YEREMIYAS 4 - BIBALDA TA PELDETTA

¹ Sa Israyella, la nigi hotaya, la nigi hotay katanu, din mi Ma-Vatɗina, la nigi yaw slen ma liwisna goy vok iranu, nigi ma kiɗiwir goy loɗi.

² La nigi yi va kigi ala hay sem Ma-Vatɗina hiɗi gasita, hiɗi ɗigerta hiɗi hagata-ɗigerta, ki kayn nala jaf-sumun ma fi bolda kuɗgiya, nisi ma subur tuwsi kuɗgiya.

³ Ma-Vatɗina ka di ki kayn nala tam sumuna vi Yuda hiɗi Yerusalem: Pogi sine ma wuliya, cukgi wan gaa jar zigiynɗi.

⁴ Kaagi gosaya kay Ma-vatɗina, Kaagi gosay hay dikgiya, sumuna vi Yuda hiɗi sumuna vi Yerusalem, kay la ɦiyda van munawa goyo ki kut nala, hay li ma na' doowa, sa as tewa'ɗi, kuɗ lopna vigi ma joona.

Sa gawta sa gal gaana ka sli nagata

⁵ Digi labar goy hay Yuda, siwelgi goy hay Yerusalem, digi ala: «buwgi togolomna hay nagata, siwelgi hiɗi delgi kulo ŋolo», digi ala: Tokgi tuwgi aya, tuɗay hay hoyok-ziy ma donona.

⁶ Meɗgi bay-bayn kulo'o kat Siyon, mungi jaŋi nigi ma lakɗi, kay hay gal ma gaan pa nan min mar joota hiɗi ɓulakka ŋolda.

⁷ Zlon ka kalay goy hay zulla valam pa, sa ma ɓulak jaf-sumun goyna ka tuɗiya, nam hin liyna valamiyawa, kay ɓulak nagata vigiya; hoyok-ziyna vigi ma ɦo gaa'a, sa as hin hayam loɗi.

⁸ Kuɗ na'ta kayni cukgi sligar bolla tigiya, tiygiya, yorgi tuwgiya; kay ɦiyda ŋolda vi Ma-Vatɗina jara' may ja goy hiɗi nayɗi.

⁹ Hay buur namna ɗawni, muliyana hiɗi sa ŋulona sutaysi ma to'o, muliyan-sa-ɗifinna ma muɗ ɦuyum', sa jobta tuwsi ma li nari, din mi Ma-Vatɗina.

¹⁰ Nan di'e: Heh! Bum-Sumuna Ma-Vatɗina, sumun kayni hiɗi Yerusalem pet naŋ ɗutsiyawa hay li ma naŋ di ala: Nigi ma lak hay sle'ta, may dolay kayni kew-gaferaŋa ka gar a yaw irita vigiya.

¹¹ Hay buur namna ɗawni, dit ma di tam sum nisina hiɗi Yerusalem ala: Simeɗ ma vidik kuna ka biw hay liy ma kulo ɗiŋiriŋŋa vi fulda, hay hagata vi goota vi sumuna vanu, kayni may kay sir bra ma kir wan goyɗi,

¹² may kayni mi simeɗ ma biw jiw-jiwna, ma may goy ɗawn pa kay co tanu, wulini nan min ka kitata visiya.

¹³ Nam ma ɓulak liyna ma tuɗis ɗaw ki ɗugulla nala; kekena valamu ki ɦiwliŋŋa nala, kulumayna valamu koloy ŋolo suw bakŋa. joot kaya, kay ɓulakka fayawa.

¹⁴ Muz joota vi dikgi goyo, sa Yerusalemna, kay nigi ma suɗ goyo, varta ta gunita nigi min ŋoma' hay dikgi nala ta-ta lancitige?

¹⁵ Kay della ma kal goy vi Dan pana ka law kay bakmarana, del namna ka siwel bakmaran goyo kay hiɗiyta vi Efrayim pa.

