YOHANA 1 - BIBALDA TA PELDETTA

Tun cawta vi lawta

¹ Hay tun cawta yoboyna aya, yoboyna ay hiɗi Lawna. Yoboyna kayni mi Lawna kaw.

² Nam ay hay tun cawta hiɗi Lawna.

³ Slen kaf liy hiɗi namu, jar slen ma liyna kaf, va mara ma liy bay nam mayɗi.

⁴ Hay namu irita aya, irita ay kayni mi haraŋa vi sumuna may.

⁵ Haraŋa ka wile hay jufunda, may jufunda vumɗi.

⁶ San ay kep gumi mi Lawna, semda valamu Yohana.

⁷ Nam maawa ki sa ma di-goyna nala, kay li di-goyta kay haraŋa, kay sumun kaf ma fi co hay vida kuɗumu.

⁸ Nam may mi haraŋaɗi, may nam maawa kay li di-goyta kay haraŋa.

⁹ Nam kayn mi haraŋ ma gasina, ma li haraŋ kay san gigekaw hay li ma nam ma kay nagata.

¹⁰ Nam ay hay nagata, nagata liy kayni hiɗi namu, may nagata may wumɗi,

¹¹ Nam maawa tam sa falamna, may sa falamna min tapamɗi.

¹² May tam nisi kaf sa tapamna, tam nisi sa vi hay semda valamu, nam vulsi donota kay nisi ma muɗ goy gurona vi Lawna.

¹³ Nisi sa saŋ vuɗsiɗi, vuɗ kuɗ minda vi sliw-tuwnaɗi, vuɗ kuɗ minda vi saɗi kaw, may kuɗ minda vi Lawna.

¹⁴ Yoboyn muɗi goy sliw-tuwna, nam musi jaraya, hobay hiɗi slugota, hiɗi gasita kaw, numa ɗuw gajijita valamu kaw, ŋray ca ki gajijita vi goor ma vuɗi kepna, ma may vi bumna pa nala.

¹⁵ Yohana di goy kalamu, siwela di'e: Zawn ma nan di kalam ala: Nam ma min ma bugolanu, nam maawa jewan nanu, kay nam ay jewan nanu.

¹⁶ Kay hay hobta vamu, nay kaf fi slugota kay slugota.

¹⁷ Kay gatta vula'ay kayni mi Musus, may slugota hiɗi gasita maawa kuɗ Yesu Kristu.

¹⁸ Sa bay wi Lawn tuwa noŋo, Lawna (goora) ma vuɗi kepna, ma ka hay slaw bulumu, nam muɗum goy a nay wumu.

LOPNA VI YESU MA GOY HAY HARAŊA Di-goyta vi Yohana ma Baptismana

¹⁹ Ɗuwgi di-goyta vi Yohana, hay li ma sa Yudiyana cuk muliyan-sa-ɗifinna hiɗi sa Levitna sunu hay Yerusalem pa kay jobom ala:

²⁰ Naŋ kayn mi gige? Nam di goy haraŋ bay puw-vunda ala: Nan kayni mi Kristuɗi.

²¹ Nisi jobom lo: Mi mige? Naŋu mi Eliyas su? Nam di'e: nan may mi namɗi. Naŋ mi sa ma jobta-Lawna su? Nam hot dita: A'a!

²² Nisi dum mara lo ala: Naŋ kayn mi gige? A numa ma hot dita tam sa cukma'ay sunna. Naŋ kay tuwaŋu naŋ di kay tuwaŋ ala naŋ mi gige?

²³ Nam di'e: Nan kayni mi del sana ma siwel hay fulda: Moɗgi hagata vi Bum-Sumun goy ɗiger.

²⁴ Sum sa cukiyay sunna nisi si sa Farisena.

²⁵ Nisi jobomu dumu: La naŋ may mi Kristuɗi, mi Eliyasɗi, mi jobta-Lawnaɗi kaw, naŋ li baptisma kay mige? Yohana hotsi dita:

²⁶ Nanu nan li baptisma hiɗi niyna; may jargiya, sa mara ka'a ma nigi wumɗi, nam ma ma bugolan nanu.

²⁷ Nan nagay kay but zew ma kay tuguruna valam goy noŋɗi.

²⁸ Slen kayni li hay Betaniya, goy bugol niy-lumna Yordan, liyn ma Yohana li baptisma hayna.

