YOHANA 11 - BIBALDA TA PELDETTA

Dayta-kulota vi Lasarus

¹ San kepe ay moyo, Lasarus ma hay Betaniya, hoyok-ziyna vi Mariya hiɗi ɓasu'ta Marta.

² Kayni ti Mariya ta set tuw Bum-Sumuna hiɗi mula, ɦasam selem hiɗi ɗuŋusa'a kaw, ɓasu'na Lasarus li moyo.

³ Ɓosiyom-tuwsina gi sunay tam Yesu dumu: Bum-Sumuna, nam ma naŋ minimna ka moyo.

⁴ Hay li ma Yesu hum kayni, nam di'e: moy namna kayni may tam mittaɗi, may kay gajijita vi Lawna, kay Goora vi Lawna ma fi gajijit kuɗ moy namna kayni.

⁵ May Yesu min Marta hiɗi ɓasu'ta, hiɗi Lasarus kaw.

⁶ Hay li ma nam hum ala nam ay moyo, nam mus hay liyn ma nam ay hayna ir buur ma' lo.

⁷ Bugolda nam di tam sa hatayna: Nay hotay hay Yudiya lo.

⁸ Sa hatayna dumu: Rabbi, goboy tani sa yudiyana min gaŋ hiɗi goorhoyona, may naŋ min hot hay liy namna lo kayn ir nanige?

⁹ Yesu hotsi dita: Leera ka doogo yam ma' hay fatta kep ɗisu? La sana ka tuɗ hay falayta, dugumna as kay cumɗi, kay nam wi haraŋa vi nagata;

¹⁰ May la sana tuɗ hay henjeta, dugumna as cumu kay haraŋa may hayamɗi.

¹¹ Bugol yoboyna kayni nam di'e: Banayna lasarus kalay sene, may nan min tuɗ kay zliyim kulo'o.

¹² Sa hatayna dumu: Bum-Sumuna, la nam kalay sene, nam ma suɗ goyo.

¹³ Yesu law kayn kay mitta, may nisi var ala nam di kayni kay senda ɦawata.

¹⁴ Kay na'ta Yesu di goy tisiya: Lasarus mitiya.

¹⁵ Hayan firiya kigiya kay nan ay ɗawaynɗi, kay nigi ma vi'e. Nala nay tuɗay talamu.

¹⁶ Kuɗ dit kayni, Tomas ma yum Didimus di tam nuriyom sa hatayna ala: Nay kaw tuɗay kay mit hiɗi namu.

¹⁷ Hay cota valamu, Yesu fi kayn ala Lasarus liy buur fiɗi gaa hay zulda.

¹⁸ May Betaniya ka goboy tam Yerusalem, jarsi li ki stade doogo yam vasl nala.

¹⁹ Sa Yudiyana ŋolo ma tam Marta hiɗi Mariya kay teŋsi irsi kay mitta vi ɓasusina.

²⁰ Hay li ma Marta hum ala Yesu ka tuɗaya, na' tuɗ ŋafam iramu, may Mariya musay ma' goy vo'o.

²¹ Marta di tam Yesu: Bum-Sumuna, lali naŋ ay tani, ɓasunna fi mitɗi.

²² May wulini nan wi ala va mige kaw ma naŋ jobom tam Lawna nam as vulaŋga.

²³ Yesu da'a: Ɓasukŋa ma day kulo'o.

²⁴ Marta di'e; Nan wi ala nam ma day kulo'o hay dayta-kulota hay buur ma cawna.

²⁵ Yesu da'a: Nanu mi dayta-kulota, mi irita kaw. Nam ma vi hay nanu ma mus iriya, la nam mit kaw;

²⁶ La gigekaw ma mus iri hay nanu, vi hay nanu kaw, nam ma mit noŋɗi, nak vi nala su?

²⁷ Na' dumu: Awa, Bum-Sumuna, nan wi ala naŋ mi Kristu, goora vi Lawna, nam ma min ma kay nagata.

²⁸ Hay li ma na' di kayni dina, na' kalay goyo, yi basu'ta Mariya goy ŋayaya da'a: Bum-hatta ka tani, nam ka yagu.

²⁹ Hay li ma Mariya hum na kayni, na' fokay kulo gosoyo, kal talamu;

³⁰ Kay Yesu bay kalay hay hoyok-ziyn tuwa, may nam ka kayni hay liyn ma Marta tuɗ ŋafam iram hayna tuwa.

³¹ Sa Yudiyana sa lakay kat Mariya kay teŋa' ira'a, ɗuwa' kayni na' fok kulo koloy wit' kal goy jiya kaw, nisi yaw kuɗa'a, hay varta ala na' tuɗ kayn goy vun zulda kay tiya.

