YOSUWA 14 - BIBALDA TA PELDETTA

Ɓurawta vi nagata hay gal ma vulatina vi Yordan

¹ Kayni ti vocota ta sum sa Israyel fa'a hay nagat Kanaan, vocota ta mul-ma-ɗifinna Eliyazar hiɗi Yosuwa goora vi Nun hiɗi sa ŋulona vi jafna visi kaf ɓurawam mi sa Israyella.

² Vocota nisi ŋaɓa' kuɗ ɦayta, ki ma-Vatɗina vul hagata vun Musus kay jaf ma zleeŋena hiɗi gal-jaf ma kepna nala.

³ Kay jaf ma ma'na hiɗi gal-jaf ma kepna Musus vul vocota visiya goy hay gal hena vi Yordan, may sa Levitna sa ka jarsina nam may vulsi gal mara misiɗi.

⁴ Gurona vi Yosef jafna visi ɓuraway ma': Manase hiɗi Efrayim; may sa Levitna nisi vulsi galla visi hay nagatɗi, nisi vulsi liyn kay lak hay hoyok-ziyna, vulsi voora kaw, kay farayna hiɗi slena visi as ti haya.

⁵ Gurona vi Israyel li ki Ma-Vatɗina vul hagata tam Musus nala, nisi ɓuraw nagata.

Nagata vi Hebron vuli mi Kaleb

⁶ Gurona vi Yuda co kat Yosuwa hay Gilgal; nala Kaleb goora vi Yefune ma Keniziyena di tam Yosuwa ala: Naŋ kay tuwaŋu wi va ma Ma-Vatɗina dum tam Musus sana vi Lawna, kay naya, naŋu hiɗi nanu, hay Kades-Barneya.

⁷ Hay li ma Musus sa ma sunda vi Lawna gan hay Kades-Barneya kay fek liyn kayni, busata van ay dok-fiɗi. Nan vum labara hiɗi dikga ta gasita.

⁸ Ɓosiyonna sa tuɗis hiɗi nanna nisi ɓulak dik sumuna, may nanu, nan li kuɗ hagata vi Ma-Vatɗina Lawna vanu hiɗi dikan kafe.

⁹ Hay buur na'ta kayni Musus yi va kalam ala: Gasi wete, nagata ta naŋ tun seŋ kulo haya'ta kayni ti vocota vaŋu, vi gurona vaŋu kaw ta-ta dok-doko, kay naŋ tap kuɗ hagata vi Ma-Vatɗina Lawna vanu hiɗi dikaŋ kafe.

¹⁰ Wulin kayni Ma-Vatɗina hinanawa mus iriya ki nam di nala. Hay li ma Ma-Vatɗina di slen ki kayni nala tam Musus, busat wulini asay dok-fiɗi yam vasl, hay li ma nisi ka poy hay fulda; wulin kayni, nan zaw vaydini, busata van asay dok-glafandi yam vasl.

¹¹ Nan ka hiɗi donota van tanu ki hay buur ma Musus gan sunna nala; donota van ka tan wulini ki hay buur namna nala, kay li duura, kay tuɗ goyo, kay hotiya kaw.

¹² Wulin kayni naŋ vulan hiɗiy na'ta ta Ma-Vatɗina di ka'a hay buur namna; kay naŋ humi hay buur na'ta kaw ala sum sa Anakimna ka haya, hoyok-ziy ma gulmun talamna ka haya kaw, hin Ma-vatɗina li malam hiɗi nan lige, nala nan ma kol kisiya, ki nam kay tuwam di nala.

¹³ Yosuwa gi bol kay Kaleb, goora vi Yefune, nam vulum Hebron voco'o kaw.

¹⁴ Ki kayn nala Kaleb goora vi Yefune ma Keniziyena, nam fi Hebron voco'o ta-ta vaydi, kay nam li kuɗ hagata vi Ma-Vatɗina Lawna vi Israyel hiɗi dikam kafe.

¹⁵ Jewe Hebron ya' ala Kiryat-Arba, Arba ay mi liyn ma ŋolla jar sa Anakimna, hay na'ta pa nagat tun ŋal kiliŋ bay duura.