²⁹ Hay buurta ka'ta, nam wi Yesu ka tuɗay talamu, nam di'e: Ɗuwgi goor ɦu-dimina vi Lawna ma yaw sulukŋa vi sa nagat goyna.

³⁰ Kayni mi nam ma nan di goy kalam ala: Nam ma min ma bugolanu, nam maawa jewan nanu, kay nam ay jewan nanu.

³¹ Nan kaw, nan wumay jewɗi, may a ɗekem goy haraŋ kir Israyel, kay na'ta nan maawa li baptisma hiɗi niyna.

³² Yohana li di-goyta di'e: Nan wi Ŋusta siray kulo dukalawn pa ki gukka nala, na' mus kalamu kaw.

³³ Nanu, nan wum jewɗi, may nam ma ganay kay li baptisma hiɗi niyna dan ala: Nam ma naŋ wi Ŋusta siray gaa kalamu, mus kalamu kaw, kayn mi nam ma li baptisma hiɗi Ŋusta-Peldetta.

³⁴ Nan wi'e, li di-goyta kaw ala nam kayni mi goora vi Lawna.

Sa hatayna sa tap kuɗ Yesu jewna

³⁵ Hay buurta ka'ta lo, Yohana ka colay zaw, hiɗi sa hatayna valam kuɗum ma'.

³⁶ Nam ɗuw Yesu ka tuɗa, nam di'e: Ɗuwgi goor ɦu-dimina vi Lawna.

³⁷ Hay li ma sa hatayna sa ma'na hum lawta kayni, nisi tap kuɗ Yesu kaw.

³⁸ Yesu muɗ iramu, hay li ma nam wi ala nisi tapay kuɗumu, nam ka disiya: Nigi gar mige? Nisi dumu: Rabbi, kayni min di ala: Bum-hatta, liyna vaŋ ma buura ka gal arige?

³⁹ Nam disiya: Nigiyaya, nigi ma wi'e. Nisi kaliya, wi liyn ma buura valam kaw; nisi busa kuɗum hay fat na'ta. Kayni hay leer ma goboy doogona.

⁴⁰ Andre, ɓasum Simon Peter, nam kayni mi kep jar sa ma'na, sa hum dita hay vun Yohana pana, sa tap kuɗ Yesu kawna.

⁴¹ Nam fi ɓasulumna Simon Peter, ka dum ala: Numa fi Mesiyas ayawa. Kayni min di ala Kristu.

⁴² Nam maram tam Yesu, Yesu ɗuwumu di'e: Naŋ Simon goora vi Yonas, nisi ma yaŋ Kefas, kayn min di ala Peter.

⁴³ Hay buurta ka'ta, nam min kal Galileya, nam fi Filip. Yesu dum ala: Tapaŋay kuɗanu.

⁴⁴ Filip kayni sa ma Betsayda, hay hoyok-ziyna vi Andre hiɗi Peter.

⁴⁵ Lo Filip fi Nataniyel ka dum ala: Numa fi nam ma Gatta vi Musus hiɗi sa jobta-Lawna law goy kalamna ayawa, Yesu ma Nasaretna, goora vi Yosef.

⁴⁶ Nataniyel hotom dita: Va ma ŋaana as may goy hay Nasaret pa su?

⁴⁷ Filip dumu: Naŋaya, ɗuwaŋ hiɗi iraŋu. Hay li ma Yesu wi Nataniyel ka tuɗay talamu, nam di kalamu: Ɗuwgi sa ma Israyel ma gasina, ma ɗutta may hayamɗina.

⁴⁸ Nataniyel ka dumu: Naŋ wan ay arige? Yesu hotom dita: Hay li ma naŋ ka musi kuɗ gu-gumna, jew Filip yaŋu, nan waŋaya.

⁴⁹ Nataniyel hot diti talamu: Rabbi, naŋ mi goora vi Lawna, naŋ kayni mi mulla vi Israyel.

⁵⁰ Yesu hotom dita: Kay nan daŋ ala nan waŋay kuɗ gu-gumna, kay na'ta naŋ vi'e; naŋ ma wi slen ma ŋulona ma suw kayni!

⁵¹ Nan digi gasita, nigi ma wi wuralawna goy maliya, sunda-wuralawna vi Lawna jik kulo'o, hot jik gaa'a kaw, kay goora vi sana.