YOHANA 9 - BIBALDA TA PELDETTA

Yer-goyta vi sa ma vuɗi dukina

¹ Hay li ma Yesu ka tuɗ vokomu, nam wi san kep ma vuɗi dukiya.

² Sa hatayna valamu jobomu: Rabbi, ma li suluk kayn gige? San zawni lebo sumiyam su? Kay nam vuɗi dukiya!

³ Yesu hot dita: Nam li sulukɗi, sumiyamɗi kaw, may van kayni li nala kay lopna vi Lawna fi ɗek goy kalam haraŋi.

⁴ La linige kaw nay as li lopna vi nam ma ganina, hay li ma nay ka hay falayta tuwa, henjeta ma ma'a hay li ma sa as li lopɗi.

⁵ Hay li ma nan ka hay nagata, nanu mi haraŋa vi nagata.

⁶ Bugol nam di kayni dina, nam tuf nenen gaa kay nagata, hiliɓ nagan hiɗi nenena. Bugolda nam set naga namna kulo ir sa ma dukina.

⁷ Nam dum ala: Tuɗaŋu, muzaŋ tuwaŋ hay goor-goloŋga vi Silowe -- kayn min di ala giya. Nam kaliya muz tuwamu, hay li ma nam hotaya, nam muɗi wi cetet'.

⁸ Sugoliyomna hiɗi sa wum jewna kaw ala nam mi sa ma ay siɗaw hay hagata, nisi di'e: Nam zawni mi sa ma ay musi goy gal hagata kay siɗawna ɗisu?

⁹ Sum sara di'e: Mi namu. Segen di'e: A'a, nam zawn slum sliy ɦawa. Nam kay tuwam di'e: Kayni mi nanu.

¹⁰ Nisi dumu: Iraŋ mal goy kayn maltige?

¹¹ Nam hot dita: Sa ma yum ala Yesu hiliɓ nagana, nam setem iranu, dan ala: Tuɗaŋ muzaŋ hay Silowe. Nan kaliya, muz tuwanu, nan fi wida may.

¹² Nisi dumu: Sa namna ka arige? Nam hot dita: Nan may wiɗi.

¹³ Nisi mar sa ma dukina ay tam sa Farisena.

¹⁴ May fatta ta Yesu hiliɓ nagana, malam iram goyo kaw kayni hay buur ma sabatna.

¹⁵ Sa Farisena sli lawtiya kay jobom ala iram mal goy kayni maltige. Nam disiya, nam hiliɓ nagana, setem iranu, nan muz goyo, bugolda nan muɗ wi'e.

¹⁶ Sum sara jar sa Farisena di'e: San kayni may vi Lawna paɗi, kay nam may li kuɗ gatta vi sabatnaɗi. Segena di'e: Sa ma sulukŋa as kay li ɗekka ki kayn nala ir nanige?

¹⁷ Kuɗ kayni ɓurawta coowa jarsiya. Nisi di tam sa ma dukina lo: Naŋu naŋ di mige kalamu, kay nam malaŋ iraŋawa goyo? Nam hot dita: Nam kayni mi sa ma jobta-Lawna.

¹⁸ Sa Yudiyan may vi ala san kayni ay dukiya, iram mal kayn maliyaɗi, nala nisi yi sumiyam aya.

¹⁹ Nisi tun caw jobsi ala: Zawn mi goora vigi ma nigi di kalam ala nam vuɗi dukiyan su? Wulin nam ka wi kayn ir nanige?

²⁰ Sumiyam hot dita: Numa wi ala zawn mi goora vuma'a, nam vuɗi dukiya kaw;

²¹ may wulini nam wi kayn witige kla numa may wi van kaynɗi. Lebo sa ma malam iram goyn mi gigekaw numa wi kaynɗi. Nam wulam vatiya, nigi jobomu, nam as di lawta valam kay tuwamu.

²² Sumiyam di nala kay nisi li nar kay sa yudiyana, kay sa yudiyana col lawta ala: La sa di goy ala Yesu kayni mi Kristu, nam ma fi gita-goyta hay sinagogayna pa.

²³ Kay na'ta sumiyam di ala: namu wulam vatiya, nala nigi ma jobomu.

²⁴ Sa Farisena yi sa ma vuɗi dukina hay sem ma ma'na lo dumu: Vulaŋ suburta mi Lawna; may numa hayɗin wi ala san kayni mi sa ma suluku.

²⁵ Nam hot dita: La nam suluku, nan may wi kaynɗi, va ma nan wum kep kayn ala: Jewe nan ay dukiya, may wulini nan ka wi'e.

²⁶ Nisi dumu: Nam lum taŋ mi mige? Nam malaŋ iraŋ maltige?

²⁷ Nam hot dit tisiya: Nan digi vatawa, may nigi min hum kaynɗi, nigi min humum lo kay mige? Nigi min muɗ goy sa hatayna valam kaw su?

²⁸ Nisi ŋulumu di'e: Sa ma hatayna valam kayni mi naŋu. Numa kayni si sa hatayna vi Musus.

²⁹ Numa wi'e Lawna law tam Musus, may namu, numa wi liyn ma nam may hayam panɗi.

³⁰ Sa namna hotsi dita: Kayni mi va ma muɗ ɦuyum yo, nigi wi liyn ma nam may hay panɗi, nir na'ta kep nam malan iranawa goyo.

³¹ Nay wi kaw ala Lawna may hum sa ma sulukŋaɗi, may nam humum kayni mi sa ma hot yalam gaa kuɗumu, li minda valamu kaw.

³² Hay jew ɓa-ɓa pa, sa bay hum ala sa as mal ir sa ma dukin goyo tuwa.

³³ La san kayni may vi Lawna paɗi, nam as li va noŋɗi.

³⁴ Nisi hotom dita: Naŋ kay tuwaŋu vuɗi yuluk' hay sulukŋa, wulini muɗi hatma kayni mi naŋ yo ɗisu! Nisi gum goy jiya.

³⁵ Hay na'ta kayni Yesu hum ala nisi gum goy jiya. Nam fumu dumu: Naŋ vaawa hay goora vi Lawna su?

³⁶ Nam hot dit ala: Bum-Sumuna, nam ma nan vi hayamna kayni nam gige?

³⁷ Yesu dumu: Naŋ wumawa, nam ma ka daŋu kayni mi namu.

³⁸ Nam ka dumu: Nan vi'e Bum-Sumuna, nam girif gaa vokomu kaw.

³⁹ Bugolda Yesu di'e: Nan maawa hay nagata kay ka kitata, kay nisi sa wiɗi as muɗ wi'e, nisi sa wi'e ma muɗ dukiya kaw.

⁴⁰ Sa Farisena sa lakay hiɗi namna hum yoboyna kayni, nisi dumu: Numa kaw duki lay su?

⁴¹ Yesu hotsi dita: Lali nigi ay dukiya, sulukŋa vigi mayɗi. May wulini nigi di'e: Numa ka wi'e. Kay na'ta sulukŋa vigi ka dok-doko.