YOHANA 18 - BIBALDA TA PELDETTA

MITTA HIƊI DAYTA-KULOTA VI YESU Nisi vi Yesu

¹ Hay li ma Yesu di na dina, nam kalay goyo hiɗi sa hatayna, kay tuɗ goy gal hena vi niy-lum ma riŋŋa vi Sedron, hay li ma jardeŋŋa ka haya, nam hiɗi sa hatayna valamu, nisi cuk hayamu.

² Yudas, ma di newt kalamna, wi liyn namna, kay Yesu hiɗi sa hatayna valamu fi tuwsi hay liy namna dok-dok.

³ Yudas yaw vokŋa vi sojena hiɗi sa sunda vi muliyan ŋulo sa-ɗifinna, hiɗi sa sunda vi sa Farisen kuɗumu, hiɗi torsena, ku ma doyna, hiɗi sle-ma-duura hay ɓisiya kaw.

⁴ Kay Yesu wi slen kaf ma min ma kalamna, nam tuɗ kirsiya disiya: Nigi garam gige?

⁵ Nisi hotom dita: Yesu ma Nasaretna. Nam disiya: Zawn mi nanu. Yudas, nam ma di newt kalamna, ka colay hiɗi nisi zaw lay.

⁶ Hay li ma Yesu disi ala: Zawn mi nanu, nisi hot goy bugolsiya, yak gaa'a kaw.

⁷ Nam jobsi mara lo: Nigi garam gige? Nisi di'e: Yesu ma Nasaretna.

⁸ Yesu hot dita: Nan digi ala zawn mi nanu, la nigi garanti kayn mi nanu, nisi sa lakŋa nigi hinsi tuɗa.

⁹ Kayni kay hob vun yoboyna ma nam dumna kulo'o: Sa naŋ vulantina nan may ba mara goy kuɗsi kepɗi.

¹⁰ Simon Peter ma kew-gaferaŋ ka hay ɓalamu, patam goyo, cal hum sa ma sunda vi mul ŋol ma-ɗifinna, kaam humam ta jufta goyo. Sa ma sunda kayni selem ala Malkus.

¹¹ Yesu di tam Peter: Hot kew-gaferaŋa vaŋ hay sitaara. Kaway-ma-cina ma bun vulanawa, nan ma cumɗi su?

Yesu ka vok Anas hiɗi Kayfas, Peter puw vunam kay Yesu

¹² Vokŋa vi sojena hiɗi kapiten ŋolla visiya hiɗi sa sunda vi sa Yudiyana vi Yesu, junumu kaw.

¹³ Jewe nisi tuɗum tam Anas; kay nam ay mi kuno Kayfas ma ay mul ŋol ma-ɗifinna hay busat na'ta.

¹⁴ Kayfas kayni mi nam ma gat sa Yudiyana ala: Ŋaa'a kay san kep mit kay sum sa noŋ tana.

¹⁵ May, Simon Peter, hiɗi sa ma hatayna mara kep, tapay kuɗ Yesu. Mul ŋol ma-ɗifinna wi sa ma hatayn namna, nam zum vutoŋ hiɗi Yesu hay wur-daŋŋa vi mul ŋol ma-ɗifinna;

¹⁶ may Peter colay goy jiya, goboy tam vun-galana. Sa ma hatayna ma hena ma mul ŋol ma-ɗifinna wumna, kalay goy jiya, di goota ta ŋom vun-galana, hin Peter kalay vo'o.

¹⁷ Nala goota ta sunda, ta ŋom vun-galana di tam Peter: Naŋ kaw, naŋ may jar sa hatayna vi san zawnɗi su? Nam di'e: May nanɗi.

¹⁸ Sa sunda hiɗi sa ŋomda ŋal kuna hay ganuna, kay liyn liy sleɗe, nisi kaf lakay vun kuna kay hol tuwsiya. Peter kaw colay vun kuna hiɗi nisiya kay hol tuwamu kaw.

¹⁹ Mul ŋol ma-ɗifinna ka job Yesu kay sa hatayna valamu, kay hatta valamu kaw.