¹⁶ Digi kayni tam jaf-sumuna, ɗekgi kayni kir sum sa hay Yerusalemna: Nigi ma disi ala: sum sa ti ɓuraŋŋa ka co'ay goy hay nagata gineta pa; nisi ka ciriya kat hoyok-ziyna vi Yuda.

¹⁷ Nisi ŋuy Yerusalem ki sum sa ŋom sinena nala, kay sum sa haya'na yaw kulo'o katanu, din mi Ma-Vatɗina.

¹⁸ Kayni mi vuɗna vi poyta vigiya hiɗi lopna vigiya, kayni mi vuɗna vi joota vigiya; gasiya, nam kayni galaki, galakka valamu kal ta-ta kalaf hay dikaŋu.

¹⁹ Hayanu, hayanu, nan ka ci lasta hay dikan kalafi, dikan ka van bat-bat', nan as zanɗi; kay ciwta vanu ka hum buwna vi togolomna, ka hum ciriyna vi duura.

²⁰ Nisi ka di kay ɓulakka mara'a mara'a, kay nagat kaf tiy ɓuraŋi; guɗukŋa van tiy ɓuraŋ gosoyo, bay-bayna vanu tiy ɓuraŋi ir liyn neeɗa ɦawa.

²¹ Nan ma wi bay-bayna ta-ta lancitige? Nan ma hum buwna vi togolomna lancitige?

²² Hay gasita sumuna van ɦoyay goyo, nisi may wanɗi; nisi si gurosguray sa ɦay-ɦaya, yal may kulo kisiɗi, nisi ka hiɗi yalda kay li joota, may nisi wi kay li ŋaatɗi.

²³ Nan ɗuw nagat na kayni, na' goy ɦawa'a va may ka'ɗi; dukalawna hiɗi haraŋa valamu vatawa goyo.

²⁴ Nan ɗuw hiɗiyn na kayni, nam kafe geɗiya, liy ma jiŋiliŋŋa kaf ka geɗa.

²⁵ Nan ɗuw na kayni, sa may noŋɗi; layay ma dukalawn kaf kaw munawa jaŋi.

²⁶ Nan ɗuw na kayni, Karmel muɗi goy fulu; hoyok-ziy ma hayn kaf ɦoy gaa'a, vok ir Ma-Vatɗina, vok ɦiyda valam ta ŋolda.

²⁷ Kay Ma-Vatɗina ka di ala: Nagat kaf ma ɓulak goyo; may nan ma ɦo nagat gaa kafɗi.

²⁸ Kuɗ na'ti kayni, nagat ka hay do'olla, dukalawn ma kulon muɗi jufunu; kay nan di'e: dita van coliya, nan as ham kay kaynɗi, nan as hot bugolanɗi.

²⁹ Hay suwana vi sa jaŋ kulumayna, hiɗi sa ɓe hiɗi ɓarawta, sum sa hay hoyok-ziyn kaf muni jaŋi; sumun cuk kulo jar guna, sumun jik kulo kay hiɗiyna, hoyok-ziyn kaf noyay goyo, sum sa li ziyn say loɗi.

³⁰ Nigi hayɗini, nagata vigi ɦoy goyo, nigi ma lum mi mige? Nigi cuk sligar ma slawna, nigi gan tuwgi hiɗi ora, nigi ɗo irgi kulo kaw, nigi li tuwgi jifiy kayn goy waa'a, sa cilena vigiya cen kuɗgiya, nisi min ba irita vigiya.

³¹ Kay nan ka hum tiyna ki cata ka vun pukka nala, tiy ma hawna ki hay pukka ta gunayt nala, kayni mi del goota vi Siyon, suka' ka kal goyo, na' meɗ ɓa' goyo, ala: nan ka vun lasta, nan ka puk gaa'a vun watta vi sum sa ci matna.