YOHANA 13 - BIBALDA TA PELDETTA

DITA VI YESU TA CAWTA HIƊI SA HATAYNA VALAMU Yesu muz sem sa hatayna valamu

¹ Jew yuldeta vi Paskata, Yesu wi ala leera valam coowa a nam kalays goy hay nagat tan pa raw tam bulumu, nam ma min sa falayna sa ays hay nagata, nam minsiya ta-ta hay dabta vi liyna.

² Hay li ma nisi ka ti'e: May hay liy namna kayni Matna gi varta hay dik Yudas, goora vi Simon, kay vulum goyo,

³ Yesu ma wi ala Bumna hinim slenawa kaf hay ɓalamu, ma wi ala nam may vi lawna pa, nam hot ɗawni tam Lawna kawna,

⁴ nam fokay kulo'o kat tablena pa, fok sligara valam goyo, yaw sligar ma fiyok letetna, junum furamu.

⁵ Bugolda nam ɦok niyna gaa hay ŋarakŋa, tun caw muz sem sa hatayna valamu, ɦassi sesi goy kaw hiɗi sligar ma letetna ma juni furamna.

⁶ Nam co tam Simon Peter ma ka dum ala: Naŋ Bum-Sumuna, naŋ musan sen mi naŋu su?

⁷ Yesu hotom dita: Va ma nan lumna zawni naŋ as humum cawam wulinɗi, may naŋ ma humum cawam bugolda.

⁸ Peter dumu: A'a, la linigekaw muzan sen mi naŋ hayɗi, Yesu hotom dita: La nan musaŋ seŋɗi, galla vaŋ may hiɗi nan noŋɗi.

⁹ Simon Peter dumu: Bum-Sumuna, muzan sen valamɗi, may ɓanu hiɗi yanu kaw.

¹⁰ Yesu hotom dita: Sa ma muz tuwamawa goyona, nam as muz tuwam mara loɗi, may muzum mi selemu, may tuwam kaf bay-liwisi; nala nigi ka bay liwisi, may nigi kafɗi.

¹¹ Kay nam wi nam ma di newta kalamna; kay na'ta nam di'e: Nigi kaf may peldetɗi.

¹² Hay li ma nam muzsi sesi muzna, yaw sligara valamu cukum talam cana kaw, nam mus gaa kat tablena lo ka disiya: va ma nan lum tigin kayni nigi humum cawamawa su?

¹³ Nigi yan ala Bum-hatta hiɗi Bum-Sumuna, nigi di kayn hay liyamu kaw, kay nanu mi namu.

¹⁴ May la nan mi Bum-hatta hiɗi Bum-Sumuna, muzgi segiyawa, nala nigi kaw ma muz segi jar-tuwgiya tuwgiya;

¹⁵ kay nan li ɗekkawa tigiya, a nigi ma li ki nan laawa tigiya nala kaw.

¹⁶ Nan digi gasita, sa ma gorvona may ŋol suw mulamnaɗi, sa ma sunda kaw ŋol suw sa ma gumi sunnaɗi.

¹⁷ La nigi wi slen kayni, sle'ta kigiya, kay la nigi li kuɗumu.

¹⁸ Nan may di slen kayni kigi nigi kafɗi; nan wi nisi sa nan vileksi goyna. May a vun-ɗota ma hob kulo'o, ɗota ta ala: Nam ma ka ti fun hiɗi nanu sli dubukam kulo katanu.

¹⁹ Tun caw wulin pa, nan digi kay slen ma min co'o, jew lita valamu, kay hay liyn ma nam coowa, nigi ma vi ala nan mi namu.

²⁰ Nan digi gasita: Sa ma vi nam ma nan guminawa, nam vantin mi nanu, nam ma van nanu, vi nam ma ganina kaw.

Yesu di ala Yudas ma di newta kalamu, Peter ma puw vunam kalamu kaw

²¹ Hay li ma Yesu di nala dina, nam yor tuwamu hay Ŋusta valamu li di-goyta ala: Nan digi gasita, sa mara jargi kep ma di newt kanu.

²² Sa hatayna valamu ɗuw ir tuwsiya, nisi job jar-tuwsiya kay sana ma nam ka law kalamna.

²³ Sa kep jar sa hatayna, nam ma Yesu minimna, ay musi gaa tam tablena goboy hiɗi Yesu.

²⁴ Simon Peter lum iram mirik' dum ala: Daŋaya, naŋ law kayn kay gige?

²⁵ Sa ma hatayn namna gah dig Yesu ka dum ala: Bum-Sumuna, nam mi gige?

²⁶ Yesu hotom dita: Namu ma nan jiyob fu ma jutina, vulumti ɗawni mi namu. Nam jiyob fu ma jutina, vulum mi Yudas, goora vi Simon Iskariyot.

²⁷ Bugol Yudas fi fu ma jutina fina, Satan kal hayamu. Yesu dumu: Va ma naŋ min lumna laŋgi gosoyo.

²⁸ May sa kep ma musi kat tablena ma hum ala kay mige nam dumay nala mayɗi.

²⁹ Kay ki birimna ka hay ɓam Yudas, segena var ala Yesu ka dum kayn ala: Gusaŋ slen ma nay min lum hay yuldetna, lebo, vulaŋ va goy mi sa hawna neeɗa.

³⁰ Yudas vi fu ma jiyobina, kalay goy wit' de, liyn liy henje'e.

³¹ Hay li ma Yudas kalay goy kalla, Yesu di'e: Wulin kayni goora vi sana fi suburtawa, Lawna fi suburtawa hayamu kaw.

³² La Lawna fi suburtawa hayamu, Lawna ma vulum suburta hay tuwam ma ɗeŋŋa kaw, nam ma vulum gajijita gosoyo.

³³ Nigi gurosgurayna, nan ka hiɗi nigiya ir tuwa neeɗa. Nigi ma garanu, may ki nan di tam sa yudiyana nala: Liyn ma nan tuɗ hayna nigi as co hayamɗi, tigi nigi nala kaw, nan digi wulini.

³⁴ Nan vulgi vun-ma-gatna ma wuliya: Mingi jar-tuwgiya tuwgiya; ki nan mingiyawa nala, nigi kaw mingi jar-tuwgiya tuwgiya.

³⁵ Kay hiɗi kayni sumun kaf ma wi ala nigi si sa hatayna vanu, la minda vigi ka jar tuwgiya tuwgiya.

³⁶ Simon Peter dumu: Bum-Sumuna, naŋ min tuɗ arige? Yesu hotom dita: Liyn ma nan tuɗ hayamna ɗawni, naŋ ma tuɗis kuɗan wulinɗi, may naŋ ma tuɗis kuɗan hay vokka.

³⁷ Peter dumu: Bum-Sumuna, nan as tuɗis kuɗaŋ wulinɗi kay mige? Nan ma hin irita van goy kaŋu.

³⁸ Yesu hotom dita: Naŋ as hin irita vaŋ goy kanu su? Nan daŋ gasita, jew a slek gulokŋ hela, naŋ ma puw vunaŋ kanu sem ɦidi ala naŋ wanɗi.