy hay liyamna.

¹⁹ Sum sa Israyella ɦaw Yordan kulo kayni hay buurta doogota vi til ma jewna, nisi tun kaŋŋa visi hay Gilgal, hay gal ma kuɗuwna vi Yeriko.

²⁰ Hiɗiy namna ma doogo yam ma'na ma nisi yawamay hay Yordan pana, Yosuwa jakam kulo hay Gilgal.

²¹ Nam di tam sa Israyella ala: Grawta hay li ma gurona vigi jobawa tam sumaygi ala hiɗiy namna lakŋi ɗek mige ni,

²² nigi ma ɗek gurona vigiya, nigi ma disi ala: Hay li ma sum sa Israyel ɦaw Yordan kulo kayni, niy-lumna so goy voksiya.

²³ Kay Ma-Vatɗina Lawna vigiya so niy-lumna Yordan goy vokgiya, ta-ta nigi kaf ɦaw kulo'o ki Ma-Vatɗina Lawna vigiya li kat niy-lum ma slawna ma nam som goy vokaya, ta-ta nay ɦaw kulo'o nala.

²⁴ Kay a sum sa hay nagat kaf ma wi ala ɓam Ma-Vatɗina ka gaŋeraŋi, kay a nigi ma li nar dok-dok kuɗ Ma-Vatɗina Lawna vigiya.