YOHANA 5 - BIBALDA TA PELDETTA

Yer-goyta vi sa ma moy ma Betestana. Pi-lawta vi sa yudiyana kay Yesu hiɗi hot-dita valamu

¹ Bugol kayni yuldeta vi sa yudiyan li'e, nala Yesu kalay kulo Yerusalem.

² May hay Yerusalem, goboy tam vun-ziyna vi fok-dimina, goor-goloŋ kep aya, ma yum Betesta hay vun Hebrena, diɓira ka ŋuyi talam vasl.

³ Gaa kuɗ diɓir namna sa moyna ka dakay ŋolo: Sa dukina, sa dirlayna, sa hurɓulina kaw, kay zam ɦiwirta-kulota vi niyna.

⁴ Kay hay fattiɗeŋ kep, sunda-wuralawna jikay gaa'a hay goor-goloŋŋa, ɦiwir niyna kulo'o. Sa ma jikay gaa'a jewe hay li ma niyna ɦiwir kulo dena, nam fi muɗ goy ŋaa'a, la talam mi moy mige kaw.

⁵ Sa kep ay waŋ', nam musi hiɗi moyna ir busat dok-ɦidi yam glafandi.

⁶ Yesu wum gaa buri waŋ', nam wi kaw ala nam ay tan waŋŋi musi ŋolo. Yesu dum ala: Naŋ min muɗ goy ŋaa'a su?

⁷ Sa ma moyna hotom dita: Bum-Sumuna, sa ma as kay gan hay goor-goloŋga hay li ma niyna ɦiwir kulo'o mayɗi, hay li ma nan tuɗa, sa mara jik gaa jewanu.

⁸ Yesu dumu: Fokaŋ kulo'o, slaŋ va ma buura vaŋu, tuɗaŋ maŋu.

⁹ Wulini wulini sana muɗi goy ŋaa'a; nam sli va ma buura valamu, kalay malamu.

¹⁰ Fat na'ta kayni mi buur ma sabatna. Sa Yudiyana ka di tam sa ma muɗi goy ŋaana ala: Vaydi mi buur ma sabatna, hagat may kaŋ kay ziy va ma buura vaŋɗi.

¹¹ Nam hot dita, sa ma muɗan goy ŋaana dan ala: Slaŋ va ma buura vaŋu, tuɗaŋ maŋu.

¹² Nisi jobom ala: Sa ma daŋ ala naŋ slumu tuɗaŋun mi gige?

¹³ May sa ma muɗi goy ŋaana wi ala san kayn nalaɗi; kay hay liy namna kayni sumuna ay ŋolo, Yesu ba jarsiya.

¹⁴ Bugol kayni Yesu fum hay Tempella ka dumu: Ɗuwaŋu naŋ muɗi goy ŋaa'a, naŋ ma li suluk loɗi, kay va ma joo'o suw kayni ma li taŋɗi.

¹⁵ San kayni kalay tam sa yudiyana kay disi ala muɗum goy ŋaa'a dolay kayni mi Yesu.

¹⁶ Kay na'ta kayni sa yudiyana gar Yesu bik-bik', kay nam li slen kayni hay sabatna.

¹⁷ May nam hotsi dita: Bunu ka li lopo ta-ta wulini, nala kaw nan li lopo.

¹⁸ Kuɗ kayni sa yudiyana garam ŋolo suw jewe kay nisi min cum goyo, may kay ta ala nam raw gatta vi sabatna goyota tutaɗi, may kay nam di ala Lawna mi bulumu, lo ala nam ŋra tuwam kal-kal' hiɗi Lawna.

¹⁹ Yesu hotsi dita: Nan digi gasita: Goora as li va kay tuwam ma ɗeŋɗi, may mi va ma nam wi bumna li'e; slen kaf ma bumna li'e, goora lum mi va namna kaw.

²⁰ Kay bumna min goora, nam ɗekem lop ma ŋulona ma suw kay slen kaf ma nam li'e, nam ma ɗekem lop ma ŋulona ma suw kayni, kay nigi ma lak jiɓer ɦuyum'.

²¹ Kay ki bumna day sa mitin kulo'o, muɗsi iriya kaw, goora vi san kaw as muɗ iriya gigekaw ma nam mina.

