YOSUWA 11 - BIBALDA TA PELDETTA

Duura hay Merom

¹ Hay li ma Yabin mulla vi Merom hum labara kayni, nam gi sunda tam Yohab mulla vi Madon, tam mulla vi Simron, tam mulla vi Aksaf,

² tam muliyana sa ka hay gal ma gaana vi hiɗiyna, hay fulda, hay gal ma kayamna vi Kinneret, hay lokŋa, hay galla vi Dor, gal ma vulatina,

³ tam sa Kanaaniyana sa gal kuɗuwna hiɗi sa gal vulatina, sa Amoriyana, sa Hititna, sa Feresiyena, sa Yebusiyena, sa kulo kay hiɗiyna, sa Heviyena sa gaa kuɗ hiɗiyt Hermon hay nagata vi Mispa.

⁴ Nisi cukay goyo, nisiya hiɗi sojena visi kafe, sum nisin kayni tapay ŋolo, nisi ŋol haca-haca' ki ŋesl ma goloŋ kel niyna nala, kulumayna hiɗi keke-ma-duura visiya nam ŋolo kaw.

⁵ Muliyan nisin kaf ŋra vunsiya, nisi co'o, tun kaŋŋa visi goboy kel niyna vi Merom, kay dur sa Israyella.

⁶ Ma-Vatɗina di tam Yosuwa: Naŋ ma li nar kisiɗi, kay jifini, hay fatta ki tan nala, nan min vulsi hay ɓigiya, nigi sa Israyella ma cisi goy kafe. Nigi ma cal tirek kulumayna visi goyo, nigi ma ŋal keke-ma-duura visi goy hay kuta kaw.

⁷ Yosuwa hiɗi sumuna valam sa duura kaf co kisi tukusi', goboy kel niyna vi Merom, nisi moksiya.

⁸ Ma-Vatɗina vulsi hay ɓam sa Israyella, nisi calsiya, jaŋ kuɗsiya ta-ta hay Sidon ta ŋolda, ta-ta hay Misrefot-Mayim, ta-ta hay lokŋa vi Mispa hay gal kuɗuwu, nisi calsiya, hin sa kuɗsi kep kaw pir goyɗi.

⁹ Yosuwa li tisiya ki Ma-Vatɗina di talam nala: Nam cal tirek kulumayna visi goyo, nam ŋal keke-ma-duura visi goy hay kuta.

¹⁰ Hay na'ta kayni, Yosuwa hot bugolomu, nam sli Hatsor, nam cal mulla va'a hiɗi kew-gaferaŋa. Kay jew ɓa-ɓa kayni, Hatsor ti nagata ŋolda vi muliyan nisin lakŋi kafe.

¹¹ Sum sa haya'na nisi calsi goy kafe hiɗi kew-gaferaŋa; slen ma sukka hayamna kaf kep kaw may hinɗi, Hatsor kaw nisi ŋala' goy hiɗi kuta.

¹² Yosuwa yaw hoyok-ziyna vi muliyan nisin kaf, hiɗi muliyan nisin kaf kaw, nam calsi goyo hiɗi kew-gaferaŋa; nam cisi goy kafe, ki Musus ma sunda vi Ma-Vatɗina vul hagata nala.

¹³ May hoyok-ziyna ma ka kulo kay hiɗiyna, sum sa Israyella may ŋalam goyɗi, Yosuwa ŋala' goy kayni ti Hatsor tuta.

¹⁴ Slen ma hay hoyok-ziyn namna hiɗi farayna sum sa Israyel tum ɓuraŋ kafe; may sumun kaf nisi calsi hiɗi kew-gaferaŋa, ta-ta nisi vatsi goy kafe, nisi may hin va ma gi suk hayɗi.

¹⁵ Slen ma Ma-Vatɗina dum tam sa ma sunda valam Mususna, Musus dum tam Yosuwa, Yosuwa hobom vunamu may. Slen ma Ma-Vatɗina dum tam Musus kafna, Yosuwa may hin mara bay li noŋɗi.

¹⁶ Ki kayn nala Yosuwa yaw naga namna kafe, hiɗiyna, gal ma kayamna, nagata vi Gosen kaf, liyn ma lokŋa, fulda, hiɗiyta vi Israyel hiɗi lokŋa va'a kaw.

¹⁷ Tun caw tam hiɗiyta Halak ta fokis gal Seyir ta-ta Baal-Gad, hay lokŋa vi Libaŋ, gaa kuɗ hiɗiyta Hermon, nam yaw muliyana visi kafe, calsiya, cisi goy mati.

¹⁸ Yosuwa li duura hiɗi muliyan nisina ir buur ŋolo.

¹⁹ Hoyok-ziy mara ma li toyta hiɗi Israyel mayɗi, say Gabawon ta sum sa Heviyen ka haya'ta tuta. May hen kaf nisi yawam hiɗi duura.

²⁰ Kay sum nisin kayni, so'otta vi diksiya kay li duura mi sum sa Israyella may kayni vi Bum-Sumun pa, kay nam min cisi goyo bay lisi slugota, kay nam min vatsi goyo ki Ma-Vatɗina vul hagata tam Musus nala.

²¹ Hay na'ta kayni, Yosuwa kalay kay li duura, sum sa Anakim sa kulo kay hiɗiyt Hebron nam cisi goyo, sa hay Debir, sa Anab, kay hiɗiyta vi Yuda kaf, hiɗi hiɗiyta vi Israyel; Yosuwa cisi goy kaf, nam ɓulak hoyok-ziyna visi goy kafe kaw.

²² Sum sa Anakim may hin hay nagata vi Israyel noŋɗi, hini kayni hay Gaza, Gad hiɗi Asdod tuta.

²³ Yosuwa sli nagat kaf, kuɗ slen ma Ma-Vatɗina dum tam Musus kafna. Yosuwa vulum voco'o mi sa Israyella, kuɗ ɓurawta visi kuɗ jafna jafna. Bugol kayni nagat tun kiliŋ, duura may loɗi.