YEREMIYAS 21 - BIBALDA TA PELDETTA

Vun-jobta kay sli ma Nebukadnesar min sli Yerusalemna

¹ Ma-Vatɗina vul dita valam hay vun Yeremiyas, hay li ma mulla Sedekiyas cuk sumun can ay talamu: Paskur goora vi Malkiya, Sofoniya goora vi Maaseya, mul-ma-ɗifinna, kay nisi ma dum ala:

² Naŋ jobay Ma-Vatɗin tige; kay Nebukadnesar mulla vi Babilon ka duraya, la li ŋalɗi Ma-Vatɗina ma li ɗekka valam tara kay klasige, kay a nam ma vi tuwam goy gine taya.

³ Yeremiyas di tisiya: Nigi ma di tam Sedekiyas ala:

⁴ Ma-Vatɗina Lawna vi Israyel ka di ala: humgiya, mulla Nebukadnesar hiɗi sa Kaldeena sa ka ŋuy goy bugol gulmunna, sle-ma-duura ma ka hay ɓigiya, kay dursi hiɗi namna nan min muɗum iram goyo, nan ma tunsi irsi ay kulo hay hoyok-ziyn tani.

⁵ Bugolda nan kay tuwan ma durgiya, hiɗi ɓan meɗay kulo'o hiɗi gilaŋatan dono'o, hiɗi ɦiyda ŋolda, hiɗi purcakka, hiɗi dikan ɓulakay ŋolo.

⁶ Nan ma ci sum sa hay hoyok-ziyn tani goyo, sumuna hiɗi farayna, moy ma joona ma cisiya.

⁷ Ma-Vatɗina di'e: Bugol kayni, Sedekiyas mulla vi Yuda, sa sunda valamu, sum sa kisna, hiɗi sum sa hulot goy vun moyna, vun kew-gaferaŋa hiɗi mayta hay hoyok-ziyn tan kaf, nan ma vulsi goy hay ɓam Nebukadnesar mulla vi Babilon, hay ɓam sa gawt kisina, hay ɓam sum sa min ba irita visiya, Nebukadnesar ma calsi hiɗi kew-gaferaŋa, nisi ma hulot goy vun ɓalamɗi, nam ma lisi slugot noŋɗi, ma wisi hawsi noŋɗi kaw.

⁸ Naŋ ma di tam sum nisina ala: Ma-Vatɗina ka di ala: Humgiya: nan min lak hagata vi irita hiɗi hagata vi mitta vokgiya.

⁹ Sa ma min hin hay hoyok-ziyn tani, kew-gaferaŋa hiɗi mayta hiɗi moyna ma cum goyo, ay sa ma min kal goyo kay hin tuwam hay ɓam sa Kaldeena sa hoyok-ziyn ŋuyi kisina, nam ma suɗa, may nam tiy ɓuraŋi.

¹⁰ Kay nan cuk iran kay hoyok-ziyn tani kay lum joo'o, may kay lum ŋaaɗi, din mi Ma-Vatɗina; hoyok-ziyn namna ma vulis goy hay ɓam muliyana vi Babilon, nisi ma ŋalam goyo hiɗi kuta.

¹¹ Naŋ ma di tam jafna vi mulla vi Yuda ala: Humgi yoboyna vi Ma-Vatɗina.

¹² Jafna vi Yuda, humgi dita vi Ma-Vatɗina. Ligi ɗigerta hay graw culumta pa, sa ma sumun lum iramna nigi ma butum goyo, kay la naɗi ɦiyda vanu ma mun goyo ki kuta nala, hay li ma na' slaawa kuwa, sa as tewa'ɗi, kuɗ lopna vigi ma joona.

¹³ Humaŋu, nan min ɓulakaŋu, naŋ hoyok-ziyna ma ka tuni hay lokŋa, kay hiɗiy ma hay beɗna, din mi Ma-Vatɗina. Dit kayni tigi nigi sa ka di ala: sa ma as jikay gaa kuɗma'n mi gige? Sa ma as kal hay ziyna vuma gige?

¹⁴ Nan ma watgiya kuɗ vuɗna vi lopna vigiya, din mi Ma-Vatɗina; nan ma tun kut kuɗ juruta vigiya, kut ma ŋala' gaŋa' kafe.