YOHANA 7 - BIBALDA TA PELDETTA

Bay-vida vi ɓosiyom Yesuna

¹ Bugol kayni, Yesu ka poy hay Galileya, nam min poy hay Yudiya loɗi, kay sa yudiyana gar kay cum goyo.

² May, yuldeta vi sa yudiyana, yuldeta vi guɗukŋa ka co goboyo.

³ Ɓosiyomna dumu: Tuɗaŋis tan pa, kalaŋ hay Yudiya. Kay sa hatayna vaŋu as ɗuw lopna ma naŋ ka lumna.

⁴ Kay sana as li va goy ŋayayɗi, la nam min ala sumuna wum goy haraŋi. La naŋ ka li slen kayni, ɗekaŋ tuwaŋ goy kir sumuna.

⁵ Kay ɓosiyomna kaw vi hayamɗi.

⁶ Yesu disi ala: Liyna van bay co tuwa, may liyna vigiya ka dok-doko.

⁷ Sa nagatna as ka gawt kigiɗi, may nisi ka gawt kanu, kay nan di goy kisiya kay lopna visi kayn joo'o.

⁸ Nigiya, tuɗgi kulo hay yuldeta. Nanu, nan may tuɗ kulo hay yuldet kaynɗi, kay liyna van bay co tuwa.

⁹ Hay li ma Yesu di lawta kayni tisi dina, nam hinis malam hay Galileya.

Yesu ka hay Yerusalem hay yuldeta vi guɗukŋa

¹⁰ Hay li ma ɓosiyomna kalay kulo hay yuldeta kalla, nam kay tuwamu kaw kalay kulo lay, nam vul tuwam goy haraŋɗi, may ki ŋayay nala.

¹¹ Hay na'ta sa Yudiyana garam hay yuldeta, di'e: Nam ka arige?

¹² Jar sum sa dakayna ŋurnayta ka li kalamu: Sa hena di ala: Nam mi sa ma ŋaana, segena di'e: Hay! Nam ka viy sumun goyo.

¹³ Nir na'ta kep sa di va goy kalam haraŋɗi, kay nisi li nar kay sa yudiyana.

¹⁴ Hay li ma yuldeta ka li'e, Yesu kalay kulo hay Tempella, nam hata.

¹⁵ Sa yudiyana muɗi ɦuyum' di'e: nam wi ɗot kayn ir nanige, kay nam may hata'ɗi?

¹⁶ Yesu di tisiya: Hatta van kayni may van paɗi, may na' may vi nam ma ganina.

¹⁷ La sa min li minda valamu, nam ma wi hatta vanu, la na' may vi Lawna lebo nan law kayni kay tuwan ma ɗeŋŋa su.

¹⁸ Sa ma di kay tuwam ma ɗeŋŋa nam gar kay subur tuwamu; may nam ma gar suburta vi nam ma gumina nam gasiya, bay-ɗigerta may hayamɗi kaw.

¹⁹ Musus may vulgi gattaɗi su? May sa kep jargiya kaw ma li kuɗ gatta mayɗi, nigi gar kay can goyo kay mige?

²⁰ Sumuna hotom dita: Naŋ zawn ful kaŋu. Sa ma gar kay caŋ goyn mi gige?

²¹ Yesu hotsi dita: Nan li lopna kep ma nigi kaf muɗi ɦuyum' kuɗumu.

²² Musus vulgi ka-gosayta -- may kay na' may vi Musus paɗi, may vi sumaygi pa -- Nala nigi ka san gosaya hay sabatna.

²³ La sana fi ka-gosayta hay sabatna, kay kus gatta vi Mususɗi, nigi muɗ ɦiy katanu kay nan muɗ san noŋo goy ŋaa'a hay sabatna kay mige?

²⁴ Ka kitat kuɗ va ma nigi wum goy jiyamnaɗi, may kaagi kitata kuɗ ɗigerta.

²⁵ Sum sara sa hay Yerusalem di'e: Zawni mi nam ma nisi garam kay cum goyna ɗisu?

²⁶ Nam ka colay kus yoboyn goy haraŋi, nisi di va talam noŋɗi kaw! Sa ŋulona wum goy haraŋ ala zawn mi nam Kristu lay su?

