YEREMIYAS 9 - BIBALDA TA PELDETTA

Tiy-tuwta vi sa ma jobta

¹ Hih! Lali nan fi dogosay ma rogoyn lak hayamu hay fulda klasige! Nan hin sumuna van goyo, kal goy hayamu, kay nisi kaf kayni si sum sa li zlata-bulota, si jaf-sum sa di newta.

² Sinsi goy gaɗay ki ɓarawt nala kay di law ma gunina, nisi muɗi dono hay nagat kayni may kuɗ ɗigertaɗi, kay nisi tuɗ voko hiɗi joota, nisi may wanɗi. Din mi Ma-Vatɗina.

³ Gigekaw ma ŋom tuwam kay banamna, sa vi kuɗ dita vi ɓasulum maraɗi, kay ɓasum marige kaw ɗut niramna, bana marige kaw yaw diri.

⁴ Nisi ɗut tuwsi jar-tuwsiya, may di gasitɗi, vunsi dum mi sle ma sinna, nisi mak tuwsi kay li sle ma hay liyamɗina.

⁵ Liyn ma musta vaŋu ka jar ɗutta; kuɗ ɗutta na'ta nisi min wanɗi. Dita vi Ma-Vatɗina.

Ma-Vatɗina muɗi ɦiy ŋolo

⁶ Kuɗ na'ta Ma-Vatɗina vi vok-ma-duura di'e: wulini nan min feksiya, nan min waksiya, kay nan lum mara tam goota vi sumuna van ɗawn mi mige?

⁷ Sinsiya ki ɓarawta ta siya' fete nala, nisi da' ti ɗutta, hay vunsiya nisi law sle'ta kat sugolaysina, may hay diksiya nisi gan jawta.

⁸ Nala nan as fok kulo kisiya kuɗ slen kaynɗi su? Sum sa ki kayn nala nan as job yan katsiɗi su?

⁹ Kulo kay hiɗiyna nan min tiya yor tuwanu, nan min tiy tuwanu kay hatna ma hay fulda, nan min tiya, kay nam ŋalay goyo, sa may jik hay loɗi, sa hum tiyta vi farayn loɗi; tun caw tam layay ma dukalawn pa ta-ta tam muuriyan goŋ, slen kaf merawa.

¹⁰ Nan ma muɗ Yerusalem goy difir-firi, liyn ma cekemna jugoɗ zulla valam haya, hoyok-ziyna vi Yuda kaf, nan ma muɗum goy mi liy ma hiweŋŋa, ma sa may li ziy hayaɗina.

¹¹ Sa ma yalla ma hum caw slen cani mi gige? Sa ma Ma-Vatɗin law talamna hinim ɗek goyo ala nanige nagat ɓulakay goyo, nanige nagat ŋalay goyo ki fulda nala, a sa kep kaw may jik haya'ɗi.

¹² Ma-Vatɗin di'e: kayni kuɗ ta ala nisi noy gatta ta nan tuna' voksita, kayni kuɗ ta ala nisi min human vunanɗi, nisi min poy kuɗ dita vanɗi,

¹³ kay nisi poy kuɗ so'otta vi diksiya, ki Baal nala kaw, ki sumaysi hatsi nala.

¹⁴ Kuɗ kayni Ma-Vatɗina vi vok-ma-duura, Lawna vi Israyel ka di ala: wulin kayni nan min hob hay sum nisina hiɗi goyo-goyna, nan min vulsi niy ma samna jaramna a nisi ma cumu.

¹⁵ Nan min mersi goy jar jaf-sumuna sa nisi may wisi jewɗina, sa sumaysi may wisi jewɗi kaw, nan ma bur kew-gaferaŋ bugolsiya, ta-ta nan ma vatsi goy kirap'.

¹⁶ Ki kayn nala Ma-Vatɗina vi vok-ma-duura di'e: kisgi kigiya, yigi boy sa tiyn aya, hinsi co'o, gigi sunda kay boy sa yalla, hinsi co'o.

¹⁷ Hinsi pat tiyn kulo kuma koloyo, hin zimiyn yak gaa kirma'a, hin niyn jaŋ goy goŋ-irma'a.

¹⁸ Kay tiyn ka tiy hay Siyon ala: Yayya! Muma toy gaa'a, numa muɗawa zulo'o, kay numa hin nagat ɗawn goyo, kay nisi to ziyna vuma'awa gaa'a.

¹⁹ Boyna, humgi yoboyna vi Ma-Vatɗina, jak humgi tam va ma vunam di'e! Hatgi tiyna vi guro-boyna vigiya, hatgi ɦehena mi tuwgi jar-tuwgiya.

²⁰ Kay mitta jikawa hay ir-ziyna vaya, na' jikawa kulo hay ziy-mulda vaya, na' ka vat gurosgurayn goy hay hagata, na' ka vat guro-joriyona goy hay liy ma lakka.

²¹ Daŋ ala: Kayni dita vi Ma-Vatɗina, sumun ma mita, nisi ma yak gaa ki san yak zigidik gaa hay sinen nala, Ki yam wana cuk gaa bugol sa ma feɗna nala; sa ma yawam kulo mayɗi.

Yalda hiɗi ka-gosayta vi dikga

²² Ma-Vatɗina ka di ala: Hin sa ma yalla subur tuwam kay yalda valamɗi, hin sa ma donona subur tuwam kay donota valamɗi, hin sa ma farayna subur tuwam kay farayna valamɗi.

²³ May sa ma min subur tuwamna, nam ma subur tuwamu hay li ma nam fi wida-yallawa, hay li ma nam wanawa, hay li ma nam waawa ala nanu mi Ma-Vatɗina. Mi sa ma li ŋaata, li ɗigerta hiɗi gasita gaa kay nagata. Kayni mi sa ma nan minimna. Din mi Ma-Vatɗina.

²⁴ Ma-Vatɗin di'e: Buura ka co'o, mi buura ma nan ma fok kulo kay sum sa kaay gosaya, may gosay ma gasiɗina,

²⁵ Egipte, Yuda, Edom, sa Amonitna, Mowab, sa wel gal jiwersi goyna nisi sa li ziy hay fulda; kay jaf-sumun kaf bay ka gosaya, jafna vi Israyel, jafna vi Israyel kaf bay ka gosay hay diksiya.