YEREMIYAS 7 - BIBALDA TA PELDETTA

Gatta hiɗi bayta

¹ Ma-Vatɗina ka di yoboyna valam tam Yeremiyas ala:

² Colaŋ hay vun-galana vi ziyda vi Ma-Vatɗina, siwelaŋ dit kayni: Naŋ ma di ala: humgi yoboyna vi Ma-Vatɗina, nigi kaf, sum sa hay Yuda, sa ka cuk kalaf hay vun-galan zawni, kay girif gaa vok Ma-Vatɗina.

³ Ma-Vatɗina vi vok-ma-duura, Lawna vi Israyel ka di ala: muɗgi zlana vigiya, muɗgi varta vigiya kaw, nala nan ma hingi lak hay liyn tani.

⁴ Yoboy ma ɗutna ma ala: Tempella vi Ma-Vatɗin ka tani, Tempella vi Ma-Vatɗina, Tempella vi Ma-Vatɗina, yoboy namna nigi ma vi kuɗumɗi.

⁵ La gasi nigi muɗ hagata vigiya, la nigi muɗ varta vigiya, la nigi li sle ma gasina mi tuwgi jar-tuwgiya,

⁶ la nigi curoɗ sa ma pulla hiɗi sa ma kuyuna hiɗi cata duhultaɗi, la nigi may ɦok busuw sa ma bay-joota goy hay liyn tanɗi, la nigi may tap kuɗ lawayn mara'a ma mar joot kiginɗi,

⁷ Hay na'ta nan ma hingi lak ziy hay liyn tani, hay nagata ta nan vula' mi sumaygiya hay vatɗita vatɗita.

⁸ May wulini nigi ka vi kuɗ yoboy ma ɗutna, yoboy ma as gutɗina.

⁹ Kayn mige? Kula, ci mati, li zlata-bulo'o, yi slen kigi hay sinda, li ɗifin ma no'osna tam Baal, tap kuɗ lawayn mara'a ma nigi may wumɗina!

¹⁰ Bugolda lo, nigi hotay lak vok iranu, hay ziyd zawni ta semda vanu ka tuni ta'a, nigi hot di lo ala numa buti goyo, kayni kay li sle ma liwis namna kafe.

¹¹ Ziy na'ta ta semda van tuni ta'ta zawni, kirgi ki zul-hiɗiyna ma sum sa coŋcoloŋŋa ka ŋay hayna nala su? Nan kay tuwanu ka wi kayni, din mi Ma-Vatɗina.

¹² Tuɗgi hay liyn ma peldetna vanu hay Silo tuwa tige, liyn ma nan tun semda van talam jewna, ɗuwgiya, nan muɗum muɗtige? Kayn kuɗ joota vi sumuna vanu sa Israyella ɗisu?

¹³ May wulini, kay mige nigi li slen kaynawa kafe? Kay mige nan law tigiyawa hay graw culumta pa, may nigi min humanɗi, kay mige nan yigiyawa may nigi min humanɗi, din mi Ma-Vatɗina.

¹⁴ Nan min ɓulak ziyda ta semda van ka tuni ta'ta, ziyda ta nigi tun vida vigi haya'ta, liyna ma nan vulum migi nigiya hiɗi sumaygina, ki nan ɓulak Silo nala kaw;

¹⁵ nan min digiɗgi goy gine'e vok iranu, ki nan digiɗ ɓosiyogin goy kaf nala kaw. Jafna vi Efrayim noŋ kafe.

¹⁶ May naŋu, naŋ ma siɗaw kay sumun kaynɗi, naŋ ma tiy kisiɗi, siɗawaŋ kisiɗi kaw, naŋ ma giɗelan delan kisiɗi; kay mige nan as humaŋ loɗi.

¹⁷ Slen ma nisi ka lum hay hoyok-ziyna vi Yuda jar hagana vi Yerusalemna naŋ may wumɗi su?

¹⁸ Guron yaw guna, sumayn ŋal kuna, boyn hiliɓ futuwna, kay li hambulla tam ca-mulda vi dukalawna, kay li ɗifin ma yamam goyna tam lawayn mara'a, kay ɓulakan dikanu.

¹⁹ Ma-Vatɗin di'e: Nisi ɓulakanti kayn mi dikan nan su? Nisi ɓulakam kayn mi tuwsi nisiya, kay muɗ tuwgi goy zulo'o ɗisu?

²⁰ Kay na'ta, Bum-Sumuna Ma-Vatɗina ka di ala: Wulini ɦiyda hiɗi purcakka vanu coowa kay liyn tani, kay sumuna hiɗi muuriyana kaw, kay gu ma fulla hiɗi sle ma vuɗ jafna; kuta ma ŋala, na' as tew goy noŋɗi.

²¹ Ki kayn nala Ma-Vatɗina vi vok-ma-duura Lawna vi Israyel di'e: Tapgi ɗifinna vigi ma ŋal-goyna tam ɗifinna vigi ma ɦawana, mutgi sliwamu.

²² Kay nan may law hiɗi sumaygiɗi, nan may vulsi gatɗi kaw, hay li ma nan kalsi ay goy hay nagata Egipte pa, nan may disi va kay ɗifinna hiɗi ɗifin ma ŋal-goynɗi.

²³ Kayni ti gatta ta nan vul tisiya: Humgi delanu, kay nan ma muɗ mi Lawna vigiya, nigi kaw ma muɗ si sumuna vanu, nigi ma poy hay hagata ta nan ɗekgi ka'ta kafe, kay nigi ma fi sle'ta.

²⁴ May nisi min humɗi, nisi min jak humsiɗi, nisi tap kuɗ gatta hiɗi so'otta vi diksi ma joona, nisi hot tuwsi goy bugolo, may min tuɗ vokɗi.

²⁵ Tun caw tam liy ma sumaygi kalay goy hay nagata Egipte pa ta-ta vaydi, nan cukgi sa sunda van tigi kafe, kayn sa jobta, nan cuksi ay tigi hay hay buurta kaf, hay graw culumta pa.

²⁶ May nisi min human noŋɗi, nisi min jak humsiɗi, nisi so dekdelsi goy ɗeŋ kiŋ-kiŋ', nisi li joot suw sumaysiya.

²⁷ La naŋ disi yoboy namna kayni kafe, nisi ma humaŋ noŋɗi; la naŋ siwel tisiya, nisi as hotaŋ dit noŋɗi.

²⁸ Nala naŋ ma di tisi ala: lakŋi si sum sa hum della vi Ma-Vatɗina Lawna visiɗi, sum sa min vi hattaɗi, gasita pirawa, na' vi tuwa'awa goyo hay dita vi vunsiya.

²⁹ Ɗuŋus ma kagŋa ma nak vuli goy ɗifin hiɗi namna nak ma kaam goyo, cukum goyo; patag tiyna kulo kay liy ma ɗiŋiriŋŋa, kay sum sa muɗ dik Ma-Vatɗin ɦiyna nisi kiram bisi, nam noysi goy kaw.

³⁰ Kay gurona vi Yuda li slen ma joon vok iranu, lawayn ma liwisna visiya nisi lakam hay ziyna ma semda van ka yiy haya, kay muɗ ziy na'ta liwisi. Din mi Ma-Vatɗina.

³¹ nisi in liy ma ɗiŋiriŋŋa hay Tofet hay lokŋa vi Ben-Hinnom, kay ŋal gurona visi sa jufayna hiɗi sa boyna goy hay kuta. Kayn mi slen ma nan may vulsi hagat kalamɗina, va ma nan may var kalamɗina.

³² Ma-Vatɗina di'e: Kuɗ kayni buura ka co'o, nisi ma di ala «Tofet» loɗi, nisi ma di ala «Ben-Hinnom» loɗi, may «lokŋa vi cimta-goyta». Nisi ma pi sumun goy hay Tofet, kay liy ma pi sumun ma kiɗa'a.

³³ Tuw sumun ma mitina ma muɗ mi ŋumna vi layayn ma dukalawna hiɗi muuriyan ma kay nagata. Sa ma digiɗ sle namna goyo muɗ may noŋɗi.

³⁴ Nul ma firita hiɗi nul ma firit ŋolla ma nisi ka gum hay hoyok-ziyna vi Yuda hiɗi hagata vi Yerusalem, nan ma zanam lemdeh', nan ma zan nul ma dabayna kaw, kay nagata ma ɓulak goyo.