²⁷ Kay nam ma zawnina numa wi liyn ma nam may hay pana, may hay li ma Kristu ma ɗawni, sa as wi liyn ma nam ka haynaɗi.

²⁸ Hay li ma nam ka hat hay Tempella, nam siwela di'e: Nigi wanu, wi liyna ma nan may hay pana kaw! Kay nan maawa kay tuwan ɗeŋɗi, may nam ma ganina nam gasiya, nigi wumɗi may.

²⁹ Nanu, nan wumu, kay nan may goy hay namu, ganay kayni mi namu kaw.

³⁰ Nisi gar kay vumu, may ɓam sa kep kaw tun talamɗi, kay liyna valam bay co tuwa.

³¹ Sumuna ŋolo jar tokŋa vi hayamu, nisi di'e: Hay li ma Kristu namna kayn maawana, nam ma li ɗekka ŋol suw ma nam lumna zawni su?

³² Sa Farisena hum sumuna ka ŋurnay kalamu. Nala muliyan ŋulo sa-ɗifinna hiɗi sa Farisena cuk sa sunda kay vumu.

³³ Yesu disiya: Nan ka hiɗi nigiya ir liyn neeɗa ɦawa; bugolda nan ma tuɗ tam nam ma ganina.

³⁴ Hay liy namna ɗawn nigi ma garanu, may nigi ma fanɗi, liyn ma nan ma mus haya, nigi as co hayɗi kaw.

³⁵ Sa Yudiyana di jar-tuwsiya: Nam ma tuɗ arige, a nay as fumɗi kayni? Nam min kal goy tam sa Yudiyana sa meray goy jar sa Grekŋa kay hat sa Grekŋa su?

³⁶ Yoboyna ma nam dum ala: Nigi ma garanu, may nigi ma fanɗi, liy ma nan ma mus hayna, nigi as co hayɗi kaw, kayni min ɗek mige?

³⁷ Wulini hay buur ma cawna, buurta ŋolda hay yuldeta, Yesu col kulo'o siwela di'e: La laat ka li sa'a, nam ma ma tanu kay ci'e.

³⁸ Nam ma vi hay nanu, goy hayam pa, niyna ma irina ma ɓatna ma jaŋay goyo, ki ɗota di nala.

³⁹ May nam di kayni kay Ŋusta ta nisi sa min vi hayamna ma fa'ta; kay Ŋusta bay vuli tuwa, kuɗ ta ala Yesu bay fi gajijit tuwa.

⁴⁰ Sumuna sa jar tokŋa, hay li ma nisi hum kayni, nisi di'e: Nam zawni mi sa ma jobta-Lawna gasiya.

⁴¹ Segena di'e: Zawn mi Kristu. Segena lo di'e: Litige! Kristu may goy hay Galileya pa su?

⁴² Ɗota di ala Kristu nam ma ɗawn hay jafna vi David, hay hoyok-ziyna Betlehem, liyna ma David ay hayna ɗisu?

⁴³ Nala ɓurawta co jar sumuna kuɗumu.

⁴⁴ Sum sara jarsiya min vumu, may sa ma tun ɓalam talam mayɗi.

⁴⁵ Sa sunda hotay tam muliyan ŋulo sa-ɗifinna hiɗi sa Farisena ka disi ala: Nigi may maramayɗi kay mige?

⁴⁶ Sa sunda hotsi dita: Sa mara ma law ki san zawni nala mayɗi.

⁴⁷ Sa Farisena ka di tisi ala: Nigi kaw ɗuti goy lay su?

⁴⁸ Sa mara ma jar sa ŋulona lebo jar sa Farisena ma vi hayam ka su?

⁴⁹ May sum nisi sa wi gattaɗin tani, nisi si sa beɗay goyna!

⁵⁰ Nikodemus, nam ma may tam Yesu jewe, nam kep ma ay jarsiya, disiya:

⁵¹ Gatta vay jun sana, jew sa bay hum lawta valamu, jew nam bay di va ma nam lumna kaw su?

⁵² Nisi hotom dita: Naŋ kaw, naŋ mi sa ma Galileyan lay su? Fekaŋ ŋaa'a, naŋ ma wi ala sa ma jobta-Lawna may goy Galileya paɗi.

Cata ta bulota

⁵³ Nisi mera, gigekaw hay ziyna valamu valamu.