YOSUWA 13 - BIBALDA TA PELDETTA

ƁURAWTA VI NAGATA Hagata vuli kay ɓuraw nagata

¹ Yosuwa muɗi maari, busata valam kalay ŋolo. Nala Ma-Vatɗina di talam ala: Wulini naŋ muɗi maari, busata vaŋ kalay ŋolo, nagata ta hini vokaŋ kay naŋ sla'ta ka ŋol tuwa.

² Kayni mi nagana ma hinina: Nagata vi sa Filistina hiɗi sa Gesuriyena kaf;

³ Tun caw tam Sihor ma ka riŋ goy vok Egipte pa ta-ta tam jaara vi Ekron hay gal ma gaana, gal liyna vi sa Kanaaniyana, ma ka hay ɓam sa yerimana sa vaslna vi sa Filistina, ma hay gal Gaza, ma hay gal Asdod, ma hay gal Askalon, ma hay gal Gad hiɗi Ekron, ma hay ɓam sa Aviyena;

⁴ hay gal ma kayamna, nagata vi sa Kanaaniyan kaf, hiɗi Meyara, ta ka hay ɓam sa Sidonna ta-ta hay Afek, ta-ta hay jaara vi sa Amoriyana;

⁵ nagata vi sa Gibliyena, Libaŋ kaf hay liy ma fatta dayna, tun caw ay tam Baal-Gad gaa sem hiɗiyta Hermon pa, ta-ta kal hay Hamat.

⁶ Sum sa li ziy kulo kay hiɗiyt kaf, fokay hay Libaŋ pa ta-ta hay Misrefot-Mayim, sum sa Sidonna kaf. Nan ma digiɗsi vok sa Israyella. Nam cani naŋ ma vulum voco kaf mi sa Israyella hiɗi ŋaɓta kuɗ ɦayta ki nan vul hagat taŋ nala,

⁷ Wulin kayni naŋ ma ɓuraw nagat na'ta, kay vula' voco'o mi jaf ma zleeŋena hiɗi gal-jafna vi Manase.

⁸ Gal jaf hena (vi Manase), jafna vi Ruben hiɗi jafna vi Gad, vocota visi fiya, ki Musus vulsit goy hay gal hena vi Yordan nala, hay gal ma kuɗuwna, kayni ŋray ca ki Musus ma sunda vi Ma-Vatɗina vul hagat nala.

⁹ Tun caw ay hay Arower pa, kel niy-ma-riŋŋa vi Arnon, tun caw ay hay hoyok-ziyna ma ka jar lokŋa pa, liy ma beɗna vi Medeba, ta-ta hay Dibon.

¹⁰ Hoyok-ziyna vi Sihon mulla vi sa Amoriyan kaf, nam ma ka ti mulda hay Hesbon, ta-ta hay jaara vi gurona vi Amon;

¹¹ Galaad, hoyok-ziyna vi sa Gesuriyena hiɗi sa Maakatiyena, hiɗiyta vi Hermon kaf, Basan kaf, ta-ta hay Salka;

¹² mulda vi Og hay Basan kaf, ma ka ti mul hay Astarot hiɗi Edrey, mi ma cawna vi sa Refayimna. Musus ci muliyan nisina, nam kol kisiya.

¹³ May sum sa Gesuriyena hiɗi sa Maakatiyena sa Israyella may kol kisiɗi, kay ta-ta vaydi sum sa Gesuriyena hiɗi sa Maakatiyena ka laki ziy jar sa Israyella.

¹⁴ Jafna ma nisi vulum vocoɗina kayni mi jafna vi Levi kepe; vocota visi kayni mi ɗifin ma ŋalay hay kuta, vok ir Ma-Vatɗina Lawna vi Israyel, ki nam kay tuwamu vul hagat tisi nala.

Ɓurawta vi nagata hay gal ma kuɗuwna vi Yordan

¹⁵ Musus ɓuraw galla kuɗ jafna vi sa Rubenna kuɗ vuɗna visiya.