²⁰ Yesu hotom dita: Nan di goy haraŋ tam sumun kaf; nan hat hay sinagogayna hiɗi Tempella dok-dok, liyn ma sum sa yudiyana kaf ka tok tuwsi haya, nan di yoboyn mara goy ŋayayɗi kaw.

²¹ Naŋ joban kay mige? Jobaŋ nisi sa humaniya kay slen ma nan lawamay tisiya; nisi wi sle ma nan dum tisina goy ŋaa'a.

²² Hay li ma nam di kayni dina, sa kep jar sa sunda sa lakayn kayni, ci Yesu geliyamu di'e: Naŋ hot dita mi mul ŋol ma-ɗifinna ki kayn nala su?

²³ Yesu hotom dita: La nan di joo'o, daŋ goy kay joota van hawtige! May la nan di hay liyamu, naŋ can kay mige?

²⁴ Nala kaw Anas jokom juni jun' mi Kayfas, mul ŋol ma-ɗifinna.

²⁵ May Simon Peter colay malam hol tuwam zaw. Nisi dumu: Naŋ kaw, naŋ kayn kep jar sa hatayna valamɗi su? Nam puw vunamu di'e: May mi nanɗi.

²⁶ Sa ma sunda kep jar sa sunda vi mul ŋol ma-ɗifinna, goor-bum nam ma Peter kaam humam goyna, di'e: Nan may waŋay hiɗi nam hay jardeŋɗi su?

²⁷ Peter puw vunam lo, wulini wulini slek-gulokŋ hela.

Yesu vok Pilatus

²⁸ Nisi vi Yesu vo vi Kayfas pa, tuɗum hay Pretoriyum, hay graw culum. May nisi kay tuwsi cuk kalaf hay Pretoriyumɗi, kay ŋom tuwsi pasiyak a nisi fi ti Paskata.

²⁹ Pilatus kalay goy jiya, tuɗ ŋafsi irsiya di'e: Lawta ta nigi min pa' kay san zawni ti law mige?

³⁰ Nisi hotom dita: Lali nam mi sa ma jooɗi, numa as vulum goy taŋɗi.

³¹ Pilatus disiya: Nigi kay tuwgi vigita, kaam kitata kalamu kuɗ gatta vigiya. Sa yudiyana dumu: Hagata vuli tuma'a kay ci sa goy matɗi.

³² Kayn li'e kay vun yoboyna vi Yesu ma nam dumna hob kulo'o, kay ɗek kay ir mitta ta nam ma mit hiɗi na'ta.

³³ Pilatus hot vo hay Pretoriyumna, yi Yesu dumu: Naŋ mi mulla vi sa Yudiyana su?

³⁴ Yesu hot dita: Van kayni naŋ dumawa kay tuwaŋu, lebo sum sara daŋ kaw su?

³⁵ Pilatus hot dita: Nanu, nan mi sa ma Yudiyan su? Sumuna vaŋu hiɗi muliyan ŋulo sa-ɗifinna vulaŋ goy hay ɓanu; va ma naŋ lumna mi mige?

³⁶ Yesu hot dita: Mulda van tay vi nagat tanɗi. Lali mulda van vi nagat tani, sa sunda vanu duriyawa kanu, kay nan fi vulis goy hay ɓam sa Yudiyanɗi kaw; may wulini mulda van may gaa tanɗi.

³⁷ Pilatus dumu: Yo! Naŋ dolay mi mulu? Yesu hot dita: Naŋ daawa, nan mi mulla. Nan vuɗi kay kayni, nan maawa kay nagata kay kayni kaw: Kay di goy kay gasita. Gigekaw ma ka hay gasita human delanu kaw.

³⁸ Pilatus dumu: Gasita kayni mi mige? Hay li ma nam di kayni dina, nam kalay goy jiya lo, tuɗ tam sa Yudiyana disiya: Nanu, nan fi lawta ne' kalamu kay junumɗi kaw.

³⁹ May ki hay data vigiya dok-doko, nan ka gigi sa kep kep hay yuldeta vi Paskata, nigi min ala nan gigi mulla vi Yudiyan kayn su?

⁴⁰ Nisi hot siwel mara lo ala: A'a, nam ma zawnɗi, may Barabas. Barabas ay kayni mi sa ma coŋcoloŋŋa.