³² Hay li ma Mariya co hay liyn ma Yesu ka hayna, ira' cuk kalam kayni, na' girif gaa selemu dumu: Bum-Sumuna, lali naŋ ays tani, ɓasunna as mitɗi.

³³ Hay li ma Yesu wi ala na' ka tiya, sa Yudiyana sa tuɗis kuɗa' kaw ka tiya, nam viy goy diwiŋ hay Ŋusta valamu, yor tuwamu kaw.

³⁴ Nam di'e: Nigi burum arige? Nisi hotom dita: Bum-Sumuna, naŋaya, ɗuwaŋga.

³⁵ Yesu tiya.

³⁶ Sa yudiyana di'e: Ɗuwgiya, nam minimu natige!

³⁷ Sum sara jarsiya tun caw di'e: Nam mal ir sa ma dukin goyo, nam nagay kay tel san kayni kay mitɗi kaw ɗisu?

³⁸ Yesu tiy hayam kalaf ŋolo lo, nam kalay vun zul na'ta ta jugoɗay kay hiɗiyna, ta vuna' duki hiɗi hiɗiyna kaw.

³⁹ Yesu di'e: Poŋgi hiɗiyna goyo. Marta ɓasum sa ma mitina dumu: Bum-Sumuna, tuwam muɗi hisa, kay nam buri fiɗi.

⁴⁰ Yesu da'a: Nan dag ala la nak vi'e, nak ma wi gajijita vi Lawna ɗisu?

⁴¹ Wulini nisi poŋ hiɗiyn goyo. Yesu muɗ iram kulo'o di'e: Bunu, nan gaŋ deɓe kay naŋ humanawa.

⁴² Kay nanu nan wi'e naŋ ka human dok-dok, may nan di nala kay tokŋa vi sumuna sa lakay tani, kay nisi ma vi ala ganay kayn mi naŋu.

⁴³ Hay li ma nam di kayni dina, nam siwel hiɗi delem kulo'o ala: Lasarus, kalaŋay goyo!

⁴⁴ Sa ma mitina kal ay goyo, selem hiɗi balam juni hiɗi sligar-jerayna ma junum hiɗi namna, hiɗi sligar ma ɗutum hiɗi namna kaw. Yesu di'e: Butum goyo, hinim tuɗa.

Vokŋa vi sa ɗiger-lawta col dita kay ci Yesu goyo

⁴⁵ Sa Yudiyana ŋol sa ma tam Mariya, sa wi va ma nam lumna vi hayamu.

⁴⁶ May segena jarsiya kalay goy tam sa Farisena, disi kay sle ma Yesu lumna.

⁴⁷ Muliyan ŋulo sa-ɗifinna hiɗi sa Farisena yi dakŋa vi sa ɗiger-lawta di'e: Nay ma lum mi mige? Kay san kayni ka li ɗekka ŋolo!

⁴⁸ La nay hinim li nala, sumun kaf ma vi hayamu. Sa Romena ma co yawaya, sli liyn ma peldetna vaya hiɗi nagata vaya kaw.

⁴⁹ San kep jarsiya, Kayfas, ma ay mul ŋol ma-ɗifinna hay busat na'ta disiya: Nigi may hum va noŋ ne'di;

⁵⁰ A sa ma kepna mit kay sumun kaf, kay jaf-sumun kaf ma ba goyɗi kayni ŋaa'a kigiya, nigi may wi naɗi su?

⁵¹ May nam di kayni kay tuwamɗi, nam di nala kay nam ay mul ŋol ma-ɗifinna hay busat na'ta, nam di vun-jobta kay Yesu ma mit kay sa nagatna.

⁵² May kay sum sa nagatna ɦawaɗi, may lo kay tap gurona vi Lawna sa meray goyna kulo hay tuwna kepe kaw.

⁵³ Tun caw hay buur namna pa, nisi co lawta ala nisi min cum goyo.

⁵⁴ Kay na'ta Yesu muɗ poy goy haraŋ jar sa Yudiyan loɗi; may nam kalay ɗawn pa, tuɗ hay nagata ta ka goboy hiɗi fulda, hay hoyok-ziyna ma yum ala Efrayim, nam musi hiɗi sa hatayna valam ɗawni.

⁵⁵ Paskata vi sa Yudiyana ay goboyo, sumun ŋolo tuɗ kulo Yerusalem jew Paskata kay por tuwsiya.

⁵⁶ Nisi gar Yesu, hay li ma nisi ka hay Tempella, nisi ka di jar-tuwsi ala: Nigi var mige? Nam as co hay yuldetɗi su?

⁵⁷ May muliyan ŋulo sa-ɗifinna hiɗi sa Farisena vul hagat ala: la sa wumawa hay liya deni, nam di goy kalamu, kay nisi min vumu.