¹⁶ Nagata ta nisi fa'ta fokay hay Arower kel niy-ma-riŋŋa vi Arnon, hiɗi hoyok-ziy ma ka jar lokŋa, liyn ma beɗna kaf goboy hiɗi Medeba,

¹⁷ Hesbon hiɗi hoyok-ziyn ma kulo kay ɗiŋiriŋ kaf, Dibon, Bamot-Baal, Bet-Baal-Meyon,

¹⁸ Yatsa, Kedemot, Mefaat,

¹⁹ Kiryatayim, Sibma, Seret-Hakahar, kulo kay hiɗiyna ma hay lokŋa,

²⁰ Bet-Pewor, ɓirlimna vi Pisga, Bet-Hayesimot;

²¹ hoyok-ziy ma ɗiŋiriŋŋa kaf, mulda vi Sihon mul ma Amoriyan kaf, ma ka ti mulda hay Hesbon: Musus cum goyo, namu hiɗi Yerimana vi Madiyan, Evi, Rekem, Sur, Hur hiɗi Reba, sa ka gaa kuɗ Sihon, sa ka laki hay nagata.

²² Nisi sa sum sa Israyella cisi goy hiɗi kew-gaferaŋa kayni, Balaam goora vi Bewor ma tun gireyta ka jarsiya.

²³ Jaara vi jafna vi Ruben kayni mi Yordan hiɗi deŋel niyna valamu. Kayni mi jaara vi jafna vi Ruben, kuɗ vuɗna visiya visiya: Hoyok-ziy ma ŋulona hiɗi hoyok-ziy ma gurayna.

²⁴ Musus vul gatta mi jafna vi Gad kuɗ vuɗna visiya visiya.

²⁵ Nagata ta nisi fa'ta ya' Yayezer, hoyok-ziyna vi Galaad kafe, gal-jafna vi sa Amonna, ta-ta hay Arower ɗiger vok Rabba.

²⁶ Fokay hay Hesbon pa ta-ta hay Ramat-Mispe, hiɗi Betonim, fokay hay Mahanayim pa ta-ta hay jaara vi Debir,

²⁷ hay lokŋa, Bet-Haram, Bet-Nimra, Sukkot hiɗi Safon, galla vi mulda vi Sihon mulla vi Hesbon, hiɗi Yordan, hiɗi naga ma gala'na, ta-ta goy hay gaŋ niy-lumna Kinneret hay gal hena vi Yordan, hay gal ma kuɗuwna.

²⁸ Kayni ti vocota vi jafna vi Gad kuɗ vuɗna visiya visiya; hoyok-ziy ma ŋulona hiɗi ma gurayna kaw.

²⁹ Gal-jafna vi Manase hiɗi gal-jafna vi gurona vi Manase kaw, Musus vulsi galla visiya kuɗ vuɗna visiya visiya.

³⁰ Nagata ta nisi fa'ta tun caw ay hay Mahanayim pa, Basan kafe, mulda vi Og mul ma hay Basan kafe, ziyna ma hay Yayir hay Basan kafe, hoyok-ziy ŋulon dok-karkiya.

³¹ Gal-jafna vi Galaad, Astarot hiɗi Edrey, hoyok-ziyna vi mulda vi Og hay Basan, nisi vulum mi gurona vi Makir, gurona vi Manase, hiɗi galla vi gurona vi Makir, kuɗ vuɗna visiya visiya.

³² Kayni ti vocota ta Musus ɓurawa'a, hay fulda vi Mowab goy hay gal hena vi Yordan, ɗiger vok Yeriko, hay gal ma kuɗuwna.

³³ Musus min vul gal voco mi jafna vi Leviɗi. Kay Ma-Vatɗina Lawna vi Israyel namu mi vocota visiya, ki nam kay tuwam di nala.