²² Lo bumna may ka kitata kay saɗi, may nam vul kitatawa kaf mi goora,

²³ Kay sumun kaf ma vul suburta mi goora ki nisi vul suburta mi bumna nala kaw. Sa ma vul suburta mi gooraɗi, may vul suburta mi Bumna ma guminaɗi kaw.

²⁴ Nan digi gasita, sa ma hum yoboyna vanu, vi hay nam ma ganina kaw, nam fi irita ta vatɗitawa, nam ma co hay kitatɗi kaw, may nam rawawa goy hay mitta pa kal hay irita.

²⁵ Nan digi gasita, liyn ka co'o -- ka wulini kaw -- liyna ma sa mitina fi hum del Goora vi Lawna; nisi kaf sa humumna ma lak iriya.

²⁶ Kay ki irita ka hay Bumna kay tuwamu, nala kaw nam vul irita hay Goora kay tuwamu.

²⁷ Nam vulum donota kay ka kitata, kay nam mi goora vi sana.

²⁸ Muɗgi ɦuyum' kay kaynɗi; kay liyna ma co'o, liyna ma sumuna sa hay zulla kaf ma humum delemu.

²⁹ Nisi sa li ŋaatawa ma kalay goyo hay dayta-kulota vi irita, may nisi sa li joota hay dayta-kulota vi kitata.

³⁰ Nanu, nan as li va kay tuwan ma ɗeŋɗi: Kuɗ va ma nan huma, nan ka kitata; ka-kitata vanu na' ɗigere, kay nan gar kay li minda vanɗi, may minda vi nam ma ganina.

³¹ La nan li di-goyta kay tuwan ma ɗeŋŋa, di-goyta van may gasiɗi.

³² Sa mara li di-goyta kanu, nan wi kaw ala di-goyta ma nam li kanu kayni gasiya.

³³ Nigi cuk sumun ay tam Yohana, nam li di-goytawa kay gasita.

³⁴ Di-goyta ta nan fa' kan nanu, na' may vi sa paɗi, nan di ki kayn nala kay nigi ma fi suɗ goyo.

³⁵ Yohana ay kayn mi fitilla ma ŋala, wile kaw, may nigi li firitawa kuɗ haraŋa valamu ir leer kep ɦawa.

³⁶ Nanu, nan ka hiɗi di-goyta ta ŋolo suw di-goyta vi Yohana; kay lopna ma bumna vulanawa kay hobom vunam kulo'o, lop namna ma nan lumna li di-goyta kan kaw ala Bumna ganiyawa.

³⁷ Bumna ma ganina, li di-goyta kanu kaw. Nigi hayɗin humum delem ka noŋɗi, wum iram noŋɗi kaw,

³⁸ nala yoboyna valam may mus haygiɗi, kay nigi min vi hay nam ma guminɗi.

³⁹ Nigi ka fek ɗota, kay nigi var ala nigi ma fi irita ta vatɗita haya'a: Na' kayni ta ka di goy kanta.

⁴⁰ Nigi min ma tanu kay fi irita ta vatɗitaɗi!

⁴¹ Nan min fi suburta ta may tam sumun paɗi.

⁴² May nan wigiya: Minda vi Lawna may haygiɗi.

⁴³ Nan maawa hay semda vi bunu, nigi may vanɗi; may la sa mara'a ma hay semda valam kay tuwamu, nigi ma vi kuɗumu!

⁴⁴ Nigi sa fi suburta vigi kuɗ tuwgi jar-tuwgiya, may suburta ta may vi Lawna ma kepna pata nigi gara'ɗi, nala nigi as vi ɗawn nanige?

⁴⁵ Nigi ma var ala, nan ma tun lawta kigiya vok Bumnaɗi. Nam ma min tun lawt kigina, mi Musus ma nigi zam kuɗ cubta-sle'ta hayamu.

⁴⁶ La nigi vaawa hay Musus, nigi ma vi hayanu kaw, kay nam ɗo kayn kan nanu.

⁴⁷ May la nigi vi kuɗ ɗona valamɗi, nigi as vi kuɗ yoboyna vanu nanige?