YEREMIYAS 41 - BIBALDA TA PELDETTA

Nisi ci Gedaliya goy mati

¹ Hay til ma siɗiyana, Ismayel goora vi Netaniya, goora vi Elisama, ma hay jafna vi Mulda, namu hiɗi sa ŋulona vi mulla, nisi ay tapay hiɗi sum sara doogo kaw, nisi co kat Gedaliya goora vi Ahikam hay Mispa. Ɗawni hay Mispa nisi ti fun kuɗ tuwsiya.

² Ki kayn nala Ismayel goora vi Netaniya fokay kulo'o hiɗi sum sa doogo sa nam tapay kuɗsina, Gedaliya goora vi Ahikam goora vi Safan nisi calam hiɗi kew-gaferaŋa; ki kayn nala sa ma mulla vi Babilon tunum guverner hay nagatna nisi cum goy mati.

³ Sum sa Yudiyan kaf sa ay kat Gedaliya hay Mispa, hiɗi sa Kaldeena sa ka hay liy namna, sum sa wi duura kaw, Ismayel cisi goy kafe.

⁴ Hay buurta ma'ta bugol ci-goyta vi Gedaliya, hay li ma sa bay hum labara tuwa,

⁵ sumun dok-glafandi may goy hay Sikem, hay Silo hiɗi Samariya pa, jiwersi welay goyo, sligar ma tisin jetay goyo, tuwsi goy jiriya kaw, nisi mar vulda hiɗi ɗifin ma no'osna, kay tuɗum hay ziyda vi Ma-Vatɗina.

⁶ Ismayel goora vi Netaniya kalay goy hay Mispa vok irsiya; nam tuɗ kilan tiy kila'. Hay li ma nam ŋaf hiɗi nisiya, nam di tisiya: Nigiyay goy tam Gedaliya goora vi Ahikam.

⁷ Hay li ma nisi co kulo way hoyok-ziyna, Ismayel goora vi Netaniya ŋatsi goyo, nam cuksi hay kaara, gut kuɗum kayn si sum sa tapay kuɗumna.

⁸ May sum segen ka jarsi doogo, nisi di tam Ismayel ala: Cuma goyɗi, kay numa ka hiɗi sle ma tin ŋayay goy hay sinena: alkamarena, orgena, mula hiɗi yumna. Nala nam hinsi goyo, min cisi goy kuɗ ɓosiyosinɗi.

⁹ Kaata ta Ismayel cuk tuwna vi sa nam cisi goboy hiɗi Gedaliya kayni ti kaata ta mulla Asa kota'ta, nam kota' kayni kuɗ Bayeska mulla vi Israyel, Ismayel goora vi Netaniya cuk tuw sum sa nam cisin kayn hay kaat na'ta.

¹⁰ Sum sa hin hay Mispan kaf Ismayel yawsi gorvo'o, guro-boyna vi mulla hiɗi sum sa ka lakay hay liy namna kaf, sum sa Nebuzaradan ma ŋolla vi sa ŋomda hinsi hay ɓam Gedaliya goora vi Ahikam, sum nisina Ismayel goora vi Netaniya yawsi gorvo'o, nam kaliya kay tuɗ goy vi sa Amonna.

¹¹ Yohanan goora vi Kareyak, hiɗi sa ŋulona vi sojena sa ay hiɗi namna kaf nisi hum labara kay joo ma Ismayel goora vi Netaniya lumna.

¹² Nisi yaw sumun kuɗsi kaf kalay kay mot Ismayel goora vi Netaniya. Nisi fum goboy hiɗi goloŋ ŋulona vi Gabawon.

¹³ Hay li ma sum sa ay kuɗ Ismayel kaf wi Yohanan goora vi Kareyak hiɗi sa ŋulona vi vokŋa vi sojen kaf kuɗumu, nisi li firiya;

¹⁴ sum sa Ismayel yawsi ay hay Mispa pana muɗ delsiya, nisi gi dirsi kuɗ Yohanan goora vi Kareyak.

¹⁵ May Ismayel goora vi Netaniya yaw sumun kuɗum glafandi, nam pir vok Yohanan jaŋi, kalay goy vi sa Amonna.

¹⁶ Ki kayn nala, Yohanan goora vi Kareyak hiɗi sa ŋulona vi sojena sa kuɗum kafna, yaw caw sum sa hinna, nam butsi goy hay ɓam Ismayel goora vi Netaniya, hay ma nam kal sumun goy hay Mispa pa bugol nan ci Gedaliya goora vi Ahikam goy cina. Nisi sa Yohanan hotsi ay hay Gabawon pan kayni; sum sa wi duura, boyna, gurosgurayna, sa patayna kaw.

¹⁷ Nisi fokay tuɗa, ta-ta nisi lak kayn kat liyn ma kot tina vi Kimham goboy hiɗi Betlehem, kay tuɗ ŋay goy hay Egipte bugolda,

¹⁸ gine hiɗi sa Kaldeena sa nisi ka li nar kisiya, kay mige Ismayel goora vi Netaniya ci Gedaliya goora vi Ahikam goyo, kay tun Gedaliya guverner hay kayni mi mulla vi